Condii lisai 140 - BII BILA

Piɛile vana nda co sɔɔn hɛɛnduuo coo len

¹ Condii David-e, í fula o condun simlacinɔ vanaa n'condua nin-nde.

² Éé Mɛlɛka! Baŋa ya vanaa yɔŋ vɔɔnda o ba, kanda ya le vanaa kɔlvesɛiya.

³ Yiyannda tosaa dɛnnda vɔɔnndan kínɛí nda nɔ o lakɔl ni, lepalaa o lepala, a co vannda kuello a sɔngɔlan.

⁴ Diɛɛmui ndɛi i co siembulu-siembulu maa diɛɛmui n'kɛw, lólòla hɔ̀ɔ̀lɔ́a la co nda o lasondo ni.

⁵ Mɛlɛka, mal-la vanaa yɔŋ vɔɔnda o ba le, kanda ya le vanaa kɔlvesɛiya, a co kan yiyanndo le ya malɔɔ daama-a pɛɛn.

⁶ Vanaa yongaa cii yaŋɔɔlan handɔɔ ya laci, a yaŋ ya a yoei mà yaŋ ya a yalalan, A yaŋ yaŋɔɔlan o nɛiyo coo.

⁷ Kɛ mí dimul Mɛlɛka aa: «Nɔm co Hala nuu ni. Tuei piɛile ya co a cɛɛŋɔnndo nɔm o lani len!

⁸ Éé Mɛlɛka! Nɔm Maalii nuu, Nɔm kpaaya co ya ciindiaa-o, a cɛw bolle nilen o cɔwvo bɛngu.

⁹ Cɛ̀l mì vanaa kɔlvesɛiya tosa hɛnan ndaa a ya le, cɛ̀l mì tuula ndalan la bɛnda le, Mɛlɛka, yɔŋii nda soo yongaa.»

¹⁰ Màá dɛnnda vɔɔnnda vanaa co ya simullo-a la muungu nda pila o lebol!

¹¹ Màá dɛngulta sɔngɔɲɔnndan la deli nda coo! Màá a kɔ o yinnden nin, o soon yingilaa nin, nɛɛ nda cen ndɛnin lɔ́ɔ́-lɔ́ɔ̀ le-a!

¹² Màá vanaa hɛɛnduu caanda sɔɔn vɔɔnndon coo-a cuu o lɛŋnden coo, mì dɛnɛ palaa tol vanaa yɔŋ vɔɔnda coo!

¹³ I sinà maa Mɛlɛka kenin vanaa dɛnɛ palaa co coo-a dí, o tosalnin vanaa co o mɔnɛi nin-nda dɛnɛ sandaa.

¹⁴ A toɲa, vanaa laalannda lisanin diola nɔmndan. Vanaa sandaa vanin nɔm o hɔl.