2Samiɛl 20 - BII BILA

Seba ciŋilan David a sɔngɔɔ

¹ Vana poopoo pum va lon diolan Seba, po Bikri fula o polale Bɛnyamɛn-nden nin-ndo o va ni. Mó hɔŋ buloo, mó yonda aa: «Israɛlla, n nɔ tɔnɔ a David le, n sɔlanin kɛ́ po Yisai-yo ho o ba le. Lelan n faŋan ndu kɔɔli, mì vana-vana muungun o ndu lo.»

² O kon mí Israɛlla kpow faŋan David kɔɔli, má mulin o Seba lo, fɔ vanaa ndáà fula o polale Yuda len nin-nda daama lo masa ndaa ikɛi ni. Má cua ndu liilaa Yurdɛn háá ma kɔ tiiya ndu Yerusalɛm.

³ Masaa tiiyaa dɔ́ɔ́ o cɛi ndɔ lemasaa nin, mó veelu sámáá ndɔa tɔ́a ndóò mɛi o cɛi lemasa kon nin le ndu mandaa-a, mó luei nda o cɛiyo pum nin, mó handu kpalilla le nda mandaa, mó va kpekula ndalan toosiaa. Kɛ o sɔɔnguu lɛ o kɛ́-kɛ̀ ikɛi le ndu sinaa vanalanɔ le. Lende nda lo a mandaa ni háá má vu, a va nin ndon vanáà ca ko aa vanlaandua piaandaa ndaa vi-a ni.

Yoab dii Amasa

⁴ Mí masaa David dimul Amasa aa: «Cuungial-la vanaa cɔwva Yuda kpow nanu. I ke nɔm palɛi ndii yáá, mì nɔm pila hin a nda.»

⁵ Mí Amasa kɔa le Yudaa cuungiaa. Kɛ mí Amasa kɔ tamala, mí palɛi masaa ke ndu-e hiawnun.

⁶ O kon mí David dimul Abisai aa: «Dɛnɛ Seba, po Bikri-o hiawnin naa kindila a dɛnɛ Absalɔm tosa-o. Lelan sim vanaa cɔvaa co ya kandaa-a laci, mì la kɔɛ ndu kɔɔli, yɔŋii o kɔ luɛinun o kobila mayoomulan lapum nin, mò hɛlun naa.»

⁷ O kon mí Abisai can Yerusalɛm nda vanaa cɔvaa Yoab-a, Keretiia, Peletiia a kuubaa cɔwva kpow, má kuel Seba, po Bikri-o.

⁸ Tuma nda tiiya o pow bɛndu co Kabaɔn-ndo ikɛi-yo, mí Amasa va hunɔɔ nda laci. Volɔɔla cɔwlan la va Yoab lekɔɔ, yáwlen le va ndu lesayiannden o caŋ, mɔɛi cɔwve va ndu ilandannde o yáwle len coo, i va o boo nin. Tuma Yoab va ndu sɔɔnguuo ikɛi-yo, mí mɔɛi ken fulan, mì i del.

⁹ Mí Yoab ɲuna Amasa aa: «Puapilɛ nuu, vɛ̀ɛ̀ a co kɛndɛ?» Mó bii ndu siaiye a ba ndɔ kɛndɔɔ le ndu kɔmanndo.

¹⁰ Amasa ve sina maa Yoab ndóò nɔ mɔɛi cɔwve o baa pilɔɔ le. Mí Yoab cɔaŋ mɔɛi cɔvii ken Amasa o dembe lepilɛ kpé, mí pulun ndɔn hulun lɛŋ. O pei ndu cukɔɔ lediin te, mí Amasa vu. O kon kɔɔli, mí Yoab nda Abisai pɔmbɔ ndɔ a mɛi ndu lon, má hiawnun Seba, po Bikri-o nuwviaa.

Pilacieea Abɛl-Bɛt-Maaka kelu Seba bollen yɔŋii kobi ndaa tambu

¹¹ Mí vana cɔw Yoab-o pum lo Amasa ikɛi nɛɛ o va o vílɛ́iyo-a, mó va dimio aa: «Niaa caaŋaa Yoab-a a niaa vanaa co le David-a, la del Yoab kɔɔli.»

¹² Amasa va o lɔngɔlɛiyo o koovan nin o vílɛ́iyo o nɛi kɔllo déŋ. Lɔ́ɔ́ langbanɔ kon ce maa vannda kpow a va keiyo simndan ndon le ndu tofaa-o, mó faŋa ndu o nɛi, mó nan ndu yondoo nin, mó kuumbuu ndu doma bɛndoo pum coo.

¹³ Ndóò ciiyo dɔ́ɔ́ ndu faŋaa o nɛi, mí vanaa cɔwva kpede a del Yoab kɔɔli le Seba, po Bikri-o nuwviaa.

¹⁴ Mí Yoab kei o polama Israɛlla kpow nin, mó kɔ tiiya o kobi nda veelu aa Abɛl-Bɛt-Maaka-o nin, mó kɔa o Berimnda lo, mí nda bɛɛ cuungian, má del ndu kɔɔli.

¹⁵ O kon kɔɔli, má kɔ tiila Seba o kobio Abɛl-Bɛt-Maaka nin, má heelu puuloo bémboo háá mó tiiya helɔɔ a kpaki tase kobio kpen-kpen. Má hel lecoo, má kandu kpakio lɔwviaa le ndu kombaa.

¹⁶ Vanalanɔ kɔlkaloo pum va o kobi kon nin, mó deŋi aa: «Vannda sei, la yaŋ-ndɔ nilan! La tuei-yɔ! La dimul-la Yoab mò sɔɔnguu vɔ nanu, i yeema mì soo o ndu lo.»

¹⁷ Mí Yoab sɔɔnguu ndu ikɛi. Mí cua kon ɲuna ndu aa: «Vɛ̀ɛ̀ nɔm co Yoab ni?» Mó muli aa: «Oi, ya ni.» Mí cuaa dimi aa: «Mɛɛ fallo, yaŋ ya buɛi nɔmndo nilan, mà tuei ɲɛ ya nɔ le nɔm dimullo-o.» Mí Yoab muli aa: «Soo, i co nɔm lani.»

¹⁸ Mí cuaa dimul ndu aa: «Sindɛ, nuaa vannda ndáà dimi o sɔɔn pum coo ni aa: ‹N kɔ ɲunan-ndɔ hau Abɛl-Bɛt-Maaka, sɔɛi kalɛi co cuvɔɔ sisa.›

¹⁹ Kobi kɔlɲuloo a kobi lo o diomnden coo-o kobi naa co o lɛŋnde Israɛl-ten nin ni. Kɛ ndu nɔm yeema le tɛɛmbuuo ni. Kobi kon co o pilɛ o kobila Israɛlla kɛsi kɔllo coo lan tɛɛn. Le yɛɛ nɛ n yeema yɛ le kɛ́ Mɛlɛka-o tɛɛmbuuo?»

²⁰ Mi Yoab muli aa: «Kɛì-kɛì bɛɛ! I nɔ yiyan tɛɛmbua, mì puusiaa ɲɛ-ɲɛ le.

²¹ O co le ken te ya hin te. Vanndo ndu pilɛ kpé naa n hin kɔɔli ni. Seba, po Bikri, fula kon o tàndá n'pembu Efraim-ndo nin-ndo pɛɛn, kani ndu simul masaa David ni. La mal ndu pɛ ya o ba, la ce dɔ́ɔ́ i faŋan kobi niaa kɔɔli.» O kon mí cua kon mulul Yoab aa: «Mɛɛ n co nɔm bolle ndɔlen vuulu o kpakio kɔɔli.»

²² Mí cuaa muungu o vanaa tɔ̀a lo, mó kɔ yɔngu nda sila kɔlkalu kon. O kon, má kɔ kialu Seba, po Bikri-o bollen kpali, má vuulu Yoab len o kpakio kɔɔli. O kon kɔɔli, mí Yoab hɔŋ buloo, fɔ́ɔ́fɔ̀, mí vanaa ndɔa cɔwva mal kobio, má muungu o la nda lo. Mí Yoab pila muungu Yerusalɛm masaa David o ibuŋ.

Diola vanaa baalaa David-a

²³ Yoab va simlacinɔ vanaa cɔwva Israɛl kpow ni, Benaya po Yehoyada-o va Keretiia nda Peletiia bollen ni,

²⁴ Hadoram va pɔtɔlla bollen ni, Yosafat, po Ahilud-o va vana mandaa lasɛbɔɔ ni,

²⁵ Seba va vana sɛvaa ni, Sadɔk nda Abiatar va vanaa-solia-lasálàá ni.

²⁶ Ira fula o polale Yair len coo-o bɛɛ, vana-solia-lasálà David-o o va ni.