2Samiɛl 21 - BII BILA

Yima fofolan ma luɛi le vɔsilan tan yáá le dɛnɛ vɔɔn Saul tosa paandu-o

¹ O masale David len bɛngu, mí yiaan ma luɛi o lɛŋnden nin le vɔsilan tan yáá. Mí David ɲuna Mɛlɛka le sinaa a sɔɛi ken o kɔɔ, mí Mɛlɛka mulul ndu aa: «Le tùú Saul nda yungu ndɔɔ a diw Kabaɔnnda-o yiaan man ma tol niaa coo ni.»

² O kon mí masaa veelu Kabaɔnnda, mó soaa o nda lo. Kabaɔnnda ve cuavaa Israɛl te, o Amoriia tɔ̀a lo yoomu-a nin ndáà fula ni. Mí Israɛlla ndáà yiilu nda paandu kpemaa maa ndáà yɔŋnin nda ɲɛ-ɲɛ le. Kɛ mí Saul va kindinndo le nda ciiyo le kaola bɛndu ndóò kaola Israɛlla a Yudaa-o.

³ Mí David ɲuna nda aa: «Yɛɛ kpeekpei ya tosal-lɛ́ niaa haliko mi sɔɛi he cuu naa tɛɛn, mì la dɔw vanaa co kɛ́ Mɛlɛka-o-a duaa?»

⁴ Mí Kabaɔnnda mulul ndu aa: «Sɔngɔ co naa tɛɛn naa Saul a yungu ndɔɔ-o, volin cii ndu le, sianin cii ndu le, o co vɛlɛ sɔɛi vana dii vanaciee o Israɛlla tɛɛn te.» Mí masaa ɲuna nda aa: «Mɛɛ la dimul-la ɲɛ kpeekpei niaa yeema-o, mì tosal niaa kon.»

⁵ Mí Kabaɔnnda mulul ndu aa: «Saul ndóò yeema le naa ciiyo few, mì ndóò diw naa kpow, hali vana pilɛ ndóò mɛinin yoomu o naa tɛɛn o lɛŋnde Israɛl-ten nin te.

⁶ Lelan yɔngu naa vanaa ŋɔmmɛw o poaa ndɔa tɛɛn, mì n landu nda Mɛlɛka o hɔl Kibea, kobi Saul-lo, ndu masa Mɛlɛka ndóò hɛli kon-ndo.» O kon mí masaa David cɛl aa: «Ava, i co niaa nda ke.»

⁷ Kɛ David yɔngu Mefibosɛt, po Yonatan-ndo, po imama Saul-lo le, kani ndáà cii nin kpema icanyaa yii o diola Mɛlɛka lan nda Yonatan po Saul-lo.

⁸ Mó cua Armoni nda Mefibosɛt, poaa ŋiɔŋaa Rispa, cua Aya-o ndóò vilul Saul-la, mó yɔngu nda. Mó yɔngu vɛlɛ poaa ŋuɛɛnua Mikal, cua Saul-lo ndóò vilul Adriɛl, po Barsilai fula Mehola-o-a.

⁹ Mó mal nda Kabaɔnnda o ba, má landu nda Mɛlɛka o hɔl o pembei pum coo. Mí poaa ŋɔmmɛvaa kan kpow a vu o lepilɔɔ. O telen vannda kandu ɔrse kovɔɔ-o kpafii nda dii nda ni.

¹⁰ Mí Rispa, cua Aya-o cua bɔlɔɔ, mó yambu o pow bandíláà coo. Mó lo vanvílɛ́yaa kan mandaa, kandɔɔ a telen koavaa háá mí piɔɔ hun kandu siaa nda coo. O cɛl mì yowva tol nda coo ipala le, o cɛl vɛlɛ mì visia yondoa sɔɔnguu nda ikɛi icɔl te.

¹¹ Má kɔ dimul David ɲɛ Rispa tosa kon-ndo.

¹² O kon mí David kɔa Yabɛs o tàndá Kalaad-o nin, mó kɔ bii paala Saul nda Yonatan po ndɔ lan pilacieea lon o ba. Kani paale Filistia dii Saul Kilboa, má kɔ landu nda Bɛt-Sean o luŋ-nden, vannda Yabɛs a kɔ ciimbuu paala kalalan ni, má kɔannun a lan.

¹³ Kɛ mí David kɔa, mó kɔ cua paala Saul nda Yonatan po ndɔ lan, má kɔandu vɛlɛ paala vanaa ŋɔmmɛvaa ndáà landu kan-nda.

¹⁴ Má kɔ kumbu lan latulu a paala Saul nda Yonatan po ndɔ lan Sela, o tàndá Bɛnyamɛn-ndo nin, o sɛi Kis, fuɲaa Saul-lo nin. Má tosa sɔɔn masaa ndóò dimi-on kpow. O kon kɔɔli, mí Hala ɲulul kɔllo a lɛŋnden.

Israɛlla del Filistia coo a cɔwvo

¹⁵ Mí cɔw celen can vɛlɛ Filistia tɛɛn nda Israɛlla. Mí David kɔa nda vanaa ndɔa cɔwva, má kɔ del Filistia coo a cɔwvo. Kɛ a viw bɛɛ le, mí David sanga.

¹⁶ Mí langbanɔɔ pum tuu le David diyɔɔ. Langbanɔ kon diolan aa Yisbi-Benɔb, fulaa o polale Rafa len nin. Bál idaɲaa va ndu o ba, o va lusullo le kilolan tan yáá, mɔɛi cɔvii sɛnɛiye va ndu ilandannde o yáwlen.

¹⁷ Kɛ mí Abisai, po Seruya-o mala David, mó dii Filistinɔ kon. O kon, mí vanaa cɔwva mɛnalan David aa: «A kue lɛ naa kɔɔli o cɔwvo le, yɔŋii n ɲumi ɲɛ-tengaa Israɛl.»

¹⁸ Telen pum o kon kɔɔli, má del vɛlɛ Filistia coo a cɔwvo o soon kólaa Kɔb ikɛi. O cɔw kon nin Sibekai fula Husa-o dii Saf po Rafa-o ni.

¹⁹ Tuma nda ciŋilan vɛlɛ Filistia ciŋilan celen a cɔwvo Kɔb-o, mí Ɛlhanan, po Yaare-Orekim fula Bɛtlɛhɛm-ndo dii Koliat fula Kat-o. Maa pikii nda simbulu kola lɔaa-e piaw bál Koliat kon va celullo ni.

²⁰ Mí cɔw celen tosan vɛlɛ Kat. Vana cɔwvo pum va lon bandei pila ndóò bandu ni, suon ŋɔmpum-ŋɔmpum ndóò nɔ o balan a o pelon ni. Faw-faw suon bidiin a n'hiɔɔlu ndóò nɔ ni. O polale Rafa len nin ndu bɛɛ ndóò fula ni.

²¹ Mó va Israɛlla yeowlan. Kɛ mí Yonatan po Simea, puapilɛ David-o dii ndu.

²² Filistia hiɔɔlua David nda vanaa ndɔa cɔwva diw kan-nda kpow, o polale Rafa fula kon Kat len nin ndáà fula ni.