Condii lisai 148 - BII BILA

Biiloo co le Hala co o halataala a o lɛŋnden coo-o

¹ La lisa Mɛlɛka, la biilu ndu o halataala. La biilu ndu coocoo.

² Niaa mɛlɛkaa ndɔa kpow, la biilu ndu, niaa vanaa ndɔa cɔwva kpow, la biilu ndu.

³ Niaa paalen a paangei, la biilu ndu, niaa loeon co ɲɛ-tengaa yɔngoo-on kpow, la biilu ndu.

⁴ Niaa halataala coocoo, la biilu ndu, niaa mɛmma co o halataalaa coo-an, la biilu ndu.

⁵ Màá ɲɔɔn mun kpow n biilu Mɛlɛka! Kani ndóò sɔɛi dɔ́ɔ́, mí n cɔawnun.

⁶ O cii mun kɛsi o fondalan le lɔ́ɔ́-lɔ́ɔ̀, o hendu mun tɔŋndo, tɔŋ vana kpeeŋianin too.

⁷ La lisa Mɛlɛka, niaa vanaa co cɔnɔnndo o lɛŋnden coo-a, niaa ɲaa yoomaa tɔɔmaa bɛndua co o mɛmndan bɛngu di-a a niaa co o mɛmma ihɛllan bɛngu-a kpow.

⁸ Niaa yinnden, piɔɔ loeon deliaa, piɔɔ mɛmma n'kpungbaa, yumbuyumboo a hoeyii fùkù-fùkùei, niaa co sɔɔn ndɔn biyɔɔ-a pɛɛn,

⁹ niaa pembun bɛndon a pembun pɔmbɔn kpow, yɔmii koamɛi a sɛɛdrei kpow,

¹⁰ visia yondoa a visia cieeninnda kpow, niaa visia pɔm-pɔmbɔa kela lɛŋ-nda a yovaa can coocoo-a kpow,

¹¹ niaa masaa co o lɛŋnden coo-a a vanaa-mangalaa-isɔɔa kpow, simlacia a vanaa kialaa n'yamaa co o lɛŋnden coo-a kpow,

¹² niaa langbaa felengia piaandua a à laandua, bɛndua yuuvɛiya a cuaambɔa,

¹³ la lisa Mɛlɛka. Kani diola ndɔlan kínɛí vana sangala ni, naŋɔɔ ndɔɔ co o tivaa o lɛŋnden coo a o halataala.

¹⁴ O yɔngu vanaa ndɔa yoomuan, mo tosa mà cua bollen. Lelan vanaa lo o lediom coo o cuavaa Israɛlla tɛɛn-nda kpow a co ndu lisaa o condon nin ni, vanaa co ndu kan ikɛi-ya pɛɛn. La lisa Mɛlɛka!