Condii lisai 115 - BII BILA

Hala ndu pilɛ kpé biiloo bɛnda ni!

¹ Éé Mɛlɛka! O co naa le, o co naa le biiloo bɛnda le, kɛ nɔm pilɛ kpé, le kaola nɔmndo a le kɛndɛi nɔmnde.

² Le kɔlɔ yɛɛ vanaa-mangalaa-isɔɔa co yɛ ɲunaa aa: «Kuɛɛ nɛ Hala ndaa co yɛ niko?»

³ Hala naa co o halataala, o co hɛnan ndɔɔ kpow tosaa.

⁴ Kɛ piɔmaa nda cɔw a volion a á sianion-nda, a laba nda toosiaa nda ni.

⁵ A nɔ sondolan, kɛ a co isɔɔ le, a nɔ hɔltan, kɛ a co cɔ le.

⁶ A nɔ nilan, kɛ a co tueyɔɔ le, a nɔ milinndan, kɛ a tui ɲɛ cun te.

⁷ A nɔ balan, kɛ a co ɲɛ pilan a lan te, a nɔ pelon, kɛ a co lakɔ le, a co ɲɛ-ɲɛ dimi le.

⁸ Velanndo nda pila a vanaa cɔw nda-a. Lende koni vanaa co nda tiindanndo-a co vɛlɛ ni.

⁹ Niaa Israɛlla, la tiindan Mɛlɛka, ndu co niaa malaa ni, o co niaa kandaa.

¹⁰ Niaa yungu Aarɔn-ndo, la tiindan Mɛlɛka, ndu co niaa malaa ni, o co niaa kandaa.

¹¹ Mɛlɛka yiyannin a naa o kɔɔ, o dɔawnin naa duaa, o dɔawnin yungu Israɛl-lo duaa, mò dɔw vɛlɛ yungu Aarɔn-ndo duaa.

¹² Mɛlɛka co naa yiyanndo coo, o co naa duaa dɔvɔɔ. O dɔawnin yungu Israɛl-lo duaa, o dɔawnin yungu Aarɔn-ndo duaa,

¹³ o dɔawnin vanaa nɔ siòòŋii ndɔɛi-ya duaa, cuaambɔa a van-banaa kpede.

¹⁴ Màá Mɛlɛka tosa mì la kui, niaa a cuavaa niaa!

¹⁵ Màá la sɔla duaa fulaa Mɛlɛka o ba, Mɛlɛka cɔw halataalaa a lɛŋnden-ndo pɛɛn!

¹⁶ Mɛlɛka nɔ halataalaa ni, mó ke vanndacieea lɛŋnden.

¹⁷ O co vanvílɛ́iya le bɛnda mà biilu Mɛlɛka le, o co vɛlɛ vanaa co kɔlan ciee-piɔ́m-nda le bɛnda mà biilu ndu le.

¹⁸ Kɛ naa, n melnin ndu balika kandɔɔ sunsun háá le fɛɛn a fɛɛn. La lisa Mɛlɛka!