Condii lisai 101 - BII BILA

Masaa kelun o kɔl le dɛnɛ sandaa tosaa Hala o hɔl

1 Condii fula o condun David-on nn-nde.

¹ Condii fula o condun David-on nn-nde. Éé Mɛlɛka! I yeema mì condu a kaola nɔmndo o kɔɔ, mì cɔm sandii nɔmnde, mì sangala nɔm.

² I yeema mì va kela kɛndɔɔ o ceen nuu nin. Lɔ́ɔ́ kuɛɛ n hun yɛnin o ya lo? I kelanin o sandei nin vanaa naa n cal nɛɛ pilɛa o hɔl.

³ I tosanin dɛnnda sendu le lan te. Dɛnnda vanaa nɔ laalan te-a la nɛinun ya bɔɔ, i nɔ mako a lan te.

⁴ I yeema kelaa naa vanaa muluannda le, i yeema mì sina vana yɔŋ vɔɔndo le.

⁵ I kpaanin vanaa congu caaŋaa ndaa o vionnɔnndo nin-nda. I tiwnin ba kelaa naa vanaa tofa caanda tofa vɔɔndo-a le, te kon te naa vanaa yongaa.

⁶ I nɔnin vanaa sandaa co o lɛŋnden nin-nda hɔlten coo, haliko ma tosa masalen ya ikɛi. Naa vanaa co kela kɛndɔɔ-a vanin baalaa latulu ni.

⁷ Vanaa pala caanda-a celnin o ya lo cɛinin te, i yeema bɛɛ mì ce vanaa lacòòvaa a lehɔl te.

⁸ Idii oo idii, i vanin vanaa yɔŋ vɔɔŋaa co o lɛŋnden coo-a kpaa, mì faŋa vanaa tosaa dɛnnda vɔɔnnda o kobi Mɛlɛka-o nin few-few.