Aasee 1 - BII BILA

Telenndo tiiya le Cɛi-Hala-o mingio tangullo

¹ O vɔsi diinndɔɔ nin o masale Darius le bɛngu, paale taselen o paangii ŋɔmpumndɔɛi nin, mí Mɛlɛka soaa o Hasee lo, o va vana-tɛɛngaa-diom Hala-o-o. Mó dimul ndu le yoongoo tɛɛnguuo o masa ibungaa Yuda lo, Sorobabɛl po Sealtiɛl-lo pɛɛn, a o Yosue lo, o va bolle vanaa-solia-lasálàá-o, po Yehosadak-o o va ni. Yoongu kon yɔŋnun hoo ni:

² «Nuaa Mɛlɛka-Nɔ-Kpaayaa-Kpow-vo dimi ni aa: ‹Vannda ha co dimio aa telenndo tiiya vɔ le, telenndo le Cɛi-Mɛlɛka-o mingio tangullo.›»

³ O kon, mí sɔɛi Mɛlɛka-e tɛɛngulun nda a sondo Hasee va vana-tɛɛngaa-diom Hala-o-o aa:

⁴ «Vɛ̀ɛ̀ telenndo tiiya le niaa pila, mì la vannun o cɛila sɔvɛla kɛndɛ-kɛndɛlan nin, mì Cɛi nuu vá o piɔlɛiyo?»

⁵ Sisa, Mɛlɛka-Nɔ-Kpaayaa-Kpow-vo dimi aa: ‹Niaa pila yiyan-ndɔ ɲɛ co niaa tosalanndo-o.

⁶ La co saŋɔɔ taw, kɛ la co ɲɛ bɔɔ kovɔɔ le. La co dioo, kɛ la co pum te. La co kolɔɔ, kɛ ma co niaa biyɔɔ le. La co volɔɔlan cuɛinɔnndo, kɛ la co niaa hangul heelu le. Sala vana baalaa co sɔlaa-o co luɛyɔɔ o bɔlɔ buliɛiyo nin.

⁷ I co niaa ndi cɔɔlu dimul, ya Mɛlɛka-Nɔ-Kpaayaa-Kpow-vo: Niaa pila yiyan-ndɔ ɲɛ co niaa tosalanndo-o.

⁸ Le hee, la hel o pembon coo, mì la kɔ hun a yɔmnde, mì la mingi Cɛi nuu tangul. O kon, i naŋnin kɔl le biilu nuu sɔlaa lenin, ya Mɛlɛka dimi lende ni.

⁹ La va yiyanndo maa niáà sɔlanin taw, kɛ la tofa vɔ ɲɛ-pɔmbɔ niaa sɔla-o. O pɔmbɔ niaa fula vɛlɛ kon o ba ciee-o, mí hul ndu, mó sɛŋin niaa o ba kpede. Le yɛɛ nɛ ken tosan yɛ lende? Ya Mɛlɛka-Nɔ-Kpaayaa-Kpow-vo ɲuna nuaa ni. Ken tosan fondo le, le tùú niaa mal Cɛi nuu o piɔlɛiyo, mí vana-vana landu hɔlla o cɛi ndɔ ndu pilaa coo-o.

¹⁰ Lelan halataalaa kɛɛ le piɔɔ tuisio niaa coo ni, mí lɛŋnden le kuuna tɔlɔɔlan vulɔɔ.

¹¹ I tuisi valoo o lɛŋnden coo, o pembon coo, o ciɛɛn n'mallon coo, o nakɔla n'rɛsɛnndan coo, o nakɔla olivieelan coo a o tɔlɔɔla tɔ̀lan kpede coo, mí tuisi vɛlɛ valoo vanndacieea a cɔlua coo, mí baalala niaalan kpow la va tambei.›»

¹² Mí Sorobabɛl po Sealtiɛl-lo, Yosue bolle vanaa-solia-lasálàá, po Yehosadak-o a vanaa hin fula o biyɔɔ nin-nda kpow a bii sɔɛi Mɛlɛka Hala ndaa dimi ken-nde, ì Hasee vana-tɛɛngaa-diom Hala-o tɛɛngul nda ken-nde. Nuaa Hasee tosa ɲɛ Mɛlɛka vem ndu tosaa-o ni, mí siòònde bii vannda kpow a Mɛlɛka.

¹³ O kon mí Hasee, kiilanɔ Mɛlɛka kon tɛɛngul vɛlɛ vannda diom Mɛlɛka sɔɔ ndu o sondo-o aa: «Ì co niaa ikɛi. Diom ya Mɛlɛka soo-o co kon ni.»

¹⁴ Mí Mɛlɛka hiiluu Sorobabɛl po Sealtiɛl-lo, o va kon masa ibungaa Yuda-o a Yosue po Yehosadak va bolle vanaa-solia-lasálàá kɔltan nin, mó hiiluu vɛlɛ vanaa tɔ̀a hin fula o biyɔɔ nin-nda kpow kɔltan nin le baala kon kandɔɔ. Má kandu baalaa le Cɛi-Mɛlɛka-Nɔ-Kpaayaa-Kpow-vo, o co Hala ndaa-o mingio tangullo.

¹⁵ O paale bidiin a lehiɔɔlundɔlen coo, o paangii ŋɔmpumndɔɛi nin, o vɔsi diinndɔɔ nin o masale Darius len bɛngu nda kandu baala kon ni.