Condii lisai 28 - BII BILA

Mala ya Mɛlɛka

1 Condii David-e.

¹ Condii David-e. Mɛlɛka, o nɔm ndo ya co yondaa nuaa ni. Nɔm Pow kpova nuu, meílùl-la le. Kani taa meilul-la pɛ, i siŋnun maa vanvílɛ́yaa co tolɔɔ o sɛiyo nin-nda.

² I va pɛ nɔm diomndo solullo le nɔm tɛɛlɔnndo, i heelu pɛ balan o Fonda nɔm diandaa, a yandi, tuei ya diom.

³ Tósà a ya mɛɛ n tosà a vanaa kɔlvesɛiya yɛ le, vanaa yɔŋ vɔɔnda pɛɛn. Vanaa kan co vannda sɔɔn kɔlɲulon dimullo, kɛ kɔlvesɛiyo co o piaa nda o lakɔl cá.

⁴ Mingul nda mɛɛ kela ndaa co yɛ, bii nda mɛɛ dɛnnda nda vɔɔnndan la co yɛ. A toɲa, tosal nda mɛɛ dɛnnda ndalan la co yɛ, ma mingul nda ɲɛ nda tosa-o.

⁵ Kani a co dɛnnda Mɛlɛka tosa lan a ɲɛm o cɔw a laba-on bila biyɔɔ le. Màá Mɛlɛka cii nda! Màá a can ndɛ le!

⁶ I mel Mɛlɛka balika, kani o tuei tɛɛlɔnnda nilan.

⁷ Mɛlɛka co ya kandaa, ndu co kɔ̀ɔ̀ cɔw nuu ni. I laalan ndu a kɔl nuu kpede, ndu co ya malaa ni. Kɔl nuu co a ɲaaloo, i co ndu balikaa mello o condei nin.

⁸ Mɛlɛka co yoomuma vanaa ndɔa ni, ndu co Pow kpovaa le vana o pɔla-o ni.

⁹ Mɛlɛka, ciindiaa vanaa nɔmnda, dɔw vanaa co kɛ́ nɔmndo-a duaa. Va maa vana mandaa n'saa le nda, ma va nda malaa lɔ́ɔ́-lɔ́ɔ̀.