2Samiɛl 4 - BII BILA

Baana nda Rekab a dii Is-Bosɛt

¹ Lɔ́ɔ́ Is-Bosɛt, po Saul-lo tuei maa Abnɛr sɔla piɔ́mndo Hebrɔn-ndo, mí yoomuan ma fula ndu few, mí siòònde bii Israɛlla kpow.

² Is-Bosɛt, po Saul-lo ndóò nɔ simlacia kundala cɔwva nda ŋiɔn o ba bɛngu, o pilɛ diolan Baana, o pilɔɔ Rekab. Poaa Rimɔn Beerotiinɔ-a nda va ni, fulaa o polale Bensamɛn-nden nin. Kani o tàndá Bɛnyamɛn-ndo coo nda handu Beerɔt kon ni.

³ Kɛ mí vanaa va Beerɔt lon sindɛ-a ɲaanun, má kɔ viannun Kitaim, háá hau a co vɔ o sumialle lon.

⁴ Yonatan po Saul-lo ndóò nɔ poo diolan Mefibosɛt, vana bɛvɛiyo o va ni, peelun ndɔn miunndon kpow mun óò tambu ndu ni. Ndóò nɔ vɔ vɔsilan tan ŋuɛɛnu kínɛí, mí yoongoo fula Yisreɛl maa Saul nda Yonatan a vi. Mí vanalanɔ va ndu biyɔɔ-o cua ndu a kiltan le ɲaanɔnndo. Kɛ o lo keleŋaa mí poombɔɔ hialun ndu, mó del, mó siŋnun vana bɛvɛiyo.

⁵ Mí Rekab nda Baana, poaa Rimɔn Beerotiinɔ-a tiiya o Is-Bosɛt lo a paale kalalen, a komal ndu ihini pɛngio.

^6-7 Má luɛi cɛinin di maa a n'malu o lebol. Má komal Is-Bosɛt o sandaa sakpo o kpele ndɔɔ coo o ndu lo cɛinin, má buli ndu demboo. Ndáà ciiyo ndu diyɔɔ, má kialu ndu bollen. O kon kɔɔli, mí Rekab nda Baana puapilɛ ndɔ a cua bolle len, má ɲaanun. Má lɔl kɔlan pii o nɛi kɔɛ a kpengii Araba-e-o coo.

⁸ Má yoo masaa David bolle Is-Bosɛt len nɛɛ o va Hebrɔn-nda, má dimul ndu aa: «Má cè bolle Is-Bosɛt len! Po Saul yaamɔɔ nɔm-ndo pɛɛn. O va hoo nɔm kɔɔli le nɔm diyɔɔ-o. Mɛlɛka mingi hau màá le nɔm masaa Saul nda polale ndɔlen coo.»

⁹ Mí David mulul poaa Rimɔn Beerotiinɔ-a, Rekab nda Baana puapilɛ ndɔ pɛɛn, mó dimul nda aa: «Le Mɛlɛka co yoomu-o, o baŋa ya o sangalan nin kpow-vo,

¹⁰ vana dimul-la yoongu piɔ́m Saul-lo-o ndóò nɔ o kɔl maa yoongu kɛndɔɔ ndóò dimul-la lende ni. Kɛ mí viam vannda má bii ndu, má dii ndu Siklak. Nuaa ya dɔw ndu vɔ̀ngɔ̀ le yoongu ndɔ kɛndɛ o dimul-la kon-ndo ni.

¹¹ Lende koni ya tosanin a niaa vanaa kɔlvesɛyaa dii haa vana tɛɛmbuu hoo isɔɔ loo o ndu lo cɛinin, o kpele ndɔ hinia coo-a ni. Niaa bɛɛ, mɛɛ mì mingi sɔɛi piɔ́m ndɔɔ niaa pila o lebol, mì diw niaa, mì faŋa niaa o lɛŋnden coo few!»

¹² O kon kɔɔli, mí David dimul langbaa ndɔa le nda diwvo. Mí langbaa kan kili nda balan a pelon, má kɔ landu nda o limnde Hebrɔn ikɛi. Má cua niko bolle Is-Bosɛt len, má kɔ kumbu len Hebrɔn, o sɛi Abnɛr-o ikɛi.