Condii lisai 104 - BII BILA

I mel Hala balika le dɛnnda o tosa lan

¹ I yeema mì mel Mɛlɛka balika! Mɛlɛka Hala nuu, a co o bɔɔ! A vownun biiloo a vanabɛnduyɛi maa doma bɛndu.

² Mɛlɛka simbulun o pangeloo nin maa o doma nin. A cii halataalaa tondɔɔ maa cɛi-kola-toandaa,

³ má kɛsi calta nɔmndan o halataala coo coocoo. Yumbuyumboo co ɲɛ ɲaanan nɔmndo ni, a co cɔnɔnndo ma va kɔlan o hoeiye nin.

⁴ A siinguu hoeiye kiilaa nɔmnda, yinnden le co vanaa baalaa nɔmnda ni.

⁵ A cii lɛŋnden kila má baŋ nden, le kpeŋan ndɛnin lɔ́ɔ́-lɔ́ɔ̀ le.

⁶ A cii len kumbɔɔ a mɛmma ihɛllan mɛɛ vana kumbu ɲɔɔ a kolaa nuaa yɛ, mɛnndan ma hel háá o pembon coo.

⁷ Kɛ nɔm Mɛlɛka deŋio, mí ma puusian, nɔm óò piɔndio, mí ma sɛŋin,

⁸ mí ma kei o pembon coo, mí ma toal o dɛngbɛla n dimul man le kɔlan-ndan nin.

⁹ A cii man pɛɛngulan kɛsul, ma tiwba hiovɔɔ lon te, ma muungu lɛnin mì ma kumbu lɛŋnden lɔ́ɔ́-lɔ́ɔ̀ le.

¹⁰ Nɔm Mɛlɛka soli peela leboltan o bóltan nin ni, la co tolɔɔ o pembon tɛɛn.

¹¹ Visia yondoa kpow co hunɔɔ kolɔɔ o peela lan, lon sofɛlɛa yondoa co bololan pɔɔliaa ni.

¹² Yowva co caltan toosiaa o mɛmma man kɔngɔ, a co caŋndo o bɔɔlan nin.

¹³ Nɔm Mɛlɛka co o calta nɔmndan nin coocoo, a co pembon pɔɔliaa. Lɛŋnden le pɛ cá a dɛnnda nɔmndan.

¹⁴ A co billo solio le cɔlua, tɔlɔɔlan le vanndacieea, haliko ma vàá, ma dɔwnun balo:

¹⁵ mɔiyan ma co nda ɲaaloo yɔngoo, cuɛiyan ma co nda hɔlla mingio ŋɛlɛngi-ŋɛlɛngi, baloo co nda kɛndia yɔngoo o n'dial.

¹⁶ Yɔmii Mɛlɛka-e i co pɔɔliaa sɔlaa ɲɛkɛndɛi, sɛɛdrii o tɔl fulaa Liban-nde pɛɛn.

¹⁷ Lon yowva co vɛɛnnde toosiaa ni, yow cɔcɔɛi vilɛiyo cii calta ndɔlan toosiaa o yɔmii siprɛsiei nin.

¹⁸ Cuinaa bandíláà co o pembun hiow helɔɔ-on coo, damannda co vionnɔnndo o powta kpovalan nin.

¹⁹ Nɔm Mɛlɛka toosiaa paangei le telenndan cɔmndo ni, paalen le sinà telen le del-lo.

²⁰ Nɔm tuisì ɲumndan ni, mì paalen le del, mì visia yondoa kpow cɛn kelaa,

²¹ mì yàlàá cɛn kuuliaa visia kɔɔli le nda biyɔɔ, mà ɲuna nɔm Hala le baloo sɔlaa.

²² Paalen le sɛ pɛ, a piɔl, a muungu, a kɔ hini o bɛ̀mɛ́lta ndalan nin.

²³ O kon kɔɔli, vanndacieea fula, a kɔɛ o valta ndalan nin, a lo baalaa háá icɔllo.

²⁴ Éé Mɛlɛka! Baalala nɔmndan la co la bɔɔ! A kɔlkalu nɔmndo n tosa lan kpow ni. Lɛŋnden le co lepiaa ca a ɲɛm n cɔw-von.

²⁵ Tofa vɔ mɛmma ihɛlma bɛnduma vana ci bɛɛ lamɛɛlu le-an man! Visia bana-banaa a á pɔmbɔa co kelaa lenin, a cuu cɔm te.

²⁶ Dɛ̀ndɛ̀lan la co kɔlan lecoo mì la va hunɔɔ, visia vueinaŋaa bɛndua n cɔw-va co pisultan lenin.

²⁷ Visia kan kpow co nɔm tofaa le nda baloo keo o telen bɛnda-o.

²⁸ Taa ke nda pɛ ndu, a de. Taa kumbi pɛ ba nɔmndo, a sɔla ɲɛm kɛndɛn nda nɔ le sɔlaa-on kpow.

²⁹ Taa vin nda pɛ hɔlaa nɔmnda, siòònde bii nda taw. Taa soli nda pɛ yoomoo niŋ, a muungu o puuloo nin.

³⁰ Taa mingi nda pɛ yoomoo o n'dial, a muungu a kiyɛi, ɲɔɔn kpow muungu n sɛnɛi o lɛŋnden coo.

³¹ Màá nɔm Mɛlɛka va sangalaa sɔlaa lɔ́ɔ́-lɔ́ɔ̀! Màá dɔwnun ɲaale a ɲɛm n cɔw-von!

³² A tofa pɛ lɛŋnden, le ɲiiya, a pilan pɛ pembon, kumnde kumbu mun kpu.

³³ Háá mì vi, i vanin Mɛlɛka lisaa o condon nin, i vanin ndu biiloo o condon nin o telen ya vanin yoomu-o nin kpow.

³⁴ Màá o cɛl piɛile nilen! Ya, i yeema mì dɔwnun ɲaale o Mɛlɛka nin.

³⁵ Màá vanaa lahakia cuu o lɛŋnden coo, mì vanaa yɔŋ vɔɔnda tambu le lɔ́ɔ́-lɔ́ɔ̀! A toɲa, i yeema mì mel Mɛlɛka balika. La lisa Mɛlɛka!