Condii kɛndɛ-kɛndɛi 2 - BII BILA

¹ «Peengela kɛndɛla co o dɛngbɔɔ Saron nin-ndan ya co ni, bil pungaa co o bóltan nin-ndo pɛɛn.»

(Vanapɔnɔɔ)

² «Mɛɛ peengela kɛndɛla lan la co o yɔmii n'yɔɛi tɛɛn yɛ, lende koni caan ni laandoo co cuaambɔa laandua tɛɛn ni.»

(Vanalanɔɔ)

³ «Mɛɛ yɔm pomiee co yɔmnde tɛɛn o bundɔɔ nin yɛ, lende koni vana ya kaola hoo-o co felengia piaandua tɛɛn ni. Ɲɔɔ hɛnan ya le calle o vundule ndɔlen bɛngu, kɔmnde ndɔlen le yeela ya o sondo taw.

⁴ O luei ya o cɛi mamɔiyo nin. Lɛfɛ o landu ya coo-o diolan aa: ‹Kaolaa›.

⁵ La míngí ya yoomuan o n'dial a fùlúfùlù rɛsɛŋun toaŋaa. La lueí ya yoomuan a pɔmii koamɛi. Kani i co a nàà kaolaa.

⁶ Màá ba mɛl ndɔɔ va o kɛsiaa o bolle nilen bɛngu, mì ba ndɔ kɛndɔɔ ŋɔw ya ndu o ibuŋ!»

(Vanapɔnɔɔ)

⁷ «Niaa felengia laandua Yerusalɛm sei! O diola púwvɛa a o diola kialaa co yondoo nin-nda, i co niaa ndi dimul kpéŋ-kpéŋ, la tíndì kaolaa le, la kpeeŋiaa ndu le háá fɔ mì ndu pila yeema.»

I co vana ya kaola-o tueyɔɔ hunɔɔ (Vanalanɔɔ)

⁸ «Diom vanapɔnɔ ya kaola-o ya co tueyɔɔ ho ni. Tofa vɔ ndu, ndu co hunɔɔ nuaa ni. Ndu co hunɔɔ a huuloo o pembon coo nuaa ni, ndu co icilian-ciliannde o pembun pɔmbɔn coo nuaa ni.

⁹ Vanapɔnɔ ya kaola-o velan a púvɔ́ɔ́ te kon te a kial cuaa. Tofa vɔ ndu! O co o cìì cɛi naa kɔɔli, o co tofaa o dio-pɔmbɔɔ, o co mɛɛndanndo o tɛɛngon.

¹⁰ Vanapɔnɔ ya kaola-o co sɔɛi o ya lo, o co ya dimullo aa: ‹Caan ni laandoo sei, cɔn! Hun, caan ni laandu naŋ hɔlla-o.

¹¹ Kani tofa vɔ, sialten le cuu, piɔɔ vengu, o co lɛ sia le.

¹² Billo co yandɔɔ o lɛŋnden coo, telenndo tiiya le condon solio. Piindo co caŋndo, vana tuɛi ndu diom o ciɛɔn naan nin.

¹³ Voosun tason diw o voosoei coo. Rɛsɛnndon yandu mí yandɔɔ kon va cunndo. Lelan, cɔn, caan ni laandoo, caan ni naŋ hɔlla taw-vo, cɔn mà hin.

¹⁴ Éé poonpoon ni laandu nɔ vɛɛnnden o tɛɛngon nin o powta kpovalan tɛɛn-ndo, ó co o viannanndo nɛɛ feke-fekea-o. Cɔm ya hɔlaa nɔmnda, tosa mì tuei diom nɔmndo. Kani a naŋ bɔɔ diomndo, a naŋ bɔɔ vɛlɛ hɔlla.›»

(Kala-cuaa)

¹⁵ «La biilu naa kàá, kàà cuavaa co tumnda n'rɛsɛnndan tɛɛmbuuo-a. Kani rɛsɛŋun naan n yandu.»

(Vanalanɔɔ)

¹⁶ «Vanapɔnɔ ni ya kaola taw-vo co le ya, ya bɛɛ i co le ndu. O bil kɛndɛ-kɛndɔɔ tɛɛn o yaa cɔlua ndɔa diólan ni.

¹⁷ Tuma pá hoeyii paale delɛi hɔŋ, mì vunduan ma lo, a bɛnda ma muungu nanu. Nɔm vanapɔnɔ ya kaola-o, tosa maa púvɛ, te kon te maa kial cua o pembun co naa tɛɛn-ndon coo.»