Condii kɛndɛ-kɛndɛi 5 - BII BILA

(Vanapɔnɔɔ)

¹ «I luɛi o nakɔ nuu nin, yemanndo, nɔm ya co cuaa o nɔu nin-ndo. I co mir nuu a ɲɛm cun kɛndɛn nun kiɔndɔɔ. I co vaa malɛ nuu sɔɔsiaa a lɛma nian deembuuo. I co mɔima nian a nɔnɔma nian kolɔɔ. Caaŋaa nia, la dio! La kol mɔima kaolan mì ma bii niaa.

(Caaŋaa nia) O yala vanapɔnɔ o kaola-o dioo kumbil te (Vanalanɔɔ)

² I va o malɔ, kɛ kɔl nuu va lahɔl. Diom vanapɔnɔ ya kaola-o co dioo lɔɔ nuaa ni. Ndu co dimio nuaa ni aa: ‹Kumbil-la dioo, yemanndo, caan ni laandoo, poonpoon nuu, tivɔnndo caan ni, kumbil-la dioo mbɔ̀! Kani mɔ́mndo kumbu ya bollen mɔku-mɔku, yiiŋii nii yiwnannde lindan lingili a pɔɔpɔɔma deli icɔl-lan.›

(Vanapɔnɔɔ) (Vanalanɔɔ)

³ ‹I cii nihau doma ni bɛndoo solin lekɔɔ, vɛ̀ɛ̀ ya nɔla yɛ vɛlɛ mì mingin ndu lekɔɔ? I cii nihau pelun nun pulɔɔ, bàà mi nɔɔliaa mun vɛlɛ?›

⁴ Mɛɛ vanapɔnɔ ya kaola hoo-o kei ba ndɔɔ o tɛɛngei le dio kumbio, mì kɔllo ɲiiya ya nin le ndu.

⁵ O kon, mí can le kɔlan ndu dioo kumbillo, mí mir nɔ cun kɛndɔɔ-o va cɔnɔnndo ya o laba, mó va delio tue-tue, mó can ya o n'su, mó va delio o sɔkɔle kindaa dio len coo.

⁶ Mí kumbil vanapɔnɔ ya kaola hoo-o dioo, kɛ ndóò kɔɛnnun nin, o ve lɛ o dio le. Tuma o va sɔɛi o ya lo-o, i ve o ya pila nin te few. Mí fula nuwviaa ndu, kɛ i seelun ndu le. Mí veelu ndu, kɛ o cɛl te.

⁷ Mi bɔŋan a kpalilaa cumulaa va kobio balɔɔ-a, má lɔaa ya, má booluu ya, má puu kola vaan-vaan yáà kuumbun o lebol-lo.

⁸ Felengia laandua Yerusalɛm, i tɛɛlun niaa, te la bɔŋan pɛ a vanapɔnɔ ya kaola hoo-o, vɛ̀ɛ̀ niaa dimul-lɛnin ndu kpeekpei? La dimul-la ndu aa i co a nàà kaolaa.

(Felengia laandua)

⁹ Éé nɔm felengi hiow hoo vanlaandua naŋɔɔ-o, yɛɛ nɛ vanapɔnɔ n kaola ho-o nɔ yɛ hiovɔɔ caaŋaa tɔ̀a coo? Dimul-lɔ naa hau, yɛɛ vanapɔnɔ n kaola hoo-o nɔ yɛ mò hiaw vanapɔnɔ celen kpeekpei? Le yɛɛ n co yɛ naa lambanndo tɛɛlɔnndo ho nuaa?

(Vanalanɔɔ)

¹⁰ Hali vanapɔnɔ ya kaola hoo-o va bɛɛ vannda vaalan tɔ́ tɛɛn, o pɔwnun te. Kani o co o ningilaa, kɔɔle ndɔlen le co letengaa.

¹¹ Vana ca ko bolle ndɔlen aa sianin diandan ni, yiiŋii ndɔɛi co iyiwnannde maa kɔmii vaw, i co itiŋi maa bɔɔla basabasakoende.

¹² Vana ca ko hɔlta ndɔlan aa poonpooŋaa co o peo kɔngɔ-a ni, a co pulɔnndo o nɔnɔan nin má va calle pɛngio o peo kɔngɔ-a pɛɛn.

¹³ Vana ca ko kuula ndɔlan aa fonda nda tɔl bil kɛndɛ-kɛndɔɔ-o ni. Vana ca ko cɔcɔn ndɔn aa bil nɔ yandɔɔ kɛndɛ-kɛndɔɔ-o ni, nɛɛ mir co talaa-a.

¹⁴ Vana ca ko bala ndɔlan aa kelan n'sianin nda muulian toosiaa a pow krisolite-o-on ni. Vana ca ko dialun ndɔn aa ciŋun kamaa nda kpɔlɔka ni má holi pow safir lecoo.

¹⁵ Vana ca ko pelun ndɔn aa sungbuma nda cɔw a pow humboo-an ni, ma nda tɔl tumndan o sianin diandan nin-ndan pɛɛn. Vana ca ko hɔlaa ndɔa aa pembon Liban ni. O naŋ bɔɔ maa yɔm sɛɛdre.

¹⁶ Sondo ndɔɔ yeela bɔɔ o vɔɛiyo, o hɛnan ya taw o tofaa. Lende vanapɔnɔ ya kaola hoo-o co ni, lende caan ni kon co ni, mbɔ̀ alɛ, felengia laandua Yerusalɛm!»