Condii lisai 25 - BII BILA

Mɛlɛka, cɔ́m ya mɛɛ ya kela yɛ

1 Condii David-e.

¹ Condii David-e. Mɛlɛka, ico mulinndo o nɔm ndo.

² Hala nuu, nɔm ya handu laalan nuu coo ni, cɛl mì siɛmbulan la bii ya le. Màá yaamɔaa nia nɔla ya mà dɔwnun ɲaale le!

³ Vanaa tiindan nɔm-nda kpow, o kɛ́-kɛ̀ siɛmbula biinin te. Kɛ vanaa co nɔm dúmbóó yiiyo-a siɛmbulan la biinin ni, mà lo bala fondo.

⁴ Mɛlɛka, cɔm ya nɛila nɔmndan, mà pɛɛku ya kaŋnda ya kélá coo lan.

⁵ Yɔɔ ya o nɛi toɲa nɔmndo coo, mà pɛɛku ya, kani nɔm co Hala nɔ cinda nuu o ba-o ni. I co nɔm tiindanndo lepalaa-lapala.

⁶ Éé Mɛlɛka! Yiyan le ɲíí nɔmnde a le lo n lo o lediom coo-o, kani ɲíí ken a sakpoyɛi ken co nɔm o ba kabi lɔ́ɔ́-lɔ́ɔ̀.

⁷ Yiyan ndɛ hakila ya tosa o felengiyɛi nin-ndan a nila kalula ya tosa lan te. Kɛ yiyan bii ya mɛɛ n lò o lediom coo yɛ, a mɛɛ vanakɛndɛyɛi nɔmnde co yɛ, Mɛlɛka.

⁸ Mɛlɛka naŋ, o sandu bɔɔ! Ndu cɔ̀m vanaa lahakia mɛɛ nda bɛnda mà kela yɛ ni.

⁹ Ndu cɔ̀m vanaa tuisin tootoo-a dɛnnda sandaalan ni, mò pɛɛkuu nda nɛi ndɔɔ.

¹⁰ Nɛila Mɛlɛkalan kpow, lou o lediom coo a toɲaa la co ni, le vanaa co kpema ndɔɔ a tɔŋnda ndɔlan biyɔɔ-a.

¹¹ Mɛlɛka, yiyan le diola nɔmndan, mà mal-la haki le tɛɛmbuu nuu, kani o vɔw bɔɔ.

¹² Vanndo nɔ pɛ siòòŋii Mɛlɛka-e, Mɛlɛka pɛɛku vana kon nɛi o bɛnda mò kela coo-o.

¹³ O vanin o dɛnɛ kɛndɔɔ nin, mì cuavaa ndɔa sɔla lɛŋnden kɛ́ɔ.

¹⁴ Vanaa nɔ siòòŋii Mɛlɛka-e-a, nda Mɛlɛka cɔm sɔɔn ndɔn viannanndon ni, le nda kpema ndɔɔ cɔmndo.

¹⁵ Hɔlaa nia co lɔ́ɔ́-lɔ́ɔ̀ a muliaa o Mɛlɛka lo, kani ndu solì ya pelon o yalaa nin ni.

¹⁶ Mulul-la hɔlla, mà tuinun ya iɲíí Mɛlɛka, kani ya pilɛ co ni, i co o mɔnɛi nin.

¹⁷ Kɔl yulan-yulanndo co ya piɔu nin, lelan soli ya o buulanndan nin.

¹⁸ Tofa vɔ mɛɛ dɛnɛ palaa a sangaa co ya coo yɛ, mal-la haki le hakila nilan kpow.

¹⁹ Tofa vɔ mɛɛ yaamɔaa nia co sɛ́lɛ́ yɛ, Mɛɛndan-ndɔ mɛɛ nda nɔ nɛyɔnndo a ya yɛ.

²⁰ Kanda ya ma baŋa ya. Màá siɛmbula bii ya le! Kani nɔm o ba bɛngu ya hin vionnɔnndo ni.

²¹ Màá sakpoyɛi nɔmnde a dɛnɛ sandaa nɔmndo kanda ya! Kani nɔm ya tiindan ni.

²² Éé Hala, baŋa Israɛlla le dɛnnda isiòònnda co nda coo lan.