Condii lisai 145 - BII BILA

Masale fɛɛn-fɛɛnnden masale Mɛlɛka len le co ni

1 Condii lisai, í fula o condun David-on nin-nde.

¹ Condii lisai, í fula o condun David-on nin-nde. Hala nuu, masa nuu, i yeema mì lisa nɔm, mì sina kɛndɛi nɔmnde le lɔ́ɔ́-lɔ́ɔ̀.

² I vanin nɔm lisaa lɔ́ɔ́-lɔ́ɔ̀, i vanin diola nɔmndan sangalaa tuŋ.

³ Mɛlɛka co o bɔɔ, mɛɛ mì vana lisa ndu, vana tiwba bɔɔbɔɔyɛi ndɔɛi sinaa le.

⁴ Lambi oo lambi cɔmnin o koma hunnin ndu kɔɔli-o dɛnnda ndu Mɛlɛka tosa lan, o cɔmnin lambi kon dɛnnda ndɔla kaamaalan.

⁵ I yeema mì soo a biilu bɛndu masale nɔmnden le nɔ-o o kɔɔ, mì keela kɔllo o dɛnnda kaamaala nɔmndan coo.

⁶ Vannda soaanin a kpaaya bɛndu n nɔ-o o kɔɔ, mì ya koni cɔm dɛnnda bɛndula n tosa lan.

⁷ A lisanin kɛndɛi nɔmnde, mà soli condun ɲaalon a sandii nɔmnde o kɔɔ.

⁸ Mɛlɛka nɔ kɛndɛi, o nɔ vɛlɛ ɲííye, o yala kɔl fula le, o nɔ kaolaa taw.

⁹ Vana kɛndɔɔ Mɛlɛka co le vanndacieea kpow ni, o kaola ɲɛm o cɔw-von kpow.

¹⁰ Màá vanaa n cɔw-va kpow a lisa nɔm Mɛlɛka, mì vanaa lo o lediom coo-a mel nɔm balika!

¹¹ Màá a soo a biilu masale nɔmnden o kɔɔ, mà cɔm dɛnnda kpaayala nɔmndan!

¹² O kon, a cɔmnin vanndacieea dɛnnda kpaayala nɔmndan a biilu bɛndu masale nɔmnden le nɔ-o.

¹³ Masale nɔmnden le nɔ lamɛɛlu le, sul nɔmndo vanin le fɛɛn a fɛɛn. Mɛlɛka lo o lediom coo-o n co ni, naŋɔɔ nɔmndo co o ɲɛm n cɔwvon nin kpow.

¹⁴ Mɛlɛka co vanaa co delɔɔ-a kpow malaa, o co a co a tundan-nda kpede mingio isisi.

¹⁵ Nda kpow a co nɔm tofaa, a co nɔm cumndo ma ke nda baloo o telen bɛnda-o.

¹⁶ A kumbi pɛ baa, a ke ɲaa yoomaa o nda yeema-o.

¹⁷ Mɛlɛka sandu o nɛila ndɔlan kpow coo, o lo o lediom coo o dɛnnda o co tosaa lan kpow nin.

¹⁸ Mɛlɛka co vanaa co ndu piɛiyo-a kpow macɛlu, a co ndu piɛiyo a kɔlta ndalan kpow-va pɛɛn.

¹⁹ O co vanaa nɔ siòòŋii ndɔɛi-ya o nda yeema-o yɔngoo, o co cɛɛŋɔnnda ndalan tuieyɔɔ mo va nda ciindiaa.

²⁰ Mɛlɛka co vanaa kaola ndu-a kpow kandaa, kɛɛ, o co vanaa yɔŋ vɔɔnda kpow tɛɛmbuuo.

²¹ Éé Mɛlɛka! I lisanin nɔm o condon nin. Màá ɲɛm co yoomu-on kpede n va nɔm balikaa mello lɔ́ɔ́-lɔ́ɔ̀, nɔm Hala diandaa!