Condii lisai 20 - BII BILA

Piɛilen le masaa

¹ Condii David-e, í fula o condun simlacinɔ vanaa n'condua nin-nde.

² Màá Mɛlɛka tuei nɔm diom o paale dɛnɛ palaalen coo! Màá Diola Hala Yakɔb-o la kanda nɔm!

³ Màá Mɛlɛka yɔngu nɔm malaa fulaa o Cɛi ndɔ diandaa nin! Màá ò luei nɔm yoomuan fulaa nɛɛ o co Siɔn-nda!

⁴ Màá o yiyan a sálàla nɔmndan kpow o kɔɔ, mò cɛl le sálàla loamaalan nɔmndan!

⁵ Màá o ke nɔm ɲɛ kɔl nɔmndo yeema-o, mò peelu tuula nɔmndan kpow!

⁶ O kon, n yondanin a ɲaaloo le mala n sɔlanin-ndo. N heelunin lɛfɛ landaa le diola Hala naa lisaa. Màá Mɛlɛka muli sɔɔn n ɲunannin ndu-on kpow!

⁷ I sinà nihau maa Mɛlɛka baŋa masa o pɔla-o. O lo o Cɛi ndɔ diandaa nin o halataala, mó va ndu mulullo a kpaaya ba ndɔ kɛndɔɔ.

⁸ Vanaa pum tiindan ɲɛla ɲaanannda soa nan-ndan, a pum yɛ soa ndaa nda tiindan ni. Kɛ naa naa, tiindan naa, ndu co diola Mɛlɛka Hala naa lan piɔlɔɔ ni.

⁹ Nda nda, a co yoomuan fulaa má va delio. Kɛ naa n connun isisi, n connun yili.

¹⁰ Mɛlɛka, ciindiaa masaa! Haliko mò mulul naa paale naa n ɲunanin ndu len.