Condii lisai 107 - BII BILA

SƐBƐ ŊUƐƐNUNDƆƆ (Condun lisan 107—150) La mel Hala balika

¹ La lisa Mɛlɛka, kani o naŋ, kaola ndɔɔ nɔ lamɛɛlu le.

² Niaa vanaa o baŋa-a, la dimi lende, niaa vanaa o baŋa yaamɔɔa o ba-a,

³ niaa cɛn o lɛŋnde kpow nin, mó mingi niaa cuungiaa nɛɛ pilɛ-a, niaa o cuungiaa fulaa a ba paalen le can-ndo-a, a ba del-lo-a, niaa fula a ba too-a a niaa fula maluaŋ-nda pɛɛn.

⁴ Vanaa pum va kelanndo o lɛŋnde veselɛilen nin, a ve nɛi kɛ́-kɛ̀ cɔ le kɔlan calle o kobi pum nin te.

⁵ A va a yiyan, mí kolɔɔ bii nda, mí diallon n va nda vuo.

⁶ O kon, má koŋul Mɛlɛka o lani o sanga kon nin, mó soli nda lenin.

⁷ Mó cɔm nda nɛi sakpoo le kɔlan o kobi ndáà kila caltan-ndo nin.

⁸ La mel Mɛlɛka balika le kaola ndɔ nɔ lamɛɛlu loo a le dɛnnda kɛndɛla o co vanndacieea tosallo lan!

⁹ Kani o ke vanaa kolɔɔ bii-a mɛnndan, mó ke vanaa yiyan ma va nɛiyo-a ɲɛm dian kɛndɔn.

¹⁰ Vanaa pum va o ɲumndan nin a o soon yingilaa nin, dɛnɛ palaa va nda coo, a va o yɔlɔn

¹¹ le simul ndáà simul sɔɛi Hala-e-o a le kɛɛ ndáà kɛɛ silala Ó-Hiow-Ɲɔɔn-Kpow-vo lan biyɔɔ-o.

¹² O kon, mí Mɛlɛka tuisi nda sangaa coo, má deli, vana-vana mala nda le.

¹³ O sanga kon nin, má koŋul Mɛlɛka o lani, mó soli nda o mɔnɛi ken nin.

¹⁴ Mó soli nda o soon yingilaa nin, mó kilikili yɔlɔn ndan.

¹⁵ La lisa Mɛlɛka le kaola ndɔ nɔ lamɛɛlu loo a le dɛnnda kɛndɛla o co vanndacieea tosallo lan!

¹⁶ Kani o yimiyimi diola n'daɲalan, mó tɛɛmbuu sɔkɔma n'cilinndan.

¹⁷ Vanaa pum siŋnun diɔmnda le kela nda vɔɔnndo, má sɔla dɛnɛ palaa le tɛɛmbuula ndalan.

¹⁸ Mí ɲɛm dian kpede n kusulan nda, má sɔɔnguu ciee-piɔ́m macɛlu.

¹⁹ O kon, má koŋul Mɛlɛka o lani le sanga va nda kon coo-o, mó soli nda lenin.

²⁰ Mó yaa diomndo, mí diom kon kɔ singi nda, mó soli nda ciee-piɔ́m.

²¹ La lisa Mɛlɛka le kaola ndɔ nɔ lamɛɛlu loo a le dɛnnda kɛndɛla o co tosaa le vanndacieea lan!

²² La solul ndu sálàla malaalahakilan, la cɔm dɛnnda ndɔlan kpow a deŋi kɔlkɛndɔɔ.

²³ Vanaa pum va kelaa o mɛmma ihɛllan coo, a va yulalen a makola celen tosaa o mɛmma bɛndu-bɛnduan coo.

²⁴ A ce dɛnnda Mɛlɛka tosa lan, má ca dɛnnda kaamaala o tosa o mɛmma bɛnduan coo lan.

²⁵ Ndóò sɔɛi lepilɛ kpé, mí hoeyii fùkù-fùkùei i can, mí mɛnndan ma hiilun yongban-yongban.

²⁶ Mí dɛ̀ndɛ̀la mamɛnndan la hel o halataala, mí la muungu, mí la toal o mɛnndan bɛngu, mí kɔltan la laasian vanaa va lan ɲaanɔnndo-a.

²⁷ Mí hɔlla hiŋnda, má ɲiiya nákà-nàkà maa vana mamɔɛi, a sína lɛ ɲɛ-ɲɛ nda tosa le.

²⁸ O kon, má koŋul Mɛlɛka o lani o sanga nda kon nin, mó soli nda lenin.

²⁹ Mí Mɛlɛka kɛsi hoeiye, mí mɛnndan ma cal.

³⁰ Telen mɛnndan ma cal-lo, má dɔawnun ɲaale, mí Mɛlɛka yaa nda o kɔngɔ nda va kɔlan-ndo.

³¹ La lisa Mɛlɛka le kaola ndɔ nɔ lamɛɛlu loo a le dɛnnda kɛndɛla o co tosaa le vanndacieea lan.

³² La sangala ndu vannda tɛɛn, mì la biilu ndu vanaa kɔlkalua tɛɛn!

³³ Mɛlɛka veesiaa peelan ni, mò mingi lan lɛŋnde veselɛilen, mò mingi soonndan ɲɛ vesɛiyo,

³⁴ mò mingi lɛŋnde tɔlɔɔlan la naŋ nin-nden lɛŋnde ihɛlten, te vanaa co o lɛŋnden coo-a kela pɛ kela vɔɔnndo pɛɛn.

³⁵ O tiw vɛlɛ ba mò siinguu lɛŋnde veselɛilen dalaa, mì le siŋnun soonnda mɛmɛnndan.

³⁶ Mò yɛɛ vanaa yiyan ma co nɛiyo-a o fonda kon, mà tangul calta ndalan ndon.

³⁷ Mà saŋ kullon o ciɛɔn nin, mà tɔl rɛsɛnndon, mì n kom taw.

³⁸ Mò dɔw nda ndua, mà kui taw-taw, cɔlua ndaa faŋan lecoo le.

³⁹ Kɛ siɛmbulan la co vanaa pum tolɔɔ, kunda ndaa co dɔɔnanndo, dɛnɛ palaa a sangaa co nda coo.

⁴⁰ A co kɔltuw ndaa tuisio masaa coo, ma va kelanndo o lɛŋnde veselɛile nɔ lanɛi le len nin.

⁴¹ Kɛ Mɛlɛka co vana bala fondoo malaa, o co yungu ndɔɔ kuiyo maa n'cɔlu.

⁴² Vanaa sandaa co dɛnnda lan cɔw, a co ɲaaloo dɔwnɔnndo, vanaa yɔŋ vɔɔnda mei kpili.

⁴³ Vana-vana nɔ pɛ kɔlkaloo, o canin dɛnnda lan, mò sina kaola Mɛlɛka nɔ le ndu-o.