Amɔs 9 - BII BILA

Vundule ŋuɛɛnundɔlen

¹ Mí ca Maalii isisi o fonda-loamaa-lasálàá coo. Mó dimi aa: «Lɔɔ sungbuan bolle haliko mi kèédeon hiilun. Yimi man nda kpow o lebol. Vanaa lonin yoomu o nda tɛɛn-nda, i tɛinin nda a mɔɛi cɔwve. Hali vanndo ndu pilɛ, o nɔlanin ɲaanɔnndo le yoomu ndɔɔ baŋaa le, vana-vana nɔlanin hiɔlɔnndo le.

² Taa ɲaanun pɛ mà kɔ luɛi ciee-piɔ́m, ba nuu kɔ solinin nda lon pó! Taa hel pɛ o halataalaa nin di-di, i tuisinin nda cili!

³ Taa kɔ vionnun pɛ o pembei Karmɛl tullo, i nuwviaanin nda lon mì biw nda. Taa luusian pɛ ya o hɔl mà vennun o mɛmma ihɛllan nin, i viamnin kɛwvo lon mò kɔ lɔwviaa nda.

⁴ Taa kɔɛ pɛ o biyɔɔ nin o lɛŋnde celen nin yaamɔaa ndaa o hɔl, lon bɛɛ i tosanin mì mɔɛi cɔwve diw nda. I tofanin nda, kɛ o venin le nda dɛnɛ kɛndɛ tosal te, fɔ le nda dɛnɛ palaa tuisio coo.»

Maalii co vana bɛndoo o halataala a o lɛŋnden coo ni

⁵ Maalii, Mɛlɛka-Nɔ-Kpaayaa-Kpow-vo co lɛŋnden pilanndo mi le va tengaa mɛɛyɛɛ. Vanaa co icali o lɛŋnde kalalen nin-nda kpow, a co o dɛnɛ palaa nin. Lɛŋnden kpow le co helɔɔ cɔfuu maa mɛnndan Nil o peelo. Le co vɛlɛ tolɔɔ maa peo Nil, o co Esipte-o.

⁶ Mɛlɛka cɔw calta ndɔlan o halataala, o tondu halataalaa o lɛŋnden coo, o cuungiaa mɛmma ihɛllan, mó saŋ man o lɛŋnden coo. Diola ndɔlan aa Mɛlɛka.

Ɲɛ Mɛlɛka kɔngɔlan le vanaa yɔŋ vɔɔnda tuisio coo-o

⁷ Niaa cuavaa Israɛlla sei! O co maa cuavaa Etiopiia le niaa co le ya le? Ya Mɛlɛka ɲuna nuaa ni. O co mɛɛ ya soli Filistia Kaftɔr, mí soli Aramiia Kir yɛ le ya soli cuavaa Israɛlla Esipte le?

⁸ La tofa vɔ, Maalii, o co Mɛlɛka-o, co masale lahakilen nden mɛɛndanndo a dimio aa: «I co lakɔ len tɛɛmbuu mì le faŋan o lɛŋnden coo, Kɛ o bɛnda mì tɛɛmbuu cɛi Yakɔb-o kpede le. Ya Mɛlɛka dimi lende ni.

⁹ Kani tofa vɔ, ɲɛ ya dimi le tosaa-o co hoo ni: i hiiluunin cuavaa Israɛlla o vanaa-mangalaa-isɔaa tɔ̀a tɛɛn, mɛɛ vana cacu ɲɔɔ a tɛmɔɔ nuaa yɛ. O kon, hali kulii pɔmbɔɛi i pilɛ i del lɛŋ te.

¹⁰ Vanaa lahakia o vanaa nia tɛɛn kpow a vunin o mɔɛi cɔwve bɛngu. Vanaa kan kpeekpei, a co kan dimio-a aa: ‹Dɛnɛ palaa sɔɔnguunin naa macɛlu le, o tulnin naa coo le.›»

Kpemaa le ɲɛ tambu-o mingio toosiaa

¹¹ O paale len nin, i minginin cɛi David co o tambɛiyo-o toosiaa, i minginin tɛɛngun buuluu-on baŋul, mì mingi ndu kpɛlɛkia ɲɛkɛndɛi. I minginin ndu tangul mɛɛ o va paandu yɛ,

¹² haliko ma hɛlu ɲɛm tɔ̀un lonin Edɔmnda a vanaa-mangalaa-isɔɔa diola nilan la co biilɔnndo tɛɛn-nda o ba-on. Mɛlɛka, o peelunin sɔɔn mun-ndo soo nuaa ni.

¹³ Mɛlɛka dimi aa: «La tuei-yɔ, palɛi pum co hunɔɔ tiiya, vana váà vanin vana koavaa kɔɔli kpɛɛlun. Vana kiandaa n'rɛsɛnndo vanin vana vanin saŋɔɔ-o ikɛi kpɛɛlun. Mɔiyan ma vanin fulaa o pembun bɛndon coo taw, mì buubuuon kpow n va man solio.

¹⁴ I minginin vanaa nia vanin o biyɔɔ nin-nda o nda lo, cuavaa Israɛlla pɛɛn. À minginin kobila piɔl tan tangul, mà cal lenin. À tɔalnin rɛsɛnndon, mà kol mɔima ndɔan. À tɔalnin nakɔlan, mà de kɔmnde nakɔla lan.

¹⁵ I tɔalnin nda o lɛŋnde ndalen coo, à nɔla lɛnin sungɔnndo o lɛŋnde ya yɔngu nda len coo le fɛɛn a fɛɛn te. Lende Mɛlɛka, Hala niaa dimi ni.»