Kolɔsea 2 - BII BILA

¹ I yeema mì la sínà cɔlɔba bɛndu ya co le niaa, le Laodisea a le vanaa sínà vɔ ya bɛɛ le-a-o,

² haliko ma sɔla yoomuan, mà va diom pilɛ o kaolianndo nin, mà sɔla laalan kɔlkalu kpeekpeiyo. O kon mà sínà dɛnɛ viannan Hala-o, Krista pɛɛn.

³ O ndu nin kɔlkaloo a dɛnɛ sinaa kpow vennun ni.

⁴ I co hee niaa dimullo, yɔŋii vana hiŋ niaa hɔlla a sondo yeelɛi fondoo.

⁵ Kani mi ve bɛɛ niaa tɛɛn o diallon nin te, i co niaa tɛɛn o kɔllo nin, mì ɲɔɔ va ya hɛnanndo le niaa cɔu simndan yili, mì la va lou o laalan co o Krista nin-ndo coo.

Yoomu vana sɔla Krista o ba-o tiw

⁶ Lelan, mɛɛ niaa cɛl Maalii Yeesu Krista nuaa yɛ, la kela niko mɛɛ dɛnnda ndɔlan la co yɛ.

⁷ La sim mì la luei puundon o ndu nin, mì la tangul yoomu niaa o ndu coo maa mɛɛ niaa sɔla pɛɛkoo yɛ, mì la va vanaa sinaa ikɛndɛa taw.

⁸ La caa, yɔŋii vannda bii niaa a sɔɔn caan mà hui niaa a sɔɔn fondon. O naamula vanndacieea nin kon fulà ni, a ɲinaa vɔɔnda co o ceendo coo-a o ba, o co Krista o ba le.

⁹ Kani ɲɛ-ɲɛ co o Hala nin, mí kon cua diallon Krista-on, nduyɛ o co ndu nin o peelan ca.

¹⁰ Nduyɛ o ndu nin dɛnndan kpow la co peelɔnndo ni, ndu co masalen tosaa kpaayalan a masɛi kpow coo-o.

¹¹ O ndu nin koni niaa dii toomaa ni, tooma vanaciee dii vana loo, kɛ tooma fula Krista o ba-o, o baŋa naa ceen naa lahakio o ba-o.

¹² Nduyɛ, telen niaa sɔla yinɔɔ-o, mí la sɔla kumbɔɔ o sɛiyo nin a ndu latulu, mí la tendul vɛlɛ a ndu latulu, le tùú niaa laalan kpaaya Hala mingi ndu yoomu fulaa vanvílɛ́iya tɛɛn-ndo.

¹³ Niaa va a vílɛ́iya o kɔllo nin le tɛɛmbuula niaalan a le tooma niaa kɛɛ diyɔɔ o diallon nin-ndo-a, mó tosa mí la muungu ceen a ndu latulu, mó mal tɛɛmbuula niaalan kpow haki.

¹⁴ Mó ɲumi sɛbɛ ndáà sɛva le naa cɔlɔbaa-o, o tɔŋnda ndɔlan la ve ɲɛ kɛndɛ a naa loo, mó kpeeŋa ndu o baŋɔɔ nda baŋ ndu o yɔm singafilaa coo-o.

¹⁵ Mó yunga kpaayalan a masɛi, mó soli nda vannda o hɔl kpendekele le nɔla o nɔla nda o yɔm singafilaa coo-o cɔmndo.

¹⁶ Lelan vana-vana kialu niaa iyama le ɲɛ niaa co dioo-o le, te kon te le o niaa co kolɔɔ-o, le dɛnɛ lakafoo, dɛnɛ paangun sɛnɛiyo a le dɛnɛ palɛi pɛngiaa,

¹⁷ mun kpow, vundule ɲɛm co hunɔɔ-on daama le co ni, kɛ o Krista nin sɔɛi kpeekpeiye co ni.

¹⁸ Vana-vana pɛɛku niaa tuisin fondoo te kon te mɛlɛkaa biiloo, mì la malnun ndu o ba le. Vanaa vaa lende a ca lɔma sɔlaan ɲɛ ni, mà handu man kɔltan coo. Nda koni yiyannda ivanacieeyalan la pei kuundian fondoo nin ca ni.

¹⁹ A lo a yiinan a Krista le, o co bollen-ndo. Nduyɛ, ndu Krista kon kpeekpei co tosaa ni mì kɔɔle tɔ̀len kpow le va baloo sɔlaa, mì le va le yiw-yiwaalen o boondon, mì la va hindɔɔ mɛɛ Hala yeema yɛ.

Vuo a vaa yoomu le Krista

²⁰ Te o va pɛ maa la vi nin niaa Krista-aa latulu, mí la sɔla baŋaa kpaayala ceenndan o ba, mɛɛ le yɛɛ niaa co yɛ vɛlɛ kelaa o dɛnnda ceenndan nin, mì la va tɔŋnda vanaa ceenda cɛlɔɔ vana ca kaa o ceendo nin niaa co vɔ ni?

²¹ Le yɛɛ nda co yɛ niaa dimullo aa: «Pilan hee le, dombi hoo le, yaa baa lon te»?

²² Lan kpow, dɛnnda co hunɔɔ lo o ɲánndávàà le mako vana solin a lan-ndo la co lan ni. Silalan a pɛɛkula vanndacieea la co lan ni.

²³ I co toɲa maa pɛɛkula lan la velan a kɔlkaloo, le tùú la co kaannde vana pila tuunun o kɔl le tosaa len-ndo, tuisin tootoo a dialun naan saangiaa, kɛ nduyɛ, o co sɔɔn vana bɛnda le lebɛɛ ke le n co le, le yeemɛi ivanacieeyɛi tosaa daama n co ni.