Condii lisai 137 - BII BILA

Babilɔn o peo kɔngɔ

¹ N va icali Babilɔn o peo kɔngɔ, mí n yiyan a Siɔn o kɔɔ, mí n tundun caŋndan.

² Mí n lɛɛnduu bangala naalan o yɔmii va lon-nde.

³ Mí vanaa ndáà kɔɛ a naa o biyɔɔ nin-nda va naa dimullo le condon solio. Mí vanaa va naa delɔɔ coo-a va naa baŋɔɔ le condun ɲaalon solio, ma va dimio aa: «La solul naa condei ipilɛ fulaa Siɔn!»

⁴ Kɛ vɛ̀ɛ̀ naa n looku yɛnin condii Mɛlɛka-e ipilɛ solio o lɛŋnde isumialten nin?

⁵ Yerusalɛm, te i pɔɛɛnun pɛ nɔm, mɛɛ maa ba kɛndɛ nuu vu!

⁶ Màá sondoo vesa ya, te i ve lɛ loonɔn a nɔm o kɔɔ, mà siŋnun ɲɛ yɔngu ya ɲaaloo o kɔl ɲɛkɛndɛi-yo le!

⁷ Éé Mɛlɛka! Loonun ndɔ ɲɛ Edɔmnda va dimio paale vannda del Yerusalɛm coo len aa: «La puusiaa ndu, la puusiaa ndu háá nɛɛ o kilan tum-nda!»

⁸ Nɔm Babilɔn yɛ, a co hunɔɔ itambu sunsun! Màá vanaa kan a sɔla dɛnɛ kɛndɔɔ, a mingulnin nɔm dɛnɛ palaa n tuisi hoo naa coo-o-a pɛɛn! Màá a pala nɔm mɛɛ n tosa a naa yɛ!

⁹ Màá vanaa biwnin cɛlɛkpɛa nɔmnda, má pesipesi nda a powtan-nda a sɔla dɛnɛ kɛndɔɔ!