Amɔs 4 - BII BILA

Sɔɛi dimulun vanlaandua bolofaa Samari-e

¹ «La yaŋ nilan ɲɛkɛndɛi o sɔɛi he, niaa navaa laandua Basan, niaa co icali o pembon Samari coo, mì la va vanaa bala fondoa saangiaa a vanaa ikɔɔa mɔnɛi lueiyo-a. La co piaandaa niaa dimullo-a aa: ‹La hun a man mì n kolnun man!›

² Maalii Hala mɛnan o diondɔɔ ndɔɔ nin aa: ‹La tofa vɔ! Palɛi pum co hunɔɔ kei niaa coo, a sɛɛsuunin niaa a bawla n'cilinndan, mà cua vanaa hunnin niaa kɔɔli-a o dolinndon.

³ La fulanin o tɛɛngun co o kpakio-on, mà viow vana-vana ndu laci sakpo a kpengii Hɛrmɔn-nde.› Lende Mɛlɛka dimi ni.»

Kaannde lacòòvalen

⁴ «La kɔ Betɛl mì la kɔ tosa hakilan! La kɔ vɛlɛ Kilkal mì la kɔ cɔɔlu hakilan tosa. La soli sálàlan idii oo idii, la yɔngu o-tɔ́ndɔ niaa o vɔsi yàándɔɔ coo.

⁵ La lom buloo a lɛvɛnndo mì la kɔ soli sálàla niaala malaa balikalan ndon! La yonda mì la heelu diomndo le sálàla niaa kelu a yeemɛi niɛi lan solio. Kani ken niaa yeema ni, niaa cuavaa Israɛlla. Ya Maalii, ya co Mɛlɛka-o soo nuaa ni.

⁶ Ya Mɛlɛka yɛ, mí tuŋ niaa ɲɛdiaa, mí la lo sondola fondo o kobila niaalan nin, mí tuisi niaa yima fofolan coo o calta niaalan kpede. Kɛ a kon kpow, la mùùngú ya o ibuŋ te. Ya Mɛlɛka soo nuaa ni.

⁷ Ndóò lo vɔ paangon mún yáá le telen koavaa tiiyaa, mí tuŋ niaa piɔɔ. Mí tuisi piɔɔ o kobio o pilɛ coo, mí kɛɛ le ndu tuisio o kobio pilɔɔ coo. Mó sia o ciɛi pilɛ coo, kɛ o se o ciɛi pílɛi coo le, mí ɲɛm ndáà váá o ciɛi ken nin-ndon vesan a valoo.

⁸ Le hee, mí vannda va cɔnɔnndo o kobilan tan tiɔn te kon te tan yáá nin le kɔlan mɛnndan kolɔɔ o kobio ndu pilɛ nin, kɛ kolɔɔ iyeemaa cuu nda le. A kon kpow, la mùùngú ya o ibuŋ te. Ya Mɛlɛka soo nuaa ni.

⁹ Mí tuisi nààla latɔlɔɔlan o tɔlɔɔla niaalan coo, mí la foofi. Mí kambalaa sóónɔa dia nakɔla niaalan kpow, má dia nakɔla niaala n'rɛsɛnndan, nakɔla niaala n'voosulan a nakɔla niaala olivieelan. Kɛ a kon kpow, la mùùngú ya o ibuŋ te. Ya Mɛlɛka soo nuaa ni.

¹⁰ Mí tuisi niaa nàà halimaa coo mɛɛ yáà tuisi ndu Esiptea coo lɔ́ɔ̀ kon yɛ, mí diw felengia niaa o mɔɛi cɔwve bɛngu, mí mal yaamɔɔa má bii soa niaa, mí tosa mí la tuɛi vanvílɛ́yaa siowva cun o dɔ́ɔ́ngɔ́ niaa nin. Kɛ a kon kpow, la mùùngú ya o ibuŋ te. Ya Mɛlɛka soo nuaa ni.

¹¹ Mí hiiluu niaa vooku-vooku mɛɛ ya hiiluu kobio Sodɔm a kobio Komɔr mí tɛɛmbuu lan yɛ. Niaa, mí la yɔŋnun vɔngɔɲɔn maa kili nda soli o yin-ndo. Kɛ a kon kpow, la mùùngú ya o ibuŋ te. Ya Mɛlɛka soo nuaa ni.

¹² Lelan, lende ya co niaa hunɔɔ tosal ni, niaa cuavaa Israɛlla. Le tùú ya co niaa hunɔɔ tosal lende-o, la bɛɛndian le Hala niaa bɔŋaa, niaa cuavaa Israɛlla.

¹³ Kani la tofa vɔ! Vana cɔw pembon a hoeiye-o, vana cɔm vanacieo yiyannda ndɔlan-ndo, vana mangala ɲɛ-tengaa paale siaa ɲumndan-ndo, ó co kelaa o pembun co o lɛŋnden coo-on coo-o, diola ndɔlan aa Mɛlɛka, Hala-Nɔ-Kpaayaa-Kpow-vo.»