Kolɔsea 4 - BII BILA

¹ Niaa vanaa bɛndua, la bii cɛa niaa o dɛnɛ sandaa a o kpen-kpenndo nin. La sínà pɛɛngu maa niaa bɛɛ la nɔ vana bɛndoo o halataala.

Silala celen

² La biwnun o piɛilen nin, la pɔɛɛnun a piɛile balika len o Hala lo le.

³ Mì la piɛi vɛlɛ le naa: mì Hala kumbil naa dioo le sɔɛi, haliko mi n tiwba dɛnɛ viannan Krista-o yondaa. Le dɛnɛ viannan ndɔ kon ya co o yɔlɔn nuaa ni,

⁴ haliko mi yonda ndu mɛɛ ya bɛnda le ndu yondaa yɛ.

⁵ La kela a taasi a vanaa co vanaa laalan te-a. La mal telen oo telen hiovɔɔ le.

⁶ Sɔɔn nian bɛnda mì n va lɔ́ɔ́-lɔ́ɔ̀ sɔɔn cuu vana dɛnɛ kɛndɛ-on, mì n yeela o tueyɔɔ, haliko mi la sínà mɛɛ niaa bɛnda le vana-vana mulullo yɛ.

Yilɔɔla mɛɛlaalan

⁷ Le o co a sɔɛi nii o kɔɔ-o yɛ, Tisike downunnin niaa kona kpede. Puapilɛ naa naa n kaola taw-vo o co ni, vana baala sɔvɛ Maalii-o a caan ni naa n co vali Maalii-o tosaa latulu-o.

⁸ I vim niaa ndu, haliko mi la kɔ sínà mɛɛ naa n co nanun yɛ kínɛí a le mɛɛ o kɔ kɛsi niaa kɔltan yɛ.

⁹ Nda Onesim puapilɛ naa kɛndɔɔ kɔanin ni, ndu co vana pilɛ o yungu niaa tɛɛn. A downunnin niaa kona a i kɛ́-kɛ̀ co naa coo nanun.

¹⁰ Aristark caan ni naa n co o kaasoo-o yil niaa, Marke vanayɛi Barnabas-e bɛɛ yil niaa. I cɔm nin niaa isɔɔ a ndu o kɔɔ. Te o komal pɛ niaa, la bii ndu ɲɛkɛndɛi.

¹¹ Yeesu, o nda veelu aa Yustis-o bɛɛ yil niaa. O Yuifia cɛl sɔɛi Yeesu-e-a tɛɛn, vanaa yaa haa kínɛí naa n co baalaa latulu le masale Hala len ni. A luei ya yoomuan taw.

¹² Epafras fula o niaa lo-o yil niaa. Vana baala Yeesu Krista-o langbanɔ kon co ni, o co pɛngì Hala piɛyo le niaa le, haliko mi la sim yili, mì la peelun, mì la tosa hɛnan Hala-o o dɛnndan kpow nin.

¹³ Ya, i tiwba mì timbi seile len maa o co sangaa taw le niaa, le vannda Laodisee a le haa Hierapoli.

¹⁴ Luke caan naa, o co dɔtɔlɔnɔɔ-o nda Demas a yil niaa.

¹⁵ La yil naa puapilɛa naa co Laodisee-a, mì la yil naa Ninfa a kunda vanaa laalaŋaa co o ndu lo cɛinin-nda.

¹⁶ La cii pɛ sɛbɔɔ ho dimi, la kei o nɛi oo nɛi coo, mò dimin vɛlɛ kunda vanaa laalannda Laodisee tɛɛn, o kon mì niaa pila dimi o nda yɔŋnin niaa fulaa Laodisee-o.

¹⁷ La dimul Arsipe le hɔlla landɔɔ o vali o sɔla Maalii o ba-o coo, o tosá ndu ɲɛkɛndɛi.

¹⁸ Ya Pol, i yil niaa: a ba ya sɛval niaa sɛvaa ho ni. La loonun maa i co o kaasoo. Màá kɛndɛi Hala-e i va niaa coo!