Condii kɛndɛ-kɛndɛi 7 - BII BILA

Vanlaandua a felengia laandua

¹ «Muungu nanu mbɔ̀, muungu nanu, Sulamite! Muungu nanu, muungu nanu mì n mɛɛndan nɔm! Yɛɛ niaa nɔ yɛ o Sulamite tofaa nin, maa yola condun miun o lepilɔɔ?

² Éé nɔm cua lemasaa, pelun nɔmndon naŋ bɔɔ o samtalan nin! Vana ca ko vonga nɔmndo aa yɔɔva labolo vana cɔavaa mayɔɔvaa cɔw a laba-o ni.

³ Vana ca ko pule nɔmnden aa taala kólaa tiilanndo ni, ò mɔima cun kɛndɛan ma cuu nin too. Vana ca ko dembe nɔmndo aa malun kundan bil kɛndɛ-kɛndɔɔ balu pindo-on ni.

⁴ Vana ca ko mɛɛma nɔmma miɔnndan aa kialaa cuawva nda ŋiɔn ni, vana ca man ko aa cuavaa pɛndua púvɔ́ɔ́ kom-nda ni.

⁵ Vana ca ko kɛsii nɔmnde aa cɛi coocoo cɔwnun a paa kamaa-o ni. Vana ca ko hɔlta nɔmndan aa dalalan Hɛsbɔn ni, la co o dioo Bat-Rabim ikɛi lan. Vana ca ko milin nɔmndo aa cɛi coocoo Liban ni, o muli hɔlla a ba Damas-o-o pɛɛn.

⁶ A caa bɔɔ bolle nɔmnden simi maa pembei Karmɛl. Yiinde nɔm o lebol i connun i siaŋa valan. Masaa pum kayakayan o kandela nɔmndan nin.

⁷ Éé caan ni laandoo, a naŋ bɔɔ hɔlla, a connun o kɛndɛ válán, nɔm nɛ́ŋì ya kɔllo ni.

⁸ Bandii nɔmnde cɛl nɔm maa vaw tamaro. Vana ca ko mɛɛma nɔmndan aa tamaro kpɔ̀nyɔ̀ɔ́ ni.

⁹ Lelan ya dimi ni aa: ‹I co helɔɔ o vawvo coo mì kɔ piilian tamaron koaman› Màá mɛɛma nɔmndan ma va maa kpɔ̀nyɔ̀la n'rɛsɛn, mì hoeyii co fulaa nɔm o milin-nde i naŋ cun maa cun kɛndɛ kɔmnde yɔm pomiee.

¹⁰ Màá sondo nɔmndo va maa mɔima kɛndɛ-kɛndɛ! … Mɔima kɛndɛan ma co fulaa taw le vanapɔnɔɔ ya kaola hoo-o, ma co talaa vanaa co o lɔan-nda o n'cɔcɔ.

(Vanalanɔɔ)

¹¹ Le vanapɔnɔ ya kaola hoo-o ya co ni, ndu bɛɛ, o nɔ yeemɛi ni taw.

Dɛnɛ kɛndɔɔ co o kaolianndo nin (Vanalanɔɔ)

¹² Hun n kɔ, nɔm vanapɔnɔ ya kaola hoo-o, n fula mì n kɔɛ yondoo nin, n kɔ mì n kɔ va lɔan o sɔndɔkɔltan.

¹³ O kon paalen le sɛ dɔ́ɔ́ pɛ, n kɔɛnnun o nakɔla n'rɛsɛnndan nin. N canin te rɛsɛnndon co yandɔɔ, te n co talunndan solio, te peengelan la kandu fulaa o yandɔɔ, te krenadiee bɛɛ co yandɔɔ. Lon ya kenin nɔm kaola nuu ni.

¹⁴ Mandrakɔr tiw cunndo kpow. Naa yɛ, n nɔ kɔmnde kɛndɛlen kpede naa o dio, kulun sɛnɛiyon a n'paandon co naa o dio. Le nɔm vanapɔnɔ ya kaola hoo-o ya manda ɲɛm mun ni.»