2Timote 1 - BII BILA

Yilɔɔlan

¹ Ya Pol siŋnun kiila Yeesu Krista-o o hɛnan Hala-o nin a mɛɛ kpema cindaa co o Yeesu Krista nin yɛ-o.

² I co nɔm Timote, po ni ya kaola-o sɛbɔɔ ho sɛval. Màá Hala Fuɲaa nda Maalii naa Yeesu Krista tosal nɔm kɛndɛi, mà tuinin nɔm iɲíí, mà ke nɔm kɔlɲuloo!

Silalan le hiovɔɔ laci o vali Mɛlɛka-o nin

³ I mel Hala balika, o ya co baalaa tosallo a kɔl nuu o diandaa mɛɛ fuɲaa naa mamaa tosa yɛ-o. Idii a icɔl, i co nɔm yiyanndo coo, i co Hala piɛiyo le nɔm.

⁴ I co loonɔnndo a mɛmɛma n tuisi-an o kɔɔ, ya yɛ, yeemɛi co ya taw le nɔm cɔu vɛlɛ haliko mi dɔwnun ɲaale taw-taw.

⁵ I co loonɔnndo a laalan kpeekpei n nɔ-o o kɔɔ, laalan Lois mama nɔm ndóò nɔ sindɛ-o, laalan kon pɛɛn, ó va vɛlɛ Enise kala nɔm nin-ndo. Nduyɛ, i nɔ kɔlkɛsiaa maa laalan pilɛ kon koni co vɛlɛ nɔm nin nuaa ni.

⁶ Lelan i co nɔm yiyalan, mà bii ke n sɔla tuma ya handu nɔm balan coo-o-o ɲɛkɛndɛi.

⁷ Kani Hala ke naa kɔl taalɛɛ le, kɛ kɔl pei naa kpaayaa, kaolaa a kɔllo biyɔɔ-o.

⁸ Lelan, siɛmbula bii nɔm le seile Maalii naa timbio vannda o hɔl te, siɛmbula bii nɔm vɛlɛ a ya co hoo o kaasoo-o le. Kɛ cɛl mì n sanga latulu le Yoongu Kɛndɔɔ o kpaaya Hala-o bɛngu.

⁹ Ndu Hala ciindiaa naa ni, mó veelu naa veelu diandaa, haliko mi n va vanaa ndɔa, o co le dɛnnda naala kɛndɛlan te, kɛ le tùú ndu pila tuu, mó tosal naa kɛndɛi o Yeesu Krista nin kabi o tasendɔ-o.

¹⁰ Kɛndɛi ken i cuu nihau cɔmnɔn a fula Yeesu Krista Vana Ciindiaa naa fula, mó cɔmnun-ndo. Yeesu sɔla kpaayaa piɔ́mndo coo, mó soli yoomu fɛɛn-fɛɛndo ceen kpendekele a Yoongu Kɛndɔɔ o kɔɔ-o.

¹¹ Lelan Hala vem ya ni, le vannda Yoongu Kɛndɔɔ dimullo, mì va kiilaa, mì va vɛlɛ vana pɛɛkaa.

¹² Lelan ya co vɛlɛ sangalan ndan biuvɔnndo ni. Kɛ siɛmbula co ya le, kani i sínà vana ya tiindan-ndo, i nɔ vɛlɛ kɔlkɛsiaa maa o nɔ kpaayaa le ɲɛ o yɔngu ya-o mandaa háá paale o kialunin yamɛi len.

¹³ Loonun sɔɔn toɲan n tuei ya o sondo-on, va tɔɔmaseloo o laalanndo a o kaola n nɔ le Yeesu Krista-o nin.

¹⁴ Manda ɲɛ kɛndɛ yɔngun nɔm le mandaa-o, Kɔl-Diandaa co naa nin-ndo co nɔm mala mì manda ndu.

¹⁵ A sínà maa vanaa co Asii-a kpow a cii ya malɔɔ, hali Fikelus nda Hɛrmosɛne bɛɛ a mal-la.

¹⁶ Màá Mɛlɛka tuinun yungu Onesifɔr-o iɲíí, kani o co ya ɲɔɔloo cuɛi-cuɛi, siɛmbula co ndu vɛlɛ biyɔɔ le co ya co o yɔlɔn-ndo le.

¹⁷ Kɛ ndóò tiiyaa dɔ́ɔ́ Rɔm, mó kindikindin, mó nuwviaa ya háá mó saalun ya.

¹⁸ Màá Maalii tosa mì Mɛlɛka tuinun ndu iɲíí o paale kialaa iyamalen. Nɔm pila sínà mɛɛ o mala ya taw Efɛs yɛ.