Condii kɛndɛ-kɛndɛi 8 - BII BILA

¹ «Àá, te nɔm óò va pɛ yema ni, o kala nuu vɔsi-o pɛɛn! I va nɔm komal o bɛ́ɛ̀ mì yáà kɔɔmian nɔm, o kon vana óò pɛɛsanin ya le.

² I va lakɔ a nɔm mì yáà yɛɛ nɔm o kala nuu lo cɛinin, mì yáà kɔ pɛɛku nɔm kaolaa lon. Mí yáà koesi nɔm mɔima cun kɛndɛan, mɔima sɛnɛima fula o krenadeon nun nin-ndan.

³ Màá ba mɛl ndɔɔ va o kɛsiaa o bolle nilen bɛngu, mì ba ndɔ kɛndɔɔ ŋɔw ya ndu o ibuŋ!

⁴ Felengia laandua Yerusalɛm sei, i tɛɛlun niaa! La tíndì kaolaa le, la tíndì kaolaa le háá fɔ mi ndu pila yeema.

(Felengia laandua)

⁵ Vanalanɔ kuɛɛ co yɛ hoo fulaa o lɛŋnde veselɛilen nin, mò va hunɔɔ vanapɔnɔ o kaola-o o sɛɛŋanndo? O yɔm pomiee bɛngu ya tindi nɔm ni, nɛɛ kala nɔm cua foli nɔmndo-a. Lon o cua foli nɔmndo ni, lon o velu nɔm ni.

Kpaaya kaolaa nɔ-o (Vanalanɔɔ)

⁶ Hol-la o kɔl nɔmndo coo maa tampɔm, manda ya mì va nɔm ikɛi maa kelɛi ba n sɛva diola nɔmndan coo-e. Kani mɛɛ piɔ́mndo nɔ yoomuan yɛ, lende koni kaolaa bɛɛ nɔ yoomuan ni. Mɛɛ ciee-piɔ́m kendu nuaa yɛ lende koni paŋalaa bɛɛ kendu ni. Vana nɔla ndu tundɔɔ le. Vana ca ko yelenyelen paŋalaa aa yelenyelen leyinndo ni, yinnde fula o Mɛlɛka lo len pɛɛn.

⁷ Hali mɛmma bɛnduan mà nɔla kaolaa ɲumi le, peela bɛndulan bɛɛ la tiwba ndu mɛiyia le. Hali vanacieo pisi bɛɛ ɲɛm ndɔn kɛndɔn kpow le kaolaa piondɔɔ, pɛɛsaa koni o tuisinnin coo ni.

(Yemaa vanalanɔɔ)

⁸ N nɔ pɔmbɔ naa laandoo pum, mɛɛma pe vɔ ndu o ibuŋ te. Paale vanndo fulanin ndu kɔɔli le nɔu len, yɛɛ nɛ naa n tosa yɛnin a pɔmbɔ naa laandu kon?

⁹ Te kpakio o co ni, n cɔawnin cɛila cumulaalan lecoo a volin humbon. Kɛ te dio cɛiyo o co le vanpiaandua kpow ni, n kindanin ndu a pɛngɛi yɔm Sɛɛdre.

(Vanalanɔɔ)

¹⁰ Ya, kpakio ya co ni, maa cɛila coocoo mɛɛma nian ma co ni. I yɔŋnun ndu o hɔl maa vanalanɔ yɔngu kɔlɲuloo-o.

(Vanapɔnɔɔ)

¹¹ Salomɔn ndóò nɔ nakɔ n'rɛsɛnndo Baal-Hamɔn, mó sɔaa nakɔ kon kpalilaa cumulaa o ba. O nda tɛɛn, vana-vana va ndu volin latámán vàá pilɛ cuuo le rɛsɛŋun ndɔn.

¹² Ya ya, le ya nakɔ n'rɛsɛn nuu co ni. Ya pila co ndu mandaa ni. Nɔm Salomɔn, nɔm nɔ volin latámán vàá pilɛ, kpalilaa cumulaa nɔ volin latámán kɛmɛ lediin.

¹³ Nɔm vanalanɔ co icali o nakɔlan nin-ndo, caaŋaa naa co nilan yaŋɔɔ le diom nɔmndo tueyɔɔ. Kɛ, o bɛnda ma dimi aa:

¹⁴ ‹Vanapɔnɔ ya kaola hoo-o sei, ɲaanun, va maa púvɛ, te kon te maa kial cua o pembun ɲɛm cun kɛndɔn coo.›»