Condii lisai 144 - BII BILA

Piɛile masaa piɛi len

1 Condii fula o condun David-on nin-nde.

¹ Condii fula o condun David-on nin-nde. I mel Mɛlɛka, o co pow kpova nuu-o balika, ó pɛɛku ya cɔwvo, mó toosiaa ya le cɔlɔbaa-o.

² Ndu co ya kandaa ni, kpaki nuu, nɛɛ nia viannannda, vana baŋaa nuu, kɔ̀ɔ̀ cɔw co ya kandaa-o, o ndu nin ya viannun ni. Ndu kɛ́si vannda kpow ya o labɛngunin ni.

³ Nduyɛ, yɛɛ nɛ co yɛ vanacieo, mì nɔm Mɛlɛka yiyan ndu coo, te kon te, po vanacieo, le buulanndo a ndu o kɔɔ?

⁴ Vanacieo co macoaa maa ihoei, yoomu ndɔɔ co macoaa maa vundule hiavan.

⁵ Éé Mɛlɛka! Nangu halataalaa, mà tol, pilan pembon, mì kumnde i fula.

⁶ Soli piɔɔ-volia, mì yaamɔɔa piɔl, vuu kɔɔn nɔmndon nɛɛ-nɛɛ ka, mà sɛŋin.

⁷ Siɛndi ba nɔmndo nɛɛ n co o halataala-a, mà ciindiaa ya, baŋa ya, soli ya o mɛmma bɛnduan nin, mà puu ya mialla o ba,

⁸ a dimi kan sɔɔn lacòòvan, a peelu kpemala ndalan te-a pɛɛn.

⁹ Éé Hala, i yeema mì solul nɔm condii sɛnɛiye, mì lisa nɔm a banga nɔ yoei tɔ́-o.

¹⁰ Nɔm Hala co masaa malaa ni, nɔm baŋa David, vana baala nɔmndo o mɔɛi cɔwve bɛngu-o.

¹¹ Ciindiaa ya, mà baŋa ya mialla o ba, a dimi kan sɔɔn lacòòvan, mà mɛnan, a peelu kpemala ndalan te-a.

¹² Màá poaa naa va maa tɔlɔɔla vul mì la sandu sakpo o tasendɔ lan! Màá cuavaa naa laandua va maa sungbuma nda ŋɛmiŋɛmiaa o cɛi lemasaa nin-ndan!

¹³ Màá kondala naalan la va lapiaa lan a ɲɛm kɛndɛn súú-súù ka! Màá cɔlua naa pɔmbɔa kui taw-taw, mà kui háá vaalan a vaalan o yondola naalan nin!

¹⁴ Màá a bɛndua naŋ, mà luɛi cuɛiyan! Màá kpakila naalan la buuluu, mì la tɛɛndiaa le! Màá a kɔa lɛ a naa o biyɔɔ nin, mì caŋnda imɔnɔlan la fula naa tɛɛn te!

¹⁵ Duaa co le vanaa dɛnnda kɛndɛlan ndan la komalnin-nda! Duaa co le vanaa Mɛlɛka co Hala ndaa-a!