2Samiɛl 7 - BII BILA

Mɛlɛka yiilu David nda polale ndɔlen kpemaa

¹ Mɛɛ Mɛlɛka mala masaa David mó nɔla yaamɔaa ndɔa ndáà balu ndu-a kpede, mó cal o cɛi ndɔ lemasaa nin a kɔlɲuloo.

² Paale pilɛ, mí masa kon dimul Natan vana-tɛɛngaa-diom Hala-o aa: «Tofa vɔ, ya i co icali o cɛi tangulun a yɔmii sɛɛdrei-yo nin, mì kesu kpema Mɛlɛka-o ndu va o cɛi-kola-toandaa nin.»

³ Mí Natan dimul ndu aa: «Sɔɛi-sɔɛi co nɔm o kɔl, kɔ mà tosa ndi, kani Mɛlɛka co nɔm ikɛi.»

⁴ Kɛ icɔl kon, mí Mɛlɛka soaa o Natan ndo, mó dimul ndu aa:

⁵ «Kɔ dimul vana ni baalaa David aa: ‹Nuaa Mɛlɛka soo ni aa: mò va maa nɔm tengulnin ya cɛiyo mì luɛi lenin ni?

⁶ Kabi ya co nuaa, i cel-lɔ cɛinin te, kandɔɔ o paale ya soli Israɛlla Esipte len háá hau, o cɛi-kola-toandaa nin a o kùùlan bɛngu ya co kelaa ni.

⁷ Telen ya cii o kelaa nin a Israɛlla kpow-vo, o paalen ten pilɛ nin bɛɛ, i ɲuna vana pilɛ o simlacia Israɛlla tɛɛn aa la vɛ ya kɛɔ cɛiyo tengullo a yɔmii sɛɛdrei le.›

⁸ Lelan sisa, dimul David vana ni baala aa: ‹Mɛlɛka-Nɔ-Kpaayaa-Kpow-vo dimi aa: Ya cua nɔm nɛɛ n va cɔlua mandaa yondoo nin-nda ni, mí siinguu nɔm simlacinɔ Israɛlla, vanaa nia pɛɛn.

⁹ Nɛɛ-nɛɛ nɔm óò kɔɛ pɛ, i va nɔm ikɛi. Mí diw yaamɔaa nɔmnda kpow nɔm laci. Mí siinguu nɔm vana tɔ́ɔ́ bɛndoo, maa vanaa tɔ́ɔ́ bɛndua co o lɛŋnden coo-a.

¹⁰ I co vanaa nia, Israɛlla caltan ke, i tɔalnin nda lon mà vannun icali o fonda nda kon. Kpokosi-kpokosi ve lɛnin nda kɔɔli lon te, vanaa yɔŋ vɔɔnda ve lɛnin nda tiŋɔɔ maa o tasendɔ le,

¹¹ o venin vɛlɛ maa o telen yáà kɛsi Masaa kialaa n'yamaa le vanaa nia, Israɛlla masalen tosaa coo-o le. I baŋa nɔm David yaamɔaa nɔmnda kpow o ba, mí ke nɔm pɛngio. Ya Mɛlɛka, i co nɔm hau dimul maa ya tengulnin nɔm cɛiyo ni.

¹² Nduyɛ, lɔ́ɔ́ palɛi nɔmnde peelunnin fɛɛn, mà dem fuɲaa nɔmaa mamaa ciee-piɔ́m-ndo, i hɛlinin hɔ́ɔ́ fula nɔm ipulu-o pum, mì ndu koma tosa masalen o fonda nɔmndo. I siminin masale ndɔlen yili.

¹³ Ndu tangulnin cɛiyo le ya ni. I kɛsinin ndu o kpɛŋɛ lemasaa coo a kɔlɲuloo le lɔ́ɔ́-lɔ́ɔ̀.

¹⁴ Ya pila vanin fuɲa ndɔ ni, mì ndu va po nuu. Te o hun pɔw pɛ, i bandìlanin ndu mɛɛ vanndacieea bandìla vana nuaa yɛ. Te o tɛɛmbuu pɛ, i koŋ ndu mɛɛ vanndacieea koaŋ vana nuaa yɛ.

¹⁵ Kɛ i lonin o diomnde nilen coo a ndu. I melnin ndu mɛɛ ya mal Saul mí handu nɔm o fonda ndɔɔ yɛ le.

¹⁶ Le fɛɛn a fɛɛn, cɛi nɔmndo a masale nɔmnden le vanin yili. Kani kpaaya nɔm lemasaa hiilunnin te.›»

¹⁷ O kon mí Natan tɛɛngul David diomnda Mɛlɛka soo o vundulen nden nin-ndan kpow.

Piɛile David len

¹⁸ Mí masaa David kɔa, mó cal Mɛlɛka o hɔl, mó dimi aa: «Yɛɛ nɛ ya co yɛ Maalii, Mɛlɛka? Yɛɛ nɛ yungu nuu co yɛ, mì nɔm Mɛlɛka siinguu ya vana vaa lende?

¹⁹ Hiovɔɔ o kon coo, má ca vɛlɛ maa ɲɛ n tosa kon-ndo dɔɔnan nɔm o hɔl Maalii, Mɛlɛka. Má mulin má soaa vɛlɛ le dɛnɛ kɛndɛ yungu vana nɔm baalaa siɔdii laci. Lende tɔŋ vanacieo co ni, Maalii, Mɛlɛka.

²⁰ Ɔ́ɔ̀ ɲɛ ya David nɔlanin vɛlɛ dimio o diom nɔmndo kɔɔli-o Maalii, Mɛlɛka? Kani nɔm pila sina vana nɔm baalaa.

²¹ Le sɔɛi n soo-e a le mɛɛ kɔl nɔmndo co yɛ n tosa dɛnnda bɛndulan ndan le ya lan cɔmndo ni.

²² A co o bɔɔ Maalii, Mɛlɛka! Vana co maa nɔm te. Maa mɛɛ naa n tuei kabi paandu yɛ, Hala celen co o nɔm kɔɔli le.

²³ Ɔ́ɔ̀ vanaa-mangalaa-isɔaa co maa yungu nɔmndo o lɛŋnden nden coo-a, Israɛlla pɛɛn? Ɔ́ɔ̀ vanaa-mangalaa-isɔaa halaa ndaa kɔ soli o cɛlen nin, má siinguu nda vanaa ndaa, má ke nda diolan-nda? Nɔm, a tosa dɛnnda bɛndulan le Israɛlla, a tosa dɛnnda kpúlúnkùmalan le lɛŋnde nɔmnden Israɛlaa kan o hɔl, a n soli o cɛlen nin Esipte vanaa-mangalaa-isɔaa kan a halaa ndaa o ba-a pɛɛn.

²⁴ Nɔm Mɛlɛka siinguu Israɛlla vanaa nɔmnda le fɛɛn a fɛɛn ni, nɔm siŋnun Hala ndaa ni.

²⁵ Sisa yɛ niko Mɛlɛka Hala, peelu sɔɛi n soo a ya vana nɔm baalaa a á cɛi nuu o kɔɔ-e le lɔ́ɔ́-lɔ́ɔ̀, mà tosa mɛɛ n dimi yɛ.

²⁶ Màá diola nɔmndan la sɔla biiloo le lɔ́ɔ́-lɔ́ɔ̀, mì vannda va dimio aa: ‹Mɛlɛka-Nɔ-Kpaayaa-Kpow-vo co Hala Israɛlla ni!› Màá cɛi David vana nɔm baalaa lo o simia yili nɔm o hɔl le fɛɛn a fɛɛn!

²⁷ Kani nɔm Mɛlɛka-Nɔ-Kpaayaa-Kpow-vo, nɔm Hala Israɛlla pila dimul-la vana nɔm baalaa ni maa nɔm tengulnin ya cɛiyo ni. Lelan ya sɔla yoomuan le nɔm piɛilen nden tiiyallo ni.

²⁸ Sisa yɛ Maalii, Mɛlɛka, nɔm pilɛ kpé co Hala ni. Toɲaa kposon sɔɔn nɔmndon co ni. Mɛɛ n cii yɛ nin sɔɔn dɛnɛ kɛndɔn mun tuu le ya yɛ,

²⁹ dɔw niko cɛi vana nɔm baalaa duaa Maalii, Mɛlɛka, haliko mi polale nilen le koma lo o masalen coo le fɛɛn a fɛɛn. Kani nɔm Maalii, Mɛlɛka soo lende ni. Nduyɛ a duaa n dɔw-vo, yungu ya vana nɔm baalaa vanin o dɔawnan duaa le fɛɛn a fɛɛn!»