Condii kɛndɛ-kɛndɛi 4 - BII BILA

(Vanapɔnɔɔ)

¹ «A naŋ bɔɔ, nɔm caan ni laandoo, a naŋ bɔɔ hɔlla! Vana ca ko hɔlta nɔmndan o kola vaan-vaan n kuumbun o lebol-lo bɛngu aa poonpoonda ni. Vana ca ko yiiŋii nɔmnde aa cuinaa kundaa co pembei Kalaad tolɔɔ a kiltan ni.

² Vana ca ko ciŋun nɔmndon aa saa nda kili yiinde-a co cɔnɔnndo nɛɛ nda kɔa kolɔɔ-a ni. Mún kpow n nɔ velanndo, n'miun-miun kpede n co ni.

³ Vana ca ko cɔcɔn nɔmndon aa kɛi siaŋa sɔɔtɔtɔɔ ni. Sondo nɔmndo naŋ bɔɔ mbɔ̀! Vana ca ko kuula nɔmndan ningilaa o kola vaan-vaan n kuumbun o lebol-lo bɛngu aakrenadeon ni.

⁴ Vana ca ko kɛsii nɔmnde aa cɛi coocoo masaa David tangul le ɲɛm cɔwvon kɛsio lenin-ndo ni. Kɔ̀ɔ̀la cɔwlan vàá pilɛ la co lalɛɛndua lon, lon ɲɛm cɔvun kuubaa cɔwva kpow n co ni.

⁵ Vana ca ko mɛɛma nɔmma miɔnndan aa púwvɛa cuawva nda ŋiɔn ni. Vana ca ko man aa púwvɛa pɛndua co diolan o bil kɛndɛ-kɛndɔɔ nin ni.

⁶ Tuma pá mì paalen le del, mì ɲɔɔ kandu ɲulullo, mì vunduan ma lo, i co lakɔ o pembii ɲɛm cun kɛndɛi coo a o pembii pɔmbɔɛi malasikɔlɔi coo.

⁷ Caan ni laandoo, a naŋ bɔɔ! A nɔ lenamta o dialun nɔmndon nin te.

⁸ Éé nɔm vanalanɔ ya co cuaa o nɔu nin-ndo! N cɔn Liban mì n kɔɛ. Sim o pembei Amana coo, o pembei Senir a o pembei Hɛrmɔn coo, mà mɛɛndan bɛ̀mɛ́lta yàlàá a pembun tambilla co coo-on.

⁹ A hiilu ya kɔllo nin, yemanndo, nɔm ya co cuaa o nɔu nin-ndo. Tofaa ya lepilɛ sii ma hiilu ya kɔllo nin! Kɛsii n co hee yomɔɔ-e hiiluu ya kɔllo nin kpede.

¹⁰ Kaola nɔmndo yeela bɔɔ, yemanndo, nɔm ya co cuaa o nɔu nin-ndo. Nɔm vana ya co cuaa o nɔu nin-ndo sei! Kaola nɔmndo naŋ bɔɔ. Tɛ̀fɛ̀lɛ̀kɛ̀lɛ̀ɛ̀ nɔmndo hiow naŋɔɔ a mɔiyan, hoeyii nɔmnde hiow cunndo naŋɔɔ a ɲɛm cun kɛndɔn kpow.

¹¹ Òó nɔm vanalanɔ ya co cuaa o nɔu nin-ndo! Cɔcɔn nɔmndon, lɛan ma fula lon ni. Lɛan a nɔnɔan ma co o diɛɛmule nɔmnden coo ni. Vana tuɛi ko volɔɔla nɔmnda cuɛinanndan cunndo aa lasikɔlɔ cun kɛndɛ yɔmnde Liban ni.

¹² Nakɔ co o kindaa kpaŋ-ndo n co ni, yemanndo, nɔm ya co cuaa o nɔu nin-ndo. Mɛmma itɛɛnguma co makindan-ndan n co ni, soon kólaa co o kungaa-o lekɛ́ndɛi n co ni.

¹³ Tɛiyun nɔmndon co nakɔla krenadieela nɔ kɔmnde kɛndɛ-kɛndɛlen ndan ni. Yɔmii henee a yɔmii naar-e co lenin,

¹⁴ yɔmii koam naar a yɔmii koam safran, i koam kanɛl cun kɛndɔɔ-e a i koam sinamɔm-nde, yɔmii koam ansan súú-súù ka-e, yɔmii koam mir a i koam aloɛs yɔngu cun kɛndɔɔ-e kpow i co itɔalaa lon.

¹⁵ Pee pɔɔliaa nakɔlan-ndo n co ni, pee mɛnndan ma co hiovɔɔ nin-ndo n co o peela pɔmbɔlan Liban tɛɛn ni.

(Vanalanɔɔ)

¹⁶ Hoeyii fula a ba luaŋ-ndo-e, cɔn! Hoeyii fula a ba too-e, hɔŋ! La hɔŋ o nakɔ nuu coo haliko mi cun ndɔ kɛndɔɔ tiw kpow. Màá vanapɔnɔ ya kaola hoo-o luɛi o nakɔ ndɔɔ nin, mò de kɔmnde yeelɛilen!»