2Samiɛl 23 - BII BILASɔɔn mɛɛlan David soo-on 1 Sɔɔn mɛɛlan David soo-on yɔŋnun mun ni: «Diomnda mɛɛlaala David, po Yisai-yo dimi lan la co lan ni, sɔɔn vana bɛndoo soo-on yɔŋnun mun ni, vana Hala Yakɔb-o pɔla mó siinguu ndu masaa-o, ò Israɛlla lisa taw o condon nin-ndo: 2 Kɔl Mɛlɛka-o kei a ya mó va sɔɛi, o handu sɔɛi ndɔɛi ya o lediɛɛmu. 3 Hala Israɛlla soo, pow kpova Israɛlla dimul-la aa: ‹Masa co masalen tosaa vanndacieea coo a sandei-yo, masa co masalen tosaa nda coo a siòòŋii Hala-e-o, 4 maa ɲɛ-tengaa paale siaa masa kon co ni, maa ɲɛ téngà tuma yumbuyumbu ve coocoo loo o co ni. Piɔɔ sia pɛ mì ɲɛ-tengaa kon fula, hangulu ndɔɔ tòsá bil kiyɛiyo fula lɛŋ. 5 Lende Hala co tosaa a yungu nuu ni: kani o yiilu ya kpema fɛɛn-fɛɛndo, o co o bɛɛndiaa ɲɛkɛndɛi, o co vɛlɛ o mandaa ɲɛkɛndɛi. O co cinda nuu a ɲɛ hɛnan ya-o solio mɛɛ ɲɛ và vulɔɔ. 6 Kɛ vanaa vo Hala le-a nda, maa yɔm n'yɔɔ vana viaw-vo nda kpow co ni, ò vana cue a ba loo pɛɛn. 7 Vana pilan ndu le, fɔ ma nɔ baw icilinndo o ba, te kon te fɔ ma nɔ piaw bállo o ba le tiindanndo. Yɔm n'yɔɔ vaa lende yɛ, o foofo vana loam ndu ni mungén!›» Kuubaa cɔvaa David-a ( 1Dɛnnda lemasalan 11.10-47 ) 8 Diola kuubaa cɔvaa va David o ba bɛngu-a la co lan ni: Yosɛb-Basebɛt Hakemoniinɔ, o kunda vanaa mandaa masaa nin o va ni. Nuaa ndáà veelu vɛlɛ ndu ni aa Adino Ɛsniinɔ. Ndu dii vannda kɛmɛ leŋɔmaa o lepilɔɔ ni. 9 O ndu kɔɔli, Eleasar po Dodo-o, po imama Ahohiinɔɔ pum. O va vana pilɛ o vanaa cɔvaa kɔɛ David kɔɔli o cɔwvo, lɔ́ɔ́ o kɔ tiŋ Filistia, mí Filistia kan cuungian le cɔwvo, mí Israɛlla ndáà helnun o pembon coo-o-a nin. 10 Ndu Eleasar kon cɛn ni mó diw Filistia háá mí baa kengela ndu, mí ba kalaa baanun o mɔɛi cɔwve. Paale len, mí Mɛlɛka yɔngu Israɛlla yoomuan taw, má nɔla yaamɔɔa. Mí vanaa cɔwva muungu Eleasar o ibuŋ, kɛ le ɲɛ vanaa o diw-va cɔwviaa daama ndáà muungu ni. 11 Ndu cɛn pɛ, Samma po Akee Harariinɔ-o. Lɔ́ɔ́ Filistia cuungian Lehi o ciɛi n'cabueende nin le cɔwvo-o, mí vanaa cɔvaa Israɛlla ɲaanun nda. 12 Kɛ mí Samma kɔ sim o ciɛi kɔllo, mó puusiaa Filistia o fonda kon, mó diw nda. Mí Mɛlɛka yɔngu Israɛlla yoomuan, má nɔla yaamɔɔa. 13 Paale pum, a telen koavaa, mí vanaa cɔwva nda yáá, fulaa o kunda n'van beleyaa-o nin, a komal David o buululan Adulam nin, kani vanaa cɔvaa Filistia ndáà hin ni, mí ndáà kila dɔ́ɔ́ngɔ́ ndaa o ból va o lɛŋnde Refaimnda nin-ndo nin. 14 David va nɛɛ ndɔa ndóò vennun kan-nda, mí kunda vanaa cɔvaa Filistia pum kɔ bii Bɛtlɛhɛm. 15 Fɔ́ɔ́fɔ̀, mí yeemɛi pum bii David, mó ɲuna aa: «Ko nɛ̀ɛ́-nɛ̀ kɔ cuu yɛnin ya mɛmma co o soon mandaa mamɛnndo nin Bɛtlɛhɛm ciee-lekɔɔ-an le kolɔɔ?» 16 Mí kuubaa cɔvaa yáá-aa kan kɔ fula fɛlɛmɛndɛn o dɔ́ɔ́ngɔ́ Filistia nin, má kɔ kɔandu mɛnndan o soon mandaa mamɛn va kon Bɛtlɛhɛm ciee-lekɔɔ-o nin, má kɔa a man, má yɔngu David. Kɛ David kol man te, mó solul Mɛlɛka man sálàá, mó cuuŋuu man lɛŋ. 17 O kon, mó dimi aa: «Mɛlɛka, i bɛnda mì kol mɛnndan man te. Mɛmndan man, sɔngɔ kooma vanaa pisi yoomu ndaa le kɔlan man kɔndɔɔ-a ma co ni.» O cɛl le man kolɔɔ le few. Dɛnnda bɛndula vanaa cɔvaa yáá-aa kan tosa lan la yɔŋnun ndán ní. 18 Abisai pɔmbɔɔ Yoab, po Seruya-o, o kunda vanaa mandaa masaa nin o va ni. Ndu hiŋ bállo ni, mó diw vannda kɛmɛ leyáá. Mó pialnun diolan taw o kunda vanaa yaa kon coo. 19 Mó siŋnun vana bɛndoo vanaa yaa kan coo, mó siŋnun simlacinɔ ndaa. Kɛ o ve o kunda vanaa yaa-a kan nin te. 20 Benaya, po Yehoyada-o, kuubanɔɔ a vana dialun kalaa o va ni, Kabseɛl ndóò fula ni. Ndu dii kuubaa cɔvaa ŋiɔnda Moab ni. Ndu koni tol vɛlɛ paale pum o soon mandaa mamɛnndo nin ni, mó kɔ dii yàlàá. Paale len, mɛmma n'kpungban ma va delio. 21 Ndu dii vɛlɛ Esiptenɔ vilɛi-vilɛi óò nɔ bállo o ba-o ni. Mó del ndu coo a cɔlɔbaa, kpélénkpélénndo va ndu Benaya kon o ba, mó hialu Esiptenɔɔ bál ndóò nɔ o ba-o o ba, mó dii ndu a bál ndɔ kon. 22 Dɛnndan ndan Benaya, po Yehoyada-o tosa ni mó sɔla tɔ́ɔ́ bɛndoo o kunda vanaa cɔvaa yáá-a tɛɛn. 23 Ndu hiow tɔ́ɔ́ kɛndɔɔ sɔla o kunda n'van beleyaa-o tɛɛn, kɛ o sulan a vanaa yáá-aa tasea le. Le hee, mí David handu ndu o vanaa va ndu kanda-a tɛɛn. 24 Asaɛl pɔmbɔɔ Yoab va o kunda n'van beleyaa-o nin. Vanaa va vɛlɛ o kunda kon nin-nda yɔŋnun haa ni: Ɛlhanan po Dodo fula Bɛtlɛhɛm-ndo, 25 Samma Harodiinɔ a Elika Harodiinɔ, 26 Helɛs Paltiinɔ, Ira, po Ikɛs Tekoanɔ-o, 27 Abiesɛr Anatɔtnɔ, Mebunnai Husatiinɔ, 28 Salmɔn Ahohiinɔ, Marai Netofaanɔ, 29 Helɛb, po Baana Netofaanɔ-o, Itai po Ribai fula Kibea o polale Bɛnyamɛn-nden nin-ndo, 30 Benaya Piratoniinɔ, Hidai fula Nahale-Kas-o, 31 Abi-Albɔn Arabatiinɔ, Asmavɛt Bahurimiinɔ, 32 Eliaba Saalboniinɔ, poaa Yasɛn-nda, o pilɛ va Yonatan ni, 33 Samma Harariinɔ, Ahiam, po Sarar Arariinɔ-o, 34 Elifelɛt, po Ahasbai-yo, po langbanɔ Maakatiinɔɔ pum, Eliam po Ahitofɛl Kiloniinɔ-o 35 Hɛsrai Karmɛlnɔ, Paarai Arbiinɔ, 36 Yikeal po Natan fula Soba-o, Bani Kadnɔ, 37 Selɛk Amɔnnɔ, Narai Beerotiinɔ ndu va vana cuaa ɲɛm cɔvun Yoab po Seruya-o-on ni, 38 Ira Yitriinɔ, Karɛb Yitriinɔ 39 a Uri Hitiinɔ. Faw-faw, n'van beleyaa a vanaa ŋɔmmɛw nda va ni. |
© Alliance Biblique en Guinée
Bible Society in Guinea-Conakry