Condii lisai 139 - BII BILA

Nɔm Mɛlɛka, a sina ya ɲɛkɛndɛi

1 Condii David-e, í fula o condun simlacinɔ vanaa n'condua nin-nde.

¹ Condii David-e, í fula o condun simlacinɔ vanaa n'condua nin-nde. Éé Mɛlɛka! A cii ya taasi dɔvɔɔ, a sinà yiyan co ya o kɔl nin di-o.

² A sinà telen ya cal-lo, a sinà vɛlɛ telen ya can-ndo, a lo levil pɔɔli, mà sinà yiyan nuu.

³ A sinà telen ya fula-o, a sinà vɛlɛ telen ya hinio, a sinà nɛila ya co kelaa coo lan kpow.

⁴ Lɔ́ɔ́ pá mì sɔɛi tiiya ya o lediɛɛmu, a sinà pɔɔ ɲɛ ya co dimi-o.

⁵ A cii ya balɔɔ sɔ́, a co ya laci, a co ya kɔɔli, ba nɔmndo co ya coo.

⁶ Dɛnɛ sinaa vaa lende hiow ya naŋɔɔ o hɔl, o hiow ya, i tiwba mì bii ndu bila le.

⁷ Kuɛɛ nɛ ya kɔa yɛnin, kɔl nɔmndo co lon te? Kuɛɛ ya kɔa yɛnin vionnɔnndo nɔm levil, mà kɛɛ ya cɔ?

⁸ Te i hel pɛ o halataalaa nin, a co lon, te i hini pɛ ciee-piɔ́m, a co lon.

⁹ Te i cɛn pɛ o kumbanndan nin idii, mì kɔɛ háá nɛɛ paalen le can-nda, te kon te mì cal nɛɛ le del-la,

¹⁰ lon bɛɛ, mɛɛ mà bii ya baa, mà sim ya laci. Ba kɛndɛ nɔmndo biinin ya ɲɛkɛndɛi.

¹¹ Te i dimi pɛ aa: «Màá ɲumndan ma kumbu ya, mi ɲɛ-tengaa balu ya-o siŋnun ɲumndan»,

¹² ɲumma man ma siŋnun ɲɛ-tengaa le nɔm, ma siŋnun nɔm o hɔl maa ipala, ɲumndan-ou, paalen-ou, ɲɛ pilɔɔ kpé kon co nɔm o hɔl ni.

¹³ Nɔm cɔw ɲɛm co ya nin-ndon ni, nɔm mɔɔsiaa ya kala nuu o dembe ni.

¹⁴ I mel nɔm balika, kani a caa bɔɔ ya cɔvɔɔ, dɛnnda nɔmndan la naŋ, i sina ken ɲɛkɛndɛi.

¹⁵ Telen n va ya cɔvɔɔ o vionnɔnndo nin, ma va ya mɔɔsiaa kala nuu o dembe-o, dialun nun n ve n vianaa le nɔm te.

¹⁶ Telen yáà nɔ vɔ bɛɛ hɔlaa ivanacieeya loo, nɔm óò cii nin ya cɔ. Dialun nun mún cownún-ndɔ le, ma sɛva pɔɔ palɛi kelun le yoomu nuu-e o sɛbɛ nɔmndo nin.

¹⁷ Éé Mɛlɛka! I tiwba yiyannda nɔmndan kɔlɔɔ sinaa le, la hiow ya ba.

¹⁸ Te i cɔm lan pɛ, la hiow sióónndon, hali i cɔm lan bɛɛ a kɔlkalu nuu kpede, i cii lan sina le.

¹⁹ Kpòkóó Hala, te nɔm óò tosa pɛ mì vanaa yɔŋ vɔɔnda kpow ndáà vi! La faŋan ya ikɛi, niaa vanaa diuvaa n'vannda ha!

²⁰ A co sɔɔn vɔɔnndon dimio a nɔm o lasondo, yaamɔaa nɔmnda co diola nɔmndan cɔ ɲɛ-ɲɛ le.

²¹ Vanaa nɔ nɛyɔnndo a nɔmnda hɛnan ya le, i yeema bɛɛ mì ce vanaa co nɔm simullo-a le.

²² Vanaa kan nɛinun ya bɔɔ, a siŋnun yaamɔaa nia.

²³ Dɔw ya taasi Hala, mà sina yiyan co ya o kɔl-lo. Tosa fula kɔɔlio, mà sina buulannda co ya o kɔl-tan.

²⁴ Tofa te o nɛila vɔɔnndan coo ya co kelaa ni, ma yɛɛ ya o nɛi cinda fɛɛn-fɛɛndo coo.