2Samiɛl 8 - BII BILA

David nɔla vanaa-mangalaa-isɔaa balu ndu-a

¹ O kon kɔɔli, mí David nɔla Filistia, mó tuisi nda siɛmbulan, mó soli masale ndalen yoomuan o tàndà kon nin.

² Mó nɔla vɛlɛ Moabua, mó yɛɛmbuu nda lɛŋ, mó tuu nda a yoolen le nda diwvo. Mó tuu yoolen lediin le kan diwvo, mó tuu vɛlɛ yoolen lepilɛ le kan mɛiyo yoomu. O kon, mí Moabua siŋnun cɛa le David, má va muloo malɔɔ ndu o ba.

³ Tuma Hadadesɛr, po Rehɔb va masaa Soba-o, ndóò yeema le kɔlan tàndà va o peo Efrate leeloo-o hiɔlɔɔ-o, mí David nɔla vɛlɛ kon.

⁴ Mí David bii vanaa ɲaanun o soa coo-a n'van vàá pilɛ a kɛmɛ leŋɔmmɛw a vanaa cɔvaa celen vaalan bidiin o vanaa cɔvaa Hadadesɛr-a tɛɛn. Mó bii soa ndáà bɛɛndiaa le cɔwvo-a kɛmɛ, mó manda kan le ndu pila. O kon kɔɔli, mó kili soa tɔ̀a kpow tɔndikɔɔlion.

⁵ Mí Aramiaa va Damas-a sɔɔnguu le Hadadesɛr masaa Soba cɔwvo malaa. Kɛ mí David nɔla nda, mó diw vannda vaalan bidiin a latiɔn o nda tɛɛn.

⁶ Mí David kɛsi masaa n'bungaa Aram o lɛŋnde Damas len nin, o kon mí Aramiia cal sumialii ndɔ, má va muloo malɔɔ ndu o ba. Nduyɛ, nɛɛ-nɛɛ ndóò kɔɛ pɛ le cɔwvo tosaa, Mɛlɛka ndóò sim ndu kɔɔli, ndóò nɔla yaamɔɔa o cɔwvo.

⁷ Mí David hialu kɔ̀ɔ̀la cɔwla n'sianila vanaa cɔvaa Hadadesɛr-a ndáà nɔ lan, mó kɔannun a lan Yerusalɛm.

⁸ Mí masaa David poondiaa vɛlɛ daɲan va Beta a Berotai-yon taw, kobila tiɔnnda lan yɛ o masale Hadadesɛr len bɛngu la va ni.

⁹ Mɛɛ Toi, masaa Hamat tuei maa David nɔla vanaa cɔvaa Hadadesɛr-a kpow,

¹⁰ mó viam Yoram po ndɔ o David lo, mó yoo ndu ɲɛm cɔwnun a volion, a sianion a á daɲan-ndon le ndu yilɔɔ a le ndu nuvalio yilɔɔ le cɔlɔba o cɔlɔba Hadadesɛr mó nɔla ndu-o. Kani cɔwvo va Toi nda Hadadesɛr tɛɛn.

¹¹ Mí masaa David siinguu vɛlɛ ɲɛm mun teengen le Mɛlɛka. Lende koni ndóò siinguu volion a sianin ndóò poondiaa vanaa-mangalaa-isɔaa ndóò nɔla, mí ndáà va ndu o ba bɛngu-a o ba-on kpow teengen le Mɛlɛka ni.

¹² Ɲɛm ndóò poondiaa Aramiia, Moabua, Amɔnnda, Filistia a Amalɛkea o ba-on a ɲɛm ndóò poondiaa Hadadesɛr, po Rehɔb va masaa Soba-o o ba-on pɛɛn.

¹³ David tiwvo Edɔmnda ba, mó diw vannda vaalan tɔ́ a laŋɔmaa o ból nda veelu aa Ból Ihɛllo-o nin. O muungoo, mí tɔ́ɔ́ ndɔɔ tiw nɛɛ-nɛɛ ka.

¹⁴ Mó suili masaa n'bungaa o lɛŋnde Edɔm-nden kpow nin. Mí Edɔmnnda siŋnun cɛa ndɔa. Nduyɛ, nɛɛ-nɛɛ David ndóò kɔɛ pɛ le cɔwvo tosaa, Mɛlɛka ndóò sim ndu laci ndóò nɔla yaamɔɔa o cɔwvo.

Diola vanaa bɛndua va David o ba bɛngu-a

¹⁵ Mí David tosa masalen Israɛlla kpow coo. Mó va yaman kiolɔɔ a sandei, o ve vannda hiyan te.

¹⁶ Yoab, po Seruya-o va simlacinɔ vanaa cɔwva ni, Yosafat, po Ahilud-o va vana yondaa masaa ni.

¹⁷ Sadɔk, po Ahitub-o a Ahimelɛk, po Abiatar-o va vanaa-solia-lasálàá ni. Seraya va vana sɛvaa ni,

¹⁸ Benaya, po Yoyada-o va simlacinɔɔ le Keretiia a Peletiaa va o kunda kpalilaa bɛ́ɛ̀ lemasaa tɛɛn-nda ni. Poaa David-a bɛɛ vanaa-solia-lasálàá nda va ni.