Condii lisai 16 - BII BILA

Vana Hala mingi yoomu-o dɔwnun ɲaale

1 Condii fula o condun David-on nin-nde.

¹ Condii fula o condun David-on nin-nde. Éé Hala, kanda ya! Kani o nɔm ndo ya hin vionnɔnndo nuaa ni.

² I dimul Mɛlɛka aa: «Nɔm co Maalii nuu ni, i nɔ dɛnɛ kɛndɛ celen hiovɔɔ o nɔm coo le.»

³ Vanaa diandaa co o lɛŋnden nden nin-nda, nda pila, a vanaa kpaayaa, kan co vanaa hɛnan ya-a ni.

⁴ Vanaa co kɔlan piɔmnda sooloo-a nda, mɔnɛi daama nda co handɔɔ o mɔnɛi ndɛi coo ni. Kɛ ya ya, i solulnin piɔmaa kan sálàla makòólan lɔ́ɔ́-lɔ́ɔ̀ le, o co vɔ bɛɛ le diola ndalan piɔlɔɔ a sondo nuu le!

⁵ Nɔm Mɛlɛka co kɛ́ nuu ni, nɔm co tɔnɔ nuu ni, yoomu nuu co nɔm o ba.

⁶ Ɲɛ ya sɔla nɔm o ba-o co bɔɔ ɲɛ kɛndɛ bɛndu, kɛ́ kɛndɛ-kɛndɛ nɛŋi ya kɔllo-o o co ni.

⁷ I mel nɔm Mɛlɛka balika, Ndu co vana ni silaa ni. Hali icɔl, kɔl nuu co ya ken pɛɛkoo.

⁸ I co Mɛlɛka mɛɛndanndo ya o hɔl tuŋ, le tùú o co ya o ba kɛndɔɔ coo-o, i siɛla le.

⁹ Lelan, kɔlkɛndɔɔ pɛ ya o kɔl, i co kponyoo viovɔɔ o yoomu nuu nin, dialun nun bɛɛ n connun n pɛngiaa fɛɛ.

¹⁰ Kani nɔm Mɛlɛka, a melnin ya kɔlan ciee-piɔ́m te, a cɛlnin mì ya vana lo lediom coo a nɔm-ndo tol o sɛiyo nin te.

¹¹ A cɔmnin ya nɛila ke vana yoomoo lan. Vana komal kɔlkɛndɔɔ taw nɔm o hɔl, ɲɛ yeelɛi fɛɛn-fɛɛndo co nɔm o ba kɛndɔɔ coo.