Condii lisai 146 - BII BILA

Mɛlɛka co vanaa nɔ mayoomu le-a kandaa

¹ La lisa Mɛlɛka! Kɔl nuu sei, lisa Mɛlɛka.

² Tuma ya vanin yoomu-o kpow bɛngu, i vanin balan lɔɔ, o ceen nuu nin kpow, i vanin condon solio le Mɛlɛka lisaa.

³ La tiindan vanaa kpaayaa co o ceendo ho coo-a le, vanndacieea daama nda co ni, a tiwba mà ciindiaa vana le.

⁴ A vi dɔ́ɔ́ pɛ, a muungu o puuloo nin, fɔ́ɔ́fɔ̀, tuula ndalan la tambun.

⁵ Duaa co le vanaa Hala Yakɔb-o co malaa-a, a co ndu tiindanndo-a pɛɛn.

⁶ Mɛlɛka cɔw halataalaa ni, lɛŋnden, mɛmma ihɛllan a ɲɛm co lenin-ndon kpow, Mɛlɛka lo o lediom coo lɔ́ɔ́-lɔ́ɔ̀-o o co ni.

⁷ O co vanaa co o sangaa nin-nda dɛnɛ sandaa tosallo, mo va vanaa yiyan ma co nɛiyo-a baloo keo. O co vanaa co o kaasoo-a hɔ́ɔ́yɛi yɔngoo.

⁸ Mɛlɛka co vanaa sumɛiya hɔltan kumbio, o co vanaa co a tundan-nda mingio isisi, o kaola vanaa sandaa.

⁹ Mɛlɛka nɔ hɔlten vanaa co o lɛŋnde isumialten nin-nda coo, o co vana pɔnɔ ndɔ vi-o a vííyo malaa, kɛɛ tɛɛmbuuo o tɛɛmbuu nɛila vanaa yɔŋ vɔɔnda ni.

¹⁰ Mɛlɛka co masa fɛɛn-fɛɛndo ni. Niaa vanaa co Siɔn-nda, ndu co Hala niaa le lɔ́ɔ́-lɔ́ɔ̀ ni. La lisa ndu!