2Samiɛl 16 - BII BILA

¹ Tuma David hiow pembei bollen ɲɛ-pɔmbɔ-o, mó ca Siba, buɛi Is-Bosɛt-o hunɔɔ ndu laci a sofɛlɛa nda ŋiɔn a ɲɛla calaalan nda o lakɔɔ, bululan kɛmɛ lediin, dɛɛla n'rɛsɛnnda toaŋaalan kɛmɛ, voosun vesɛiyon kɛmɛ a mɔiyan hemndo pilɛ va nda o kɔɔ.

² Mí masaa ɲuna ndu aa: «Siba, yɛɛ nɛ n yeema yɛ tosaa a ɲɛlan ndan?» Mí Siba mulul ndu aa: «Àá masaa! O sofɛlɛa ha coo yungu nɔmndo helnin ni, buloo hoo a kullon mun, le balo vanaa nɔmaa cɔwva ni, mɔiyan man yɛ, le vanaa sanganin o lɛŋnde veselɛilen nin-nda bololan pɔɔlaa ni.»

³ Mí masaa ɲuna Siba aa: «Kuɛɛ nɛ Mefibosɛt, po imama vana nɔm bɛndoo co yɛ?» Mó mulul ndu aa: «O lo Yerusalɛm ciee. Kani o co yiyanndo maa Israɛlla co ndu hau masale fuɲa ndɔlen mingi o ba.»

⁴ O kon mí masaa dimul Siba aa: «I yɔngu nɔm ɲɛm Mefibosɛt-on kpow.» Mí Siba dimul ndu aa: «Mɛɛ balika masaa le ya dɛnɛ kɛndɔɔ ho tosallo.»

Simei yeow David

⁵ Masaa David tiiyaa Bahurim ciee, mí Simei, po Kera fula o polale Saul-ten nin-ndo cenelan ndu, mó va ndu yeowlan.

⁶ Hali sɛ́lɔ́ɔ́ a vanaa bɛndua va David o ba bɛngu-a va bɛɛ ndu o ba kɛndɔɔ coo a o ba mɛllo coo, mí Simei va ndu David a vanaa bɛndua va kan ndu o ba bɛngu-a viiyo a powtan.

⁷ Mó va David yeowlan aa: «Faŋan nanu! Kɔ! Nɔm vana diyaa n'vanndo ho, nɔm diɔmndo ho!

⁸ Màá Mɛlɛka tuisi nɔm sangaa coo le vanaa n diw o yungu Saul-lo nin-nda! Kani nɔm poonda Saul masalen o ba ni. Lelan Mɛlɛka siinguu Absalɔm po nɔm masa nuaa ni. A ce nihau mɛɛ dɛnɛ palaa tol nɔm coo yɛ? Nɔm, vana diyaa n'vanndo n co ni.»

⁹ O kon mí Abisai, po Seruya-o ɲuna masaa aa: «Le yɛɛ mì tun vílɛ́iyo ho va nɔm masaa, nɔm vana bɛndoo yeowlan nuaa? Mɛi-yɔ mì kɔ kiolu ndu bollen!»

¹⁰ Kɛ mí masaa mulul ndu aa: «Niaa poaa Seruya-a, le yɛɛ nɛ niaa co yɛ sondoo vowvo o sɔɛi he nin? Te o yeow ya pɛ, mɛɛ Mɛlɛka vem ndu ni aa o yeow ya David. Te lende yɛ ni, nɛ̀ɛ́ nɔla yɛnin mò ɲuna ndu aa ‹Le yɛɛ n co hee tosaa?›»

¹¹ Mí David dimul Abisai a vanaa ndɔa baalaa kpow aa: «Po ni ya pila solin o ipulu-o yeema vɔ le ya diyɔɔ, ko caan fulan hoo pɔɔli o polale Bɛnyamɛn-nden nin-ndo. Lelan, la mal ndu lon, o yeow ya, te lende Mɛlɛka dimi ni.

¹² Bɔɔle mì Mɛlɛka ce dɛnɛ ni palaa, mò tuinun ya iɲíí, mò dɔw ya duaa sɔ̀ngɔ́ yeowla nda co ya lan hau lan.»

¹³ Mí David bii nɛiyo nda langbaa ndɔa le kɔnndan, kɛ mí Simei va kɔlan a nda kpen-kpen o pembei demullo, mó va David yeowlan a ndu viiyo a powtan. O va vɛlɛ ndu viiyo a cundoo.

¹⁴ O mɛɛlulan, mí masaa David a vanaa va ndu kɔɔli-a kpow a tiiya o peo Yurdɛn kɔngɔ. Ndáà sanga nin taw, má pɛngi lon le yoomuan sɔlaa.

Husai muungu Absalɔm ikɛi

¹⁵ O kon kɔɔli, mí Absalɔm a Israɛlla kpow a tiiya Yerusalɛm. Ahitofɛl bɛɛ va ndu Absalɔm ikɛi.

¹⁶ Tuma Husai Arkiinɔ, vana silaa kpeekpei David-o tiiya Absalɔm ikɛi-yo, mó yonda aa: «Màá masaa viow yoomu naa coo! Màá o viow yoomu!»

¹⁷ Mí Absalɔm ɲuna Husai aa: «Vɛɛ nɛ n lo yɛ niko o diomnden coo a David caan nɔm? Le kɔlɔ yɛɛ la kue niaa ndu le?»

¹⁸ Mí Husai mulul Absalɔm aa: «Ɛ-ɛ, vana Mɛlɛka a Israɛlla kpow hɛli-o ya yeema ni. Lelan nɔm ya co lo kɔɔli ni.

¹⁹ Handɔɔ o kon coo, nɛɛ-nɛɛ ya co yɛ buɛilen tosal? O co nɔm po David-o le? Mɛɛ ya va fuɲa nɔm buɛilen tosallo yɛ, lende koni ya tosalnin nɔm buɛilen ni.»

Absalɔm nda sámáá David-a

²⁰ Mí Absalɔm dimul Ahitofɛl aa: «La suukan le sinaa mɛɛ naa n bɛnda le tosaa yɛ.»

²¹ Fɔ́ɔ́fɔ̀, mí Ahitofɛl mulul ndu aa: «Kɔ mà kɔ hini a sámáá fuɲa nɔm mɛi haa le cɛi lemasaa mandaa-a. Tuma Israɛlla kpow a tuɛinin sɔɛi ken-ndo, ɲɔɔ co nda pala mì fuɲa nɔm kelun nɔm vɛlɛ yii. O kon, vanaa yeema nɔm-nda kpow a sɔla niko yoomuan.»

²² Má tondul Absalɔm cɛi-kola-toandaa o bɛ́ɛ̀ lemasaa. Mó kɔ hini a sámáá fuɲa ndɔa lon Israɛlla kpow o hɔl.

²³ O telen kon yɛ, vannda va silala Ahitofɛl-tan biyɔɔ maa sɔɛi Hala. Hali David nda Absalɔm va silala ndɔlan biyɔɔ.