2Samiɛl 14 - BII BILA

Absalɔm muungu Yerusalɛm

¹ Mí Yoab po Seruya-o ca maa masaa David ɲulul kɔllo a Absalɔm.

² Mí Yoab viam vanndo vanalanɔ kɔlkaloo pum kɔɔli Tekoa, mó dimul ndu aa: «Vownun volɔɔla biisilan, suínùn cuɛima cun kɛndɛ le, ma tosa maa vana biisi komal, maa vanalanɔɔ cii palɛi taw o vana ndɔ vi-o caŋndo nin-ndo n co ni.

³ A tosa pɛ lende, a kɔɛ o masaa lo, a kɔ dimul ndu mɛɛ ya co nɔm congɔn yɛ.» Mí Yoab cɔm ndu ɲɛ ndóò bɛnda le kɔlan dimio-o.

⁴ Mí cua fula kon Tekoa-o kɔa o masaa lo, mó del lɛŋ ndu o labɛngunin, mó dimi aa: «Éé masaa, baŋa ya fɔ́!»

⁵ Mí masaa ɲuna ndu aa: «Yɛɛ yɔŋnun yɛ nɔm?» Mí cuaa muli aa: «Àá masaa, i nɔ lɛ pɔnɔ le, pɔnɔ nuu vi.

⁶ Poaa nda ŋiɔn yáà nɔ ni. Poaa ŋiɔŋaa kan lo cɔlɔbaa yondoo nin, mí o pilɛ dii o pilɔɔ, kani vana ve lon le nda kpaaliaa le.

⁷ O kon mí yungu nuu kpow toal-la kɔɔli aa mɛɛ mì ya mal vɛlɛ po ni dii kon po nuu pilɔɔ-o nda o ba mà dii ndu le diyɔɔ o dii ndu kon-ndo, aa a yeema vɛlɛ mà dii vana bɛnda le kɛ́ɔ cuaa-o. Te o tosan yɛ pɛ lende, mɛɛ kili bingi ya cal tiindanndo-o le cuulunin vɛlɛ kon mungén te? O kon, diola pɔnɔ nuu la ɲum, kani hɔ́ɔ́ ndɔ lo lɛnin yoomu o lɛŋnden nden coo le.»

⁸ O kon mí masaa dimul ndu aa: «Muungun o nɔm ndo cɛinin, i co diomndo yɔngu a sɔɛi nɔmnde o kɔɔ.»

⁹ Mí cua fula kon Tekoa-o dimul masaa aa: «Àá masaa, màá sanga co fula o dɛnɛ tambɛiyo ho nin-ndo tol ya pila a yungu nuu coo! Màá sanga kon toal nɔm masaa a masale nɔmnden coo le!»

¹⁰ Mí masaa dimi aa: «Vana-vana kɔngɔlan nɔm pɛ a cuu ya ndu nanu. Vana kon pala lɛnin nɔm te.»

¹¹ Mí cua kon dimi vɛlɛ aa: «Masaa, a yandi, yiilu ya kpemaa o diola Mɛlɛka Hala nɔmndo maa vana bɛnda le màá mingio-o handu lɛ kpundɛ celen o kpundɛ tosan-ndo coo mò diilul-la po nuu le.» Mí David mɛnan aa: «Te Mɛlɛka co yoomu, hali yiinnde po nɔmndo ten pilɛ bɛɛ le delnin lɛŋ te!»

¹² Mí cuaa dimi vɛlɛ aa: «Masaa, cɛl-la mì dimul nɔm sɔɛi pum.» Mí masaa David dimul ndu aa: «Soo.»

¹³ Mí cuaa ɲuna ndu aa: «Kɛ le yɛɛ nɛ n co yɛ niko dɛnɛ súú vaa lende tosaa a vanaa Hala-a? Mɛɛ nɔm pila langa soo nuaa yɛ, vɛ̀ɛ̀ o co yaalanndo le nɔm pila yaalan nuaa le? Kani a kɛɛ le po nɔm co o lekáá-o mingio nanu.

¹⁴ Naa kpow n hun vunin, mì n siŋnun maa mɛmma coŋ lɛŋ-ndan, vana tiw lɛ ba man kɔndɔɔ le. Kɛ o co vɔ telen Hala tuu le Absalɔm vuo le co hoo le. Lelan, o toosiaa nɛilan haliko vana co kon o lekáá-o lo o malnanndo ndu levil te.

¹⁵ Lelan, taa ce pɛ ya hau tiiya o nɔm ndo le nɔm masaa sɔɛi he dimullo, nɔm co vana ni bɛndoo-o, siòònde vannda luei ya ni. O kon ya dimi ni aa i kɔa vɔ mì kɔ cɔm masaa sɔɔn mun lenin, bɔɔle mò tuei ya vana baala ndɔɔ diom, mò tosa o ya co ndu dimul-lo!

¹⁶ O kon, mò cɛl le naa baŋaa naa po nuu vana kon o ba, o yeema hoo le naa diwvo, mò faŋa naa o kɛ́ Hala-o coo-o.

¹⁷ Kani mí ya vana nɔm baalaa dimi aa: ‹Sɔɛi nɔm vana ni bɛndoo co hunɔɔ dimi-e, nɔm masaa pɛɛn, i ɲululnin vannda kɔltan. Bau nɔm masaa, maa mɛlɛkanɔ Hala-o n co ni le dɛnɛ kɛndɔɔ a dɛnɛ vɔɔndo tueyɔɔ. Màá Mɛlɛka Hala nɔmndo lo nɔm ikɛi!›»

¹⁸ O kon, mí masaa cuaa sɔɛi mó mulul cua kon aa: «I co nɔm isɔɔ ɲuna, mà mulul-la vakpa, vin ya ɲɛ-ɲɛ le.» Mí cuaa dimi aa: «Soo masaa, i co nɔm lani.»

¹⁹ Mí masaa ɲuna ndu aa: «Vɛ̀ɛ̀ o co Yoab le cɔm nɔm dɛnndan ndan kpow le?» Mí cuaa muli aa: «Masaa, màá viow yoomu naa coo! Sɔɛi n dimi-e vana nɔla mì vana sɛɛngiaa ndi o nɛi oo nɛi coo le! Yoab buɛi nɔm vem ya ni, ndu sɔɔ ya sɔɔn mun kpow o sondo le nɔm dimullo ni.

²⁰ Le dɛnɔɔ ho mulio hɔlaa celen daama Yoab buɛi nɔm tosa nuaa ni. Kɛ nɔm masaa, maa mɛlɛkanɔ Hala-o n nɔ kɔlkaloo ni, a sina ɲɛ-ɲɛ co tosanndo o lɛŋnden coo.»

²¹ O kon mí masaa kɔ dimul Yoab aa: «I tuei ɲɛ n dimul-la-o. I cɛl le Absalɔm mingio nanu. Lelan, kɔ nuwviaa ndu, mà hin a ndu.»

²² Mí Yoab cal masaa o labɛngunin, mó tundun, mó tiiya bollen lɛŋ dí, mó mel ndu balika, mó dimi aa: «Masaa, i sina maa a ce ya hau ɲia, kani nɔm vana ni bɛndoo cɛl le ɲɛ ya tuu-o tosaa.»

²³ Mí Yoab can mó kɔa Kesur. Mó kɔ hun a Absalɔm Yerusalɛm.

²⁴ Kɛ mí masaa dimi aa: «O kɔ sanaa o ndu lo bɛɛ, o fúlà ya o hɔl te!» O kon mí Absalɔm kɔa o ndu lo bɛɛ, o ci masaa a lehɔl te.

Sɔngɔɔ cuu David nda Absalɔm tɛɛn

²⁵ O Lɛŋnde Israɛl-ten nin kpow, vana-vana ndóò tiiya hɔlla naŋɔɔ maa Absalɔm te. Kandɔɔ o bɛngu kɔllo helɔɔ háá o lebol, ndóò nɔ isɔw le.

²⁶ Vɔsi oo vɔsi ndóò cuu pɛ, mɛɛ mì ndóò kili yiinde, kani lusullo taw yiinde ndíì lusul ndu o lebol ni. Ndáà cii pɛ ndu yiinde kili, mì ndáà tuu ndi o kilo masaa coo, ndíì hiaw le kilola tiɔn.

²⁷ Hɔ́aa piaandua nda yáá a hɔ́ɔ́ laandoo o pilɛ Absalɔm ndóò velu ni. Cua ndɔ laandu kon diolan Tamar, naŋɔɔ pila ndóò naŋ ni.

²⁸ Mí Absalɔm tosa vɔsilan tan tiɔn Yerusalɛm, o del masaa lehɔl te.

²⁹ Paale pum, mí Absalɔm veelu Yoab le ndu liilaa o masaa lo, kɛ mí Yoab kɛɛ. Mí Absalɔm vim vɛlɛ ndu kiilaa le sɔɛi pilɛi ken, kɛ o kue le.

³⁰ Le hee, mí Absalɔm dimul buɛyaa ndɔa aa: «Ciɛi ɔrse Yoab-e salu pɛɛngulan a ciɛi nii ni, la kɔ mal ndi yin.» O kon, mí buɛyaa ndɔa kɔa, má kɔ loam ndi.

³¹ Fɔ́ɔ́fɔ̀, mí Yoab komal Absalɔm o ndu lo bɛɛ, mó ɲuna ndu aa: «Le yɛɛ nɛ buɛyaa nɔmnda kɔ mal-lɛ ciɛi nii yin?»

³² Mí Absalɔm mulul Yoab aa: «Le tùú yáà veelu nɔm le ya kuello o masaa lo ma kɛɛ-o. Yáà yeema mì nɔm óò kɔ ɲuna ndu kɔlɔ ya mal niko Kesur mí hun-ndo, ndóò ve fisa mì yáà lonnun ndon te? O laan ndu, mɛɛ mí tiiya o masaa lo! Te diyɔɔ o co ya ni, o dii ya.»

³³ Le hee, mí Yoab komal masaa, mó kɔ downun ndu kona a sɔɔn mun o kɔɔ. Mí masaa veelu Absalɔm, mí Absalɔm hun, mó del masaa o labɛngunin, mó tɛɛlun ndu. O kon, mí masaa kɔman ndu.