Amɔs 1 - BII BILA

Kɔɔsɔɔ co le tiiyaa

¹ Sɔɔn Amɔs soo-on yɔŋnun mun ni, vana mandaa n'cɔloo pilɛ Amɔs va o vanaa mandaa n'cɔlua Tekoa tɛɛn ni. Sɔɔn o soo mun-ndon cɔmnun ndu a dɛnɛ Israɛlla o kɔɔ tuma Osias masaa Yuda a Yeroboam masaa Israɛl, po Yoas-o a va o masalen coo-o. Vɔsilan tan tiɔn o kon kɔɔli, mí lɛŋnden le ɲiiya.

² Mi Amɔs dimi aa: «Mɛlɛka co kuuliaa Siɔn. O co yoondiaa Yerusalɛm a labɛɛla kpeekpei! Bil puiyaa vanaa mandaa n'cɔlua vesan, yondo puiyaa vesan o pembei Karmɛl tullo!»

Sáálé dimulun kobio Damas-o

³ Nuaa Mɛlɛka soo ni aa: «Le yɔŋnda vɔɔnnda yàála vannda Damas tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a pimbulu vannda Kalaad o ciliŋun siɛɛmbian coo, má pesipesi nda.

⁴ Lelan, i co hunɔɔ yinnden malɔɔ o cɛi lemasa Hasaɛl-lo coo, mì le lom cɛi lemasa Bɛn-Hadad-o!

⁵ I co sɔkɔma nda kinda dio kpakio Damas-an yimiyimi. I toawnin vanaa co icali Bikat-Avɛn-nda, mì tow vana co masalen tosaa Bɛt-Edɛn-ndo. A kɔanin a Aramiia o cɛlen nin háá Kir.» Lende Mɛlɛka dimi ni.

Sáálé dimulun Filistia-o

⁶ Nuaa Mɛlɛka soo ni aa: «Le yɔŋnda vɔɔnnda yàála vannda Kaasa tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a bii vannda sɛ́lɛ́ bɛndoo taw-taw le nda vɔngullo Edɔmnda o ba.

⁷ Lelan, i co yinnden malɔɔ o kpakila kobio Kaasa, mi le lom cɛila lemasalan ndon.

⁸ I toawnin vanaa co icali Asdɔd-a mì tow vana co masalen tosaa Askelɔn-ndo. I kuelnin vannda Ekrɔn mì diw nda. Lende Filistia tɔ̀a kpow a cuunin vu ni. Lende Maalii, o co Mɛlɛka-o dimi ni.» Lende Maalii Hala dimi ni.

Sáálé dimulun kobio Tir a Fenisia-o

⁹ Nuaa Mɛlɛka soo ni aa: «Le yɔŋnda vɔɔnnda yàála vannda Tir tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a bii vannda taw-taw, má kɔ vɔngul nda Edɔmnda o ba. À yiyan le kpema ivanaya co nda tɛɛn nda puapilɛa ndaa kan-ndo le.

¹⁰ Lelan, i co yinnden malɔɔ o kpakila kobio Tir, mì le lom cɛila kɛndɛ-kɛndɛla co lon-ndan.»

Sáálé dimulun Edɔmnda-o

¹¹ Nuaa Mɛlɛka soo ni aa: «Le yɔŋnda vɔɔnnda yàála Edɔmnda tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a tow puapilɛa ndaa, má ɲaanun nda kɔɔli a mɔɔn cɔwvon, má kɛɛ le nda ɲííye tuinɔnndo, má tuisi nda kɔltuw ndaa coo. A co kɔl nda fulaa mandanndo nin le lɔ́ɔ́-lɔ́ɔ̀.

¹² Lelan, i co yinnden malɔɔ mì le lom kobio Teman, mì le lom vɛlɛ cɛila lemasalan Bɔsra.»

Sáálé dimulun Amɔnnda-o

¹³ Nuaa Mɛlɛka soo ni aa: «Le yɔŋnda vɔɔnnda yàála Amɔnnda tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a tɛɛndiaa vanlaandua lafolia Kalaad dembelan le lɛŋnde ndalen cɔɔloo.

¹⁴ Lelan, i co yinnden malɔɔ o kpakila kobio Raba, mì le lom cɛila lemasala co lon-ndan o vóólun-vóólunn cɔwvo bɛngu, o paale cɔwlen len pilɛ nin. La cuunin ŋɔ o felenfelen leyinndo nin o paale hoeyii fùkù-fùkùlen nin.

¹⁵ A biinin masa ndaa pila a simlacia ndaa, ma kɔɛ a nda o cɛlen nin.» Lende Mɛlɛka dimi ni.