Condii lisai 10 - BII BILA

¹ Éé Mɛlɛka! Le kɔlɔ yɛɛ nɛ n co yɛ naa simndan levil pɔ́? Le yɛɛ nɛ n co yɛ naa vionnɔnndo o telen dɛnɛ palaa nin?

² Vanaa kɔlvesɛiya co vanaa ikɔɔa delɔɔ coo a yongaa, à co nda biyɔɔ a yaŋɔɔla nda miinguu lan.

³ Vana kɔlvesɛiyo co heelɔnndo le yeemɛi ndɔɛi vɔɔnde. O va pɛ ɲɛm ndɔn lakafan biyɔɔ, o yeow Mɛlɛka, o mam ndu.

⁴ Vana kɔlvesɛiyo co sɔɛi a Mɛlɛka, o co dimio aa: «Hala yɔŋ vana ɲɛ le tɛɛmbuu le. Hala co le!» Yiyannda ndɔlan kpow la co lan ni.

⁵ Ɲɛ-ɲɛ o co tosaa, o co simndan ndu o ba, Mɛlɛka nɔla ndu iyama kiolɔɔ le. O hul pɛ fuu, yaamɔaa ndɔa cuu o lepilɔɔ.

⁶ O co dimio aa: «Dɛnɛ palaa kɛ́-kɛ̀ co ya cum te. Le fɛɛn a fɛɛn, i co vannɔn o kandaa nin le dɛnɛ palaa.»

⁷ Sondo ndɔɔ co o piaa cá a mɛɛniaalan, a sɔɔn lacòòvan a á sɔɔn kɔlvesɛiyon. Dɛnɛ palaa a tuula vɔɔnndan koni la co ndu o sondo ni.

⁸ Ciee-lekɔɔ o sim mɛngɛlaa ni, lon o cumul vana tɛɛmbuu isɔɔ loo ni le ndu diyɔɔ. Nɛɛ-nɛɛ vana bala fondoo hiow pɛ, o hivi ndu hɔlten kɔɔli.

⁹ Mò lo cumullo mɛɛ yàlàá cumul visia o bɛ̀mɛ́ltan sondoo nuaa yɛ. Mò vennun le vana bala fondoo delɔɔ coo. O voolu pɛ ndu, o luei ndu o yala ndɔɔ nin.

¹⁰ O tundun pɛ, o bɛmnun, vanaa bala fondoa del o kpòndò ndɔɔ bɛngu.

¹¹ O kon o dimi dɔ́ɔ́ aa: «Hala pɔɛɛnun, o kumbu hɔlla, o co lɛ ɲɛ-ɲɛ cɔ le.»

¹² Éé Mɛlɛka Hala! Cɔn ma heelu baa fɔ́! Pɔɛ́ɛ́nùn vanaa co o mɔnɛi nin-nda le.

¹³ Le yɛɛ vana kɔlvesɛiyo co yɛ nɔm Hala mamɔɔ? Le yɛɛ o co yɛ dimio maa nɔm tuisinin ndu sanga coo le?

¹⁴ Nɔm pila tofa vɔ sangaa a dɛnɛ palaa co vanaa bala fondoa coo-o. Cua sɔɛi ndɛi balan tan tiɔn. Nɔm o ba vana dɛnɛ palaa sɔɔnun ni, nɔm malà vííyo ni.

¹⁵ Pesipesi vana kɔlvesɛiyo baa, saangiaa ndu le kɔlvesɛi ndɔɔ, mò faŋan nɔm o hɔl few-few.

¹⁶ Mɛlɛka co masaa le lɔ́ɔ́-lɔ́ɔ̀ ni, le fɛɛn a fɛɛn pɛɛn. Vanaa-mangalaa-isɔɔa cuunin o lɛŋnde ndɔlen coo.

¹⁷ Nɔm Mɛlɛka, a co yeemɛi vanaa bala fondoa tueyɔɔ, a co nda yoomuan lueiyo, a co nilan yaŋɔɔ o cɛɛŋɔnnda ndalan,

¹⁸ le vííyo a vana nda co bɛpɛlaa-o dí ndaa keo, yɔŋii vanaciee fula o puuloo nin-ndo hiow laci a vannda siòònde lueiyo o lɛŋnden coo.