Condii lisai 119 - BII BILA

Éé Mɛlɛka! Tɔŋ nɔmndo co ya ɲaaloo yɔngoo o kɔl

¹ Duaa co le vanaa co kelaa o nɛila sandaalan coo a o tɔŋ Mɛlɛka-o coo-a!

² Duaa co le vanaa co silala Mɛlɛka lan biyɔɔ mà va ndu nuwviaa a kɔlta ndalan kpow-va.

³ A co dɛnɛ vɔɔn tosa le, kɛ a co kelaa o nɛila Hala lan coo.

⁴ Nɔm Mɛlɛka, a cii nɛilan cɔm, la naa n bɛnda mì n kela coo lan.

⁵ Màá kela nuu bɛnda, mì bii silala nɔmndan!

⁶ O kon, i canin tɔŋnda nɔmndan kpow, mì bii lan, siɛmbula biinin ya le.

⁷ I sangalanin nɔm a kɔl nuu kpede, o tɔŋnda nɔmnda sandaalan pɛɛkoo nin.

⁸ I yeema mì bii tɔŋnda nɔmndan, yamnun ya le!

⁹ Vɛɛ nɛ langbanɔ felengoo looku yɛ mo va o diandaa nɔm Mɛlɛka o hɔl? Mɛɛ mo bii sɔɛi nɔmnde.

¹⁰ I co nɔm nuwviaa a kɔl nuu kpede, cɛl mì kpakpala tɔŋnda nɔmndan te.

¹¹ I mandannin sɔɛi nɔmnde ya o kɔl kpan yɔŋii ya cua hakio a nɔm.

¹² Balika Mɛlɛka, má pɛɛku ya hɛnan nɔmndo.

¹³ I co tɔŋnda fula nɔm o sondo lan kpow dimio.

¹⁴ I co ɲaaloo dɔwnɔnndo o tɔŋnda nɔmndan biyɔɔ nin vana ca ko aa bolofaa taw co ya o ba ni.

¹⁵ I co kɔllo keeliaa o silala nɔmndan coo, mì va kelaa o nɛila tɔŋ nɔm kon co ya cɔmndo lan coo.

¹⁶ I co ɲaaloo dɔwnɔnndo o silala nɔmndan biyɔɔ nin, i pɔɛɛnunnin sɔɛi nɔmnde le.

¹⁷ Vana baala nɔmndo ya co ni, tosal-la dɛnɛ kɛndɔɔ mì viow yoomu, mì bii sɔɛi nɔmnde.

¹⁸ Kumbi ya hɔlla mì ce dɛnnda kɛndɛla tɔŋ nɔmndo.

¹⁹ Miallo ya co o lɛŋnden coo ni, vin ya tɔŋnda nɔmndan te.

²⁰ Yeemɛi co ya bɔɔ o kɔl o telenndan kpow nin le tɔŋnda nɔmndan biyɔɔ.

²¹ A kɔngɔlan vanaa yongaa dɔwnun danga-a, a co tɔŋnda nɔmndan kpakpalaa ma va lan kɔlan levilvil-la pɛɛn.

²² Faŋa ya bɛɛle tambɛilen a siɛmbulan coo, kani i co tɔŋnda nɔmndan biyɔɔ.

²³ Simlacia cal bɛɛ nɛɛ pilɛ le ya dúmbóó yiiyo, ya vana baala nɔmndo, i co kɔllo keelaa o hɛnan nɔmndo coo.

²⁴ O tɔŋnda nɔmndan nin ya dɔawnun ɲaale ni, lan la co ya silaa ni.

²⁵ Puuloo dialun nun co ni, ke ya yoomoo mɛɛ n yii kpemaa yɛ.

²⁶ I cɔm nɔm nɛila nilan, má mulul-la, pɛɛku ya silala nɔmndan.

²⁷ Cɛl mì bii o tɔŋnda nɔmndan la co ya pɛɛkoo-o bila, o kon, i keelanin kɔllo o dɛnnda kaamaala nɔmndan coo.

²⁸ Kɔl nuu co sangaa a mɔnɛi, luei ya yoomuan mɛɛ n yii kpemaa yɛ.

²⁹ Faŋa ya o nɛila vɔɔnndan coo, mà tosal-la kɛndɛi, mì kela o nɛila tɔŋ nɔmndo coo.

³⁰ I hɛli nɛi toɲaa, mí kɛsi kɔllo o tɔŋnda nɔmndan coo.

³¹ Éé Mɛlɛka! I holnun tɔŋnda nɔmndan, tuisi ya siɛmbulan te.

³² I co kelaa o nɛila tɔŋ nɔmndo coo, kani a ke kɔl nuu pɛngio.

³³ Éé Mɛlɛka! Cɔm ya mɛɛ ya kela yɛ, haliko mi lo lecoo le lɔ́ɔ́-lɔ́ɔ̀.

³⁴ Ke ya kɔlkaloo mì bii tɔŋ nɔmndo, mì bii ndu a kɔl nuu kpow.

³⁵ Yɔɔ ya o nɛi n yeema mì kela-o coo, kani o nɛi kon coo ya dɔawnun ɲaale ni.

³⁶ Kɛsi kɔl nuu o pɛɛkula nɔmndan coo, kɛ o va o ɲɛm fondon sɔlaa coo le.

³⁷ Tosa mì faŋa hɔlla ɲɛm fondon kɔɔli, mì tosa hɛnan nɔmndo.

³⁸ Peelu kpemaa n yiilu ya vana baala nɔmndo-o, o n yii le vanaa nɔ siòòŋii nɔmnde-a-o.

³⁹ Faŋa bɛɛle tambɛile ya co vou len ya coo, kani tɔŋnda nɔmndan la naŋ.

⁴⁰ Yeemɛi co ya bɔɔ le tɔŋnda nɔmndan biyɔɔ, ke ya yoomoo mɛɛ sandii nɔmnde co yɛ.

⁴¹ Éé Mɛlɛka! Màá kaola nɔmndo a cinda nɔmndo tol-la coo mɛɛ sɔɛi nɔmnde dimi yɛ!

⁴² O kon, i mululnin vana co ya bɛ̀ɛ̀lan tɛɛmbuuo-o, kani i tiindan sɔɛi nɔmnde.

⁴³ Soli ya sɔɛi nɔmii toɲɛi o sondo le, kani i laalan tɔŋnda nɔmndan.

⁴⁴ I vanin ndan biyɔɔ lɔ́ɔ́-lɔ́ɔ̀ a le fɛɛn a fɛɛn.

⁴⁵ I vanin kelaa o kɔlɲuloo nin, kani i co tɔŋnda nɔmndan biyɔɔ.

⁴⁶ I diminin tɔŋnda nɔmnda lan masaa o hɔl, siɛmbula biinin ya le.

⁴⁷ I co tɔŋnda nɔmndan kaolaa, i co a ɲaaloo le lan biyɔɔ.

⁴⁸ I co piɛilen bala heelaa, i yeema mì keela kɔllo o hɛnan nɔmndo coo.

⁴⁹ Yiyan sɔɛi nɔmii n dimul vana baala nɔmndo-e, kani a ke ya laalanndo.

⁵⁰ Kɔlkɛsiaa ya co sɔlaa o sanga nuu nin-ndo co kon ni, kani kpema nɔmndo co ya yoomoo keo.

⁵¹ A mamɔɔ vanaa yongaa co ya-o kpede, i co tɔŋ nɔmndo kɔɔ mulul te.

⁵² Éé Mɛlɛka! I loonun mɛɛ n kelu yaman lɔ́ɔ́ kon mí sɔla ɲɔɔloo yɛ.

⁵³ Ɲɔɔ co ya palaa taw le malɔɔ vanaa yɔŋ vɔɔnda co tɔŋ nɔmndo-o.

⁵⁴ Nɛɛ-nɛɛ ya cal pɛ isumial, o silala nɔmndan coo ya condu ni.

⁵⁵ Àá Mɛlɛka, i co diola nɔmndan loonɔnndo icɔl le tɔŋ nɔmndo biyɔɔ.

⁵⁶ O co le ya o yoomu nuu nin kpow-vo, ndu co silala nɔmndan biyɔɔ ni.

⁵⁷ Mí dimi aa: nɔm Mɛlɛka co o nuu ni, i cii tuu le sɔɛi nɔmnde biyɔɔ.

⁵⁸ I co nɔm nuwviaa a kɔl nuu kpow, tuinun ya iɲíí mɛɛ n yii kpemaa yɛ.

⁵⁹ I keelaa kɔllo o nɛila nɔmndan coo, mí kela o tɔŋnda nɔmndan coo.

⁶⁰ I co keleŋaa, i yangaanin le silala nɔmndan biyɔɔ le.

⁶¹ Hali vanaa yɔŋ vɔɔnda yiw ya bɛɛ o yoei, i pɔɛɛnunnin tɔŋ nɔmndo le.

⁶² Di-tɛɛndo, i cɛn, i mel nɔm balika le tɔŋnda nɔmnda sandaalan.

⁶³ Vaanaa co nɔm bɛɛlen keo-va a vanaa co silala nɔmndan biyɔɔ-a kpow, caan nda ya co ni.

⁶⁴ Kpòkóó Mɛlɛka, kaola nɔmndo pɛ cá o lɛŋnden coo, pɛɛku ya hɛnan nɔmndo.

⁶⁵ Éé Mɛlɛka! Tosal-la vana baala nɔmndo kɛndɛi mɛɛ n yii kpemaa yɛ.

⁶⁶ Pɛɛku ya sinapɛngoo mì sina tɔŋnda nɔmndan, kani lan ya laalan ni.

⁶⁷ Lɔ́ɔ́ pá mì siɛmbulan la hun bii ya, i va pɔwlan, kɛ sunsun nin, i co sɔɛi nɔmnde biyɔɔ.

⁶⁸ A naŋ, dɛnɛ n co tosaa-o naŋ vɛlɛ, pɛɛku ya hɛnan nɔmndo.

⁶⁹ Vanaa yongaa va ya bɛɛ sɔɔn lacòòvan hɛɛnduuo coo nuaa, ya ya, i co silala nɔmndan biyɔɔ a kɔl nuu kpede.

⁷⁰ Sɔɛi luei nda o lakɔl te, a nɔ yiyan te. Kɛ ya ya, i co ɲaaloo dɔwnɔnndo o tɔŋ nɔmndo nin.

⁷¹ Sanga ya sanga-o yɔŋnun dɛnɛ kɛndɔɔ le ya, o pɛɛku ya hɛnan nɔmndo.

⁷² Tɔŋ fula nɔm o sondo-o hiow ɲamaa le ya a ɲɛm cɔwnun a sianion a á volion taw-von.

⁷³ Bala nɔmndan la cɔw ya ni, mí la ke ya yoomuan. Ke ya niko kɔlkaloo, haliko mi pɛɛku tɔŋnda nɔmndan.

⁷⁴ Vanaa nɔ siòòŋii nɔmnde-a co ya cɔu ma va ɲaaloo dɔwnɔnndo, kani i laalan sɔɛi nɔmnde.

⁷⁵ Éé Mɛlɛka! I sina maa tɔŋnda nɔmndan la sandu, nduyɛ, a caa ya siɛmbulan tuisi.

⁷⁶ Màá kaola nɔmndo va ya ɲɔɔloo mɛɛ n yii kpemaa le ya, vana baala nɔmndo yɛ!

⁷⁷ Màá ɲíí nɔmnde tol-la coo haliko mi va yoomu! Kani o tɔŋ nɔmndo biyɔɔ nin ya dɔawnun ɲaale ni.

⁷⁸ Màá siɛmbulan la tol vanaa yongaa coo vofu le dɛnnda vɔɔnnda nda co ya tosallo o fondoo coo lan! Ya yɛ, i keelanin kɔllo o silala nɔmndan coo.

⁷⁹ Màá vanaa nɔ siòòŋii nɔmnde-a muungu nɔm o ibuŋ, a bii tɔŋnda nɔmndan bila-a pɛɛn!

⁸⁰ Màá kɔl nuu biandun o silala nɔmndan nin te, yɔŋii siɛmbulan la tol-la.

⁸¹ I co cumndo le cinda sɔlaa nɔm o ba, i co sɔɛi nɔmnde cumndo a tiindanndo.

⁸² I co sangaa tofaa le ciɛ́i n cua-e peeloo, i co ɲunanndo aa: «Lɔ́ɔ́ kuɛɛ n ɲɔɔlu yɛnin ya?»

⁸³ I va bɛɛ maa bɔlɔ yáw co o kumnde nin-ndo, i pɔɛɛnunnin silala nɔmndan te.

⁸⁴ Háá telen kuɛɛ vana baala nɔmndo lo yɛnin yoomu? Lɔ́ɔ́ kuɛɛ nɛ n kialu yɛnin vanaa co ya saangiaa-a iyama?

⁸⁵ Vanaa yongaa co soonndan tovɔɔ le ya, nduyɛ, o co lende le tɔŋ nɔmndo co le.

⁸⁶ Tɔŋnda nɔmndan kpow, toɲaa la co ni. Mala ya, kani vannda co ya saangiaa o fondoo coo.

⁸⁷ Ndóò lo ɲɛ-pɔmbɔ mì ndáà faŋa ya o ceendo ho coo, kɛ i mel silala nɔmndan te.

⁸⁸ Manda yoomu nuu mɛɛ kaola nɔmndo co yɛ, i co tɔŋnda fula nɔm o sondo lan biyɔɔ.

⁸⁹ Éé Mɛlɛka! Sɔɛi nɔmnde vanin le fɛɛn a fɛɛn, i vanin o halataala le lɔ́ɔ́-lɔ́ɔ̀.

⁹⁰ A lonin o lediom coo le lambilan a lambilan, a toosiaa lɛŋnden mì le sim yili.

⁹¹ Tɔŋnda nɔmndan kpow la co hau mɛɛ n dimi yɛ, kani ɲɔɔn kpede n co nɔm baalaa tosallo.

⁹² Te yáà ve ɲaaloo dɔwnɔnndo o tɔŋ nɔmndo nin te, maa yáà vinnun nin o mɔnɛi nin.

⁹³ I pɔɛɛnunnin tɔŋnda nɔmndan lɔ́ɔ́-lɔ́ɔ̀ le, kani o lan nin n co ya yoomoo yɔngoo ni.

⁹⁴ Ciindiaa ya, le nɔm ya co ni, i co tɔŋnda nɔmndan nuwviaa.

⁹⁵ Vanaa yɔŋ vɔɔnda co ya cumullo le ya diyɔɔ, kɛ i nɔ tɔŋnda nɔmndan o kɔl.

⁹⁶ O dɛnnda kɛndɛla tɔ̀lan nin kpow, mì ce pɛɛngulan, kɛ i ci lamɛɛlu o tɔŋnda nɔmndan nin te.

⁹⁷ Àá! I kaola bɔɔ tɔŋ nɔmndo, niinoo kpɛŋ, i co ndu kɔllo keelaa coo.

⁹⁸ Tɔŋnda nɔmndan la co ya kɔlkaloo keo hiovɔɔ yaamɔaa nia coo, kani la co ya ikɛi lɔ́ɔ́-lɔ́ɔ̀.

⁹⁹ I hiow vanaa co ya pɛɛkoo-a sɔɔn sinaa, kani i co kɔllo keelaa o tɔŋnda nɔmndan coo.

¹⁰⁰ I hiow bɛndua yuuviyɛiya kɔlkaloo, kani i co silala nɔmndan biyɔɔ.

¹⁰¹ I co nɛila vɔɔnndan kpow kpakpalaa o kela nuu nin, haliko mi bii sɔɛi nɔmnde.

¹⁰² I co tɔŋnda nɔmndan malɔɔ le, kani nɔm pɛɛku ya lan ni.

¹⁰³ Sɔɔn nɔmndon n yeela bɔɔ ya o lediɛɛmu, n hiow lɛan yeelaa ya o sondo.

¹⁰⁴ Tanala nɔmndan la co ya kɔlkaloo yɔngoo, lelan nɛila vɔɔnndan kpow la nɛinun ya ni.

¹⁰⁵ Sɔɛi nɔmnde i co fitina sim ya laci o kɔlan-ndo ni, ndi co ɲɛ-tengaa o nɛi nuu coo ni.

¹⁰⁶ I cii mɛnan, ɛɛ nduyɛ, mɛɛ mì tosa, i vanin tɔŋnda nɔmnda sandaalan biyɔɔ.

¹⁰⁷ Siɛmbulan la co ya bɔɔ Mɛlɛka, ke ya yoomoo mɛɛ n dimi yɛ.

¹⁰⁸ Éé Mɛlɛka! Cɛl piɛile nile ya co nɔm solullo len, mà pɛɛku ya silala nɔmndan.

¹⁰⁹ Yoomu nuu va bɛɛ o malnanndo lɔ́ɔ́-lɔ́ɔ̀, i pɔɛɛnunnin tɔŋ nɔmndo le.

¹¹⁰ Vanaa yɔŋ vɔɔnda cii ya yaŋɔɔlen hendul, kɛ i melnin silala nɔmndan te.

¹¹¹ Tɔŋnda nɔmndan la co kɛ́ ni fɛɛn-fɛɛndo ni, o lan nin ya naŋ kɔl ni.

¹¹² I mandannin tɔŋnda nɔmndan o kɔl, la vanin ya o kɔl le lɔ́ɔ́-lɔ́ɔ̀, háá o mɛɛlulan.

¹¹³ Vanaa kɔlta muuluannda hɛnan ya le, kɛ tɔŋ nɔmndo ya kaola ni.

¹¹⁴ Nɔm co nɛɛ nia viannannda a kɔ̀ɔ̀ cɔw nuu ni. I tiindan sɔɛi nɔmnde.

¹¹⁵ La faŋan ya ikɛi, niaa vanaa yɔŋ vɔɔnda ha, haliko mi tiwba tɔŋnda Hala nuu mandaa.

¹¹⁶ Bii ya mɛɛ n dimi yɛ haliko mi va yoomu, tuisi ya siɛmbulan le tiindan ya tiindan nɔm-ndo le.

¹¹⁷ Va tiindan nuu haliko mi sɔla cindaa, i nɔnin hɔlten o silala nɔmndan coo lɔ́ɔ́-lɔ́ɔ̀.

¹¹⁸ Vana-vana bii silala nɔmndan te, kɛɔ n kɛɛ ndu ni, kani palaa fúú ndu pala vana ni.

¹¹⁹ Vanaa yɔŋ vɔɔnda co o lɛŋnden coo-a kpow, a co nda viovɔɔ maa puulu sál, lelan tɔŋnda nɔmndan la hɛnan ya ni.

¹²⁰ Diallon co ya ɲiiyaa a siòòŋii n co ya lueiyo-e. Siòònde co ya a tɔŋnda nɔmndan.

¹²¹ I co dɛnɛ toɲaa a dɛnɛ sandaa tosaa, mal-la yaamɔaa nia o ba le.

¹²² Sim kpeekpei le ya vana baala nɔmndo. Cɛl mì vanaa yongaa del-la coo le.

¹²³ I co sanga tofaa le mala nɔmndo sɔlaa, i co cinda n yii kpemaa-o nuwviaa.

¹²⁴ Tosal ya vana baala nɔmndo mɛɛ kaola nɔmndo co yɛ, pɛɛku ya mɛɛ hɛnan nɔmndo co yɛ.

¹²⁵ Vana baalaa nɔmndo ya co ni, ke ya kɔlkaloo haliko mi bii tɔŋnda nɔmndan bila.

¹²⁶ Telenndo co hoo ni, Mɛlɛka, mà tosa ɲɛ pum le vanaa co tɔŋ nɔmndo tɛɛmbuuo-a.

¹²⁷ Kani tɔŋnda nɔmndan la hiow ya hɛnan a sianion, hiovɔɔ sianin diandaa diandan coo.

¹²⁸ I laalan maa silala nɔmndan kpow la sandu, nɛi oo nɛi co pɛ nɛi lakafaa, o hɛnan ya le.

¹²⁹ Tɔŋnda nɔmndan la naŋ bɔɔ, lelan ya co lan biyɔɔ ni.

¹³⁰ Vana saalun pɛ sɔɛi nɔmnde, ndu sɔla ɲɛ-tengaa, i co vanaa tuisin-nda kɔlkaloo keo.

¹³¹ I kumbi sondoo, i co sangaa, kani tɔŋnda nɔmndan la co ya yeemɛi.

¹³² Mulul-la hɔlla mà tuinun ya iɲíí, mɛɛ n dema tosa a vanaa kaola nɔmnda yɛ.

¹³³ Luei nɛila nilan yoomuan mɛɛ sɔɛi nɔmnde i co yɛ, cɛl mì haki oo haki tiw ya ba le.

¹³⁴ Soli ya vanaa co ya delɔɔ coo-a o ba, haliko mi bii silala nɔmndan.

¹³⁵ Tosal ya vana baala nɔmndo dɛnɛ kɛndɔɔ, mà pɛɛku ya hɛnan nɔmndo.

¹³⁶ Mɛmɛan ma co ya fulaa o lahɔl taw, kani vannda co tɔŋ nɔmndo biyɔɔ le.

¹³⁷ Éé Mɛlɛka! A sandu, tɔŋnda nɔmndan bɛɛ la sandu.

¹³⁸ O tɔŋndan kɛsio, má cɔm sandii nɔmnde a mɛɛ n lo o lediom coo yɛ.

¹³⁹ Ɲɔɔ co ya palaa o kɔl taw, kani yaamɔaa nia co tɔŋnda nɔmndan pɔɛɛnɔnndo.

¹⁴⁰ Vannda co fula kɔɔlio tosaa o sɔɔn nɔmndon nin kpow, kɛ ya vana baalaa nɔmndo, i kaola mun taw.

¹⁴¹ I va bɛɛ cuaambɔ nuaa mì vannda kelun ya yii, i pɔɛɛnunnin silala nɔmndan te.

¹⁴² Sandii nɔmnde co le fɛɛn a fɛɛn, toɲaa tɔŋ nɔmndo co ni.

¹⁴³ Dɛnɛ palaa a mɔnɛi co ya coo, kɛ o tɔŋnda nɔmndan nin ya dɔawnun ɲaale ni.

¹⁴⁴ Tanala nɔmndan la lonin le fɛɛn a fɛɛn, ke ya sinapɛngoo mì viow yoomu.

¹⁴⁵ Éé Mɛlɛka! I co nɔm piɛiyo a kɔl nuu kpow, mulul-la mì tosa hɛnan nɔmndo.

¹⁴⁶ I co nɔm piɛiyo, ciindiaa ya, mì bii silala nɔmndan.

¹⁴⁷ Ɲɔɔ tenga bɛɛ le, i ɲuna nɔm le malaa sɔlaa, i lo niko sɔɛi nɔmnde cumndo a laalanndo.

¹⁴⁸ Lɔ́ɔ́ pá mi ɲɔɔ tenga, i kumbi hɔlla le kɔllo keeliaa o pɛɛkula nɔmndan coo.

¹⁴⁹ Éé Mɛlɛka! Tuei ya diom mɛɛ kaola nɔmndo co yɛ, mà ke ya yoomoo mɛɛ tɔŋ nɔmndo co yɛ.

¹⁵⁰ Vanaa nɔ tuula vɔɔnndan-nda co ya sɔɔnguuo ikɛi, a co tɔŋ nɔmndo malɔɔ.

¹⁵¹ Nduyɛ, nɔm Mɛlɛka co ya ikɛi, toɲaa tɔŋnda nɔmndan kpow la co ni.

¹⁵² O co nin lɔ́ɔ́ levil, mí bii bila maa le fɛɛn a fɛɛn n kɛsi tɔŋnda nɔmndan ni.

¹⁵³ Cɔ sanga co ya coo-o Mɛlɛka, mà baŋa ya, kani i co tɔŋ nɔmndo pɔɛɛnɔn te.

¹⁵⁴ Soo le ya mà cɛw ya, kanda yoomu nuu mɛɛ n dimi yɛ.

¹⁵⁵ Cindaa co bɔɔ vanaa yɔŋ vɔɔnda levil, kani a co hɛnan nɔmndo tosa le.

¹⁵⁶ Éé Mɛlɛka! Ɲíí nɔmnde co i bɔɔ. Kanda yoomu nuu mɛɛ silala nɔmndan la co yɛ.

¹⁵⁷ Vanaa nɔ nɛyɔn nuu-a a yaamɔaa nia co sɛ́lɛ́, kɛ i co tɔŋnda nɔmndan kɔɔ mulul te.

¹⁵⁸ I co vanaa bii isɔɔ le-a tofaa a nɛyɔnndo, kani a co ɲɛ n dimio biyɔɔ le.

¹⁵⁹ Éé Mɛlɛka! Tofa vɔ, i kaola silala nɔmndan taw! Manda yoomu nuu mɛɛ kɛndɛi nɔmnde co yɛ.

¹⁶⁰ Sɔɔn nɔmndon kpow, toɲaa n co ni, silala nɔmndan kpede la sandu, la vanin le fɛɛn a fɛɛn.

¹⁶¹ Simlacia co ya delɔɔ coo fondo fúú, kɛ le sɔɛi nɔmnde kínɛí ya co ɲiiyaa ni.

¹⁶² Ɲaaloo co ya o kɔl le sɔɛi nɔmnde maa vana poonda ɲɔɔn taw o cɔwvo-o.

¹⁶³ Kafalan la hɛnan ya le, la kuisin ya bɔɔ. Kɛ tɔŋ nɔmndo ya kaola ni.

¹⁶⁴ Bɛmbɛ leŋɔmmɛw ya lisa nɔm o paalen nin ni, kani tɔŋnda nɔmndan la sandu.

¹⁶⁵ Vanaa kaola tɔŋ nɔmndo-a a co a kɔlkɛsiaa bɛndoo, ɛɛ nduyɛ, ɲɛ-ɲɛ tosanin ma boŋ te.

¹⁶⁶ Éé Mɛlɛka! Cinda nɔmndo ya co tiindanndo nuaa ni, i co tɔŋnda nɔmndan biyɔɔ.

¹⁶⁷ Yoomu nuu co tɔŋnda nɔmndan biyɔɔ, kani i kaola lan taw.

¹⁶⁸ I co tɔŋnda nɔmndan a silala nɔmndan biyɔɔ, kani a sinà nɛila ya co kelaa coo lan kpow.

¹⁶⁹ Éé Mɛlɛka! Màá tuei diom nuus! Ke ya kɔlkaloo mɛɛ sɔɛi nɔmnde co yɛ.

¹⁷⁰ Màá tuie tɛɛlɔnnda nilan, mà baŋa ya mɛɛ n tuu yɛ!

¹⁷¹ Màá cɔcɔn nun lisa nɔm, kani a co ya hɛnan nɔmndo pɛɛkoo!

¹⁷² Màá sondo nuu lisa sɔɛi nɔmnde, kani tɔŋnda nɔmndan kpow la sandu!

¹⁷³ Màá mala ya a kpaaya nɔmndo, kani silala nɔmndan ya hɛli ni!

¹⁷⁴ Éé Mɛlɛka! O ya yeema taw-vo co ni ma ciindiaa ya, o tɔŋ nɔmndo nin ya dɔawnun ɲaale ni.

¹⁷⁵ Màá i va yoomu le nɔm lisaa, mì tɔŋnda nɔmndan la mala ya!

¹⁷⁶ I co kelanndo maa saa lo-o, nuwviaa ya, ya vana baala nɔmndo, kani i co tɔŋnda nɔmndan pɔɛɛnɔn te.