Condii lisai 19 - BII BILA

Biilu Hala-o co o lɛŋnden coo

¹ Condii David-e, í fula o condun simlacinɔ vanaa n'condua nin-nde.

² Halataalaa co yondaa a biilu Hala-o o kɔɔ, nɛɛ loeon co coocoo-a co vali Hala tosa a laba-o cɔmndo.

³ Palɛi co kɔlan dimulanndo a biilu kalaa o kɔɔ, ɲumndan bɛɛ ma co kɔlan a ndu cɔmanndo.

⁴ O co sɔɛi sondo le, diom co fula le, vana co ɲɛ-ɲɛ tueyɔɔ a lani le.

⁵ Kɛ diomnda ndalan la co kɔlan nɛɛ-nɛɛ ka o lɛŋnden coo, sɔɔn ndan co tiiyaa o lɛŋnden mɛɛlulan dí. Hala tondu cɛi-kola-toandaa o halataala le paalen.

⁶ Mɛɛ vanapɔnɔ cua lanɔɔ sɛnɛiyo fula o ndu lo cɛinin nuaa yɛ, mɛɛ vana ɲaananndo va a ɲaaloo le ɲaanɔnndo o nɛi nuaa yɛ, lende koni paalen le can ni.

⁷ Le cɛn pɛ o halataalaa baa pilɔɔ, le kɔ del o mɛɛlulan baa pilɔɔ, ɲɛ-ɲɛ tiwba hangul ndɔɔ vionnɔnndo le.

⁸ Tɔŋ Hala-o tiwnun, ndu yɔ̀ngu vana yoomuan le va yoomu ni. Toɲaa pɛɛkula Mɛlɛka lan la co ni, lan la siinguu vana nɔ taasi loo vana kɔlkaloo ni.

⁹ Silala Mɛlɛka lan la sandu, la yɔ̀ngu vana ɲaaloo o kɔl. Tɔŋnda Mɛlɛka lan la dendu, la mala vana le dɛnndan cɔu ɲɛkɛndɛi.

¹⁰ Siòòŋii Mɛlɛka-e nɔu naŋ bɔɔ. Kon lonin tosanndo le vɔsilan kɛmɛlan o kɛmɛlan nin. Sɔɔn Mɛlɛka kialu-on co sɔɔn kpeekpei, sɔɔn sandan kposon n co ni.

¹¹ Mun hiow vaa n'sɔvɛ a sianion, n hiow siani diandan naŋɔɔ, n hiow lɛma co fulaa o vàálan nin-ndan yeelaa.

¹² Mɛlɛka, o tɔŋnda nɔmndan nin ya vana nɔm baalaa, co pɛɛkulan sɔlaa ni. Vana bii lan pɛ, ndu sɔla malaa taw.

¹³ Nɛ̀ɛ́ sina yɛ pɔwla ndɔla ndu pila lan? Mɛlɛka, tuinun ya iɲíí le biondɔnnda ya co tosaa o sina lepɛŋndo nin-ndan.

¹⁴ Kanda ya a vanaa yongaa. Cɛ̀l mà tiw ya ba le. O kon, ì sandu, yɔŋii ya tosa haki vɔɔn-vɔɔndo.

¹⁵ Àá Mɛlɛka! Nɔm pow kpova nuu, nɔm vana baŋà ya-o, cɛl sɔɔn co fulaa ya o sondo-on, a yiyannda co ya o kɔl-tan ɲɛkɛndɛi!