Amɔs 8 - BII BILA

Vundule hiɔɔlundɔlen: Kambɛi yɔmii koamaa

¹ Mí Maalii, o co Mɛlɛka-o cɔm ya vɛlɛ vundulen nden: Mí ca kambɛiyo o piaa cá a yɔmii koamɛi diuvɛi.

² Mí Mɛlɛka ɲuna ya aa: «Amɔs, yɛɛ nɛ n co yɛ cɔu?» Mí muli aa kambɛiyo ya co cɔu a yɔmii koamɛi diuvɛi lenin ni.» Mí Mɛlɛka dimul-la aa: «Mɛɛlulan la tiiya le vanaa nia, cuavaa Israɛlla pɛɛn, i hiw lɛnin laci a nda hakio malɔɔ le.

³ Paale len, caŋndan la vanin condon o cɛi lemasaa nin ni. Lende ya Maalii, ya co Mɛlɛka-o dimi ni. A vanin vanvílɛ́iya taw-taw viovɔɔ nɛɛ-nɛɛ ka o mei bɛndoo nin kpili-kpili.»

Yulaa nɔ hɔlte ɲɛ-sɔlaa-a mal kpundɔɔ

⁴ La yaŋ nilan o sɔɛi he, niaa co vanaa ikɔɔa bɛpɛlaa, mì la va yeemaa le nda ciiyo tɛɛmbuuo o lɛŋnden coo-a!

⁵ La co dimio aa: «Lɔ́ɔ́ kuɛɛ kafo paangii sɛnɛiyo co yɛ cuvɔɔ, haliko mi n kɔ muungu malun naan pisio? Lɔ́ɔ́ kuɛɛ nɛ kafo paale pɛngiaa ho co yɛ nin cuvɔɔ, haliko mi n kɔ kumbi kondala naalan le malun naan muungoo pisio? N co panilan bɔɔfiàà mì la dɔɔnan, mì n cɔɔlu vɛlɛ maalon báà heelu, n co ɲɛla tuvaala n'ɲɛlan mangaliaa le vannda palaa.

⁶ O kon kɔɔli, n piandunin vanaa ikɔɔa a volion, mì n pendu vana bala fondoo o pilɛ o samtalan bɛngu. Hali kefun n'mallon, n pisinin mun.»

⁷ Lelan, Mɛlɛka mɛnan a lɛŋnde yungu Yakɔb-o tiindan-nden aa: «Le fɛɛn a fɛɛn, i pɔɛɛnunnin dɛnnda ndalan o pilɛ le.»

⁸ Le hee, lɛŋnden le hiilunnin, mì dɛnɛ palaa tol vanaa co icali lenin-nda coo. Lɛŋnden le dɔawnunnin yɛɛvɛ, mì le hel fúkɛ̀-fùkɛ̀ mɛɛ pee bɛndoo Nil hun nuaa, mì mɛnndan ma fula fasaka-fasaka yɛ. Le biiŋun pɛ lende, le toalnin vɛlɛ maa mɛnndan o peo bɛndu kon Esipte.

Paale dɛnɛ palaalen

⁹ Diom Maalii, o co Mɛlɛka-o dimi-o co hoo ni aa: «Paale len, paalen le delnin a telen paale kalaa, mì tuisi ɲumndan o lɛŋnden coo ipalaa déŋ.

¹⁰ I mangalanin kafola niaalan dɛnnda palaalan, mì mangala condun niaan caŋndan. I tosanin mì vannda kpow a yiwnun volɔɔla biisilan o caŋ, mì vannda kpow a sendin tembeltan. I tuisin lɛŋnden dɛnɛ palaa coo mì ɲɔɔ siŋnun maa biisi pole pilɛ. Kon kpow mɛɛlunnin maa paale sanga bɛndu.

¹¹ Maalii, o co Mɛlɛka-o dimi aa: «Tofa vɔ, palɛi pum co hunɔɔ tiiya, i tuisinin yima fofolan o lɛŋnden nden coo. Yima man yɛ, o venin pɛŋnde ɲɛdiaa le, o venin pɛŋnde mamɛn te. Kɛ yiaan a bolola vesɛilan le sɔɔn Mɛlɛka-on tueyɔɔ.

¹² O kon, vannda vanin heeloo a tuusoo o mɛmma ihɛllan, a cɛn pɛ o man a kɔɛ o mapilɛan, a vanin cɔnɔnndo a ba luaŋ-ndo, mà va kɔlan a ba paalen le can-ndo, a vanin kɔlan ba-ba fee le sɔɛi Mɛlɛka-e nuwviaa, kɛ a seelunnin ndi le few.

¹³ O palɛi ken nin, cuaambɔa laandua kɛndɛ-kɛndɛa, a poambɔa piaandua ɲawnin a bolola vesɛilan le mɛmma lepɛŋndan.

¹⁴ A co kan mɛnanndo a hakio Samari, má va dimio-a aa: «Le hala nɔm yoomaa, Dan…! Le nɛi diandaa yaa vana Bɛɛr-Seba-o…!» Nda kpede, a co delɔɔ, à cen ndɛnin isisi le.