Abdia 1 - BII BILA

¹ Vundule Maalii Hala cɔm Abdia len, sɔɛi o cɔm ndu a tambii Edɔm-nde o kɔɔ-e. «N tuei yoongu Mɛlɛka-o, o kiilaa pum co vanaa-mangalaa-isɔɔa tɛɛngullo-o aa: ‹La cɔn mì n kɔ delnun Edɔm coo a cɔwvo!›

Mɛlɛka soo le tambii Edɔm-nde

² Maalii dimi aa: ‹I co nɔm siinguu yungu hiow dɔɔnanndo vanaa-mangalaa-isɔɔa tɛɛn-ndo. Sɔɛi nɔmnde nɛinun nin vannda taw.

³ Yonga nɔm bɛndoo co nɔm palaa ni. O powta kpovalan tɛɛn calta nɔmndan la co ni, a cii lan heelu coocoo ningo-ningo, ma va ɲunanndo o kɔl nin aa: ‹Nɛ̀ɛ́ nɔla yɛ ya tuisi lɛŋ?›

⁴ Hel bɛɛ coocoo maa kovɛ, ma kɔ tangul vɛɛnnde nɔmnden o loeon tɛɛn, i co nɔm tuisi ma del lɛŋ.» Sɔɛi fula ya Mɛlɛka o sondo-e co ken ni.

⁵ Te vuiya te kon te vanaa del vannda coo-a hinul nɔm pɛ icɔl, a cuanin ɲɛm nda tiwnin ba cuaa-on kpow, mì nɔm koma lo bala fondo. Te vanaa toosiaa mɔiyan a rɛsɛnndon-nda hin pɛ o nakɔ nɔm n'rɛsɛnndo nin, kpɔ̀nyɔ̀lan lapilɛn daama nda mɛinin ni.

⁶ Niaa polale Esau len, a cii niaa mɛi bala fondo fúú! Bolofaa niaa va o vianaa-o bɛɛ, vannda cii ndu saalɔn.

⁷ À toawnin niaa o lɛŋnde niaalen coo. Vanaa niaa bɛnda-a kpede a fulanin niaa kɔɔli, mì vanaa va caaŋaa niaa-a tol niaa coo a kpaayaa. Vanaa niaa co balan o hɛngɛi pilɔɔ nin-nda co niaa yaŋɔɔlan hendullo o nɛila niaalan coo mà va dimio aa: ‹A co lɛ ɲɛ-ɲɛ bila biyɔɔ le.›

⁸ Le hee ya Mɛlɛka dimi ni maa paale ya tambunin kɔllo len, i diwnin vanaa kɔlkalua kpede o lɛŋnde Edɔm-nden nin, mì cii vanaa dɛnɛ sinaa o pembii Esau-ve coo.

⁹ Nɔm kobio Teman yɛ, siòòŋii bɛnduei biinin kuubaa nɔmnda. O kon, vanaa co o lɛŋnde Esau len nin-nda kpede a sɔlanin piɔ́mndo o paale cɔwlen.»

Edɔmnda dɔwnun ɲaale le dɛnɛ palaa Israɛlla

¹⁰ «Le kɔlvesɛi niaa tosal puapilɛa niaa-o, cuavaa Yakɔb-a pɛɛn, siɛmbulan la toalnin niaa, mì niaa pila cuu le fɛɛn a fɛɛn.

¹¹ Kani la va lon paale len, mí la simnun, mí vanaa celennda kɔannun a bolofaa ndaa. La lo tofaa mí mialla hun luɛi o kobi ndaa nin, Yerusalɛm pɛɛn, má mal siondei le bolofaa ndaa piɔvanndo. Niaa bɛɛ, mí la tosa maa vanaa kan.

¹² Niaa Edɔmnda, niáà bɛnda mí niáà naŋ kɔl le puapilɛa niaa, Yudaa, tofaa o tuma dɛnɛ palaa kon nin te. Niáà bɛnda bɛɛ mí niáà naŋ kɔl tuma nda va kon piɔllo-o le. Niáà bɛnda mi niáà dimi diomnda vɔɔnndan a nda tuma nda va kon o mɔnɛi nin-ndo le.

¹³ Niáà bɛnda mi niáà luɛi o kobi vanaa nia nin tuma vannda va ɲɔɔn pungaa lon-ndo le. Niáà bɛnda bɛɛ mí niáà ce nda o sangaa nin mí niáà dɔwnun ɲaale le. Niáà bɛnda mí niáà punga bolofaa ndaa tuma nda va kon o kpundɔɔ nin-ndo le.

¹⁴ Niáà bɛnda mí niáà sim o nɛi-lábándoo le vanaa va hiɔlɔnndo-a diwvo le. Niáà bɛnda mí niáà mal vanaa tɔ̀a lo yoomu-a yaamɔɔa o ba o paale dɛnɛ palalen coo le.

¹⁵ Kani paale Mɛlɛka kialunin yamɛi vanaa-mangalaa-isɔɔa kpow len le co nin le tiiyaa. A tosalnin niaa mɛɛ niaa tosal caanda yɛ. Yɔŋ vɔɔn niaa tosa-o mingulunnin niaa.»

Israɛlla mingulnin Edɔmnda màá

¹⁶ «Niaa Israɛlla, la cii mɔima nima kɔltuwvan kolɔɔ o pembii nii diandɛi coo. Vanaa súúla celennda ciinin man kolɔɔ le. À kolnin man háá mi ma bii nda, o kon, à cuunin o lepilɔɔ few.

¹⁷ O kon vanaa tɔ̀a lonin-nda cuungiaanin o pembei Siɔn coo, fonda muungunin kon vɛlɛ o diandaa le ya-o pɛɛn. Polale Yakɔb len le minginnin vɛlɛ yondala ndalan o ba, yonda vannda ndaa hɛlu nda o ba lan pɛɛn.

¹⁸ Yungu Yakɔb-o siŋnunnin maa leyin, mì yungu Yosɛf-o siŋnun maa yinnde biyaa. Kɛ mì yungu Esau-vo ndu siŋnun maa tɛw, mì yinnden le lom nda kpúlúká. Vana pilɛ bɛɛ helunnin te. Ya Mɛlɛka dimi lende ni.»

¹⁹ Yudaa hialunin lɛŋnde n'pembule Edɔm-nden a ba too, mà hɛlu vɛlɛ dɛngbɛla co o tàndá Filistia nin-ndan, mà hun cal o tàndá Efraim-ndo nin, Samari pɛɛn. Polale Bɛnyamɛn-nden le hialunin Kalaad.

²⁰ Israɛlaa vanin o ɲaanɔnndo nin a ba luaŋ-ndo-a cannin maa sɛ́lɛ́ vanaa cɔw, mà kɔ hiɔlu lɛŋnde Kanannda, mà kɔ tiiya a lɛŋnden hiɔlɔɔ háá Sarɛpta. Vanaa fula Yerusalɛm ma va o ɲaanɔnndo nin Sefarad-a, nda hialunin kobila co a ba too lan.

²¹ Vanaa baŋa vannda-a helnin o pembei Siɔn coo le masalen tosaa o pembii Esau-ve coo. O kon Mɛlɛka vanin masaa kpeekpei.