2Samiɛl 10 - BII BILA

Amɔnnda tuisi vanaa bɛndua va David o ba bɛngu-a siɛmbulan

¹ Telen pum hiovɔɔ o sɔɔn mún kɔɔli, mí masa Amɔnnda vu. Mí Hanun po ndɔ koma sul masaa o fonda ndɔɔ.

² Mí David dimi aa: «I yeema mì tosal Hanun po Nahas-o dɛnɛ kɛndɔɔ mɛɛ fuɲa ndɔ tosal-la dɛnɛ kɛndɔɔ yɛ.» Mí David viam vanaa bɛndua va ndu o ba bɛngu-a le kɔlan Hanun yilɔɔ biisi fuɲa ndɔ-o. Mɛɛ vanaa kan tiiya o lɛŋnde Amɔnnda nin,

³ mí vanaa bɛndua Amɔnnda dimul Hanun masa ndaa aa: «Nɔm ca ko aa le yilɔɔ biisio daama David vem vanaa bɛndua co ndu o ba bɛngu-a nuaa ni? A ca ko aa o co suansuaanda le o vem nuaa le hunɔɔ kobio mɛɛndianndo, le ndu sinaa a le hunɔɔ ndu tɛɛmbuuo ɲin pum te?»

⁴ Le hee, mí Hanun bii vanaa bɛndua David vem kan-nda, mó viam vannda, má sendi nda siaiyon baa pilɔɔ, má kili nda volɔɔlan lekɔɔ o pɛɛngu yɔŋnda tumndan, má mal nda niko muungoo.

⁵ Mɛɛ David tuei sɔɛi ken, mó viam vannda má kɔ dimul nda aa: «La cal Yeriko háá mì siayun niaan vil malan niaa muungu nanu.» Kani siɛmbulan láà hiw bɔɔ nda tolɔɔ.

A del Amɔnnda a Aramiia coo a cɔwvo

⁶ Mí Amɔnnda sina maa a nɛinun David le dɛnɛ nda tosa kon-ndo. Le hee, má cua vanaa cɔwva vaalan bidiin o Aramiia Bɛt-Rehɔb a o Aramiia Soba tɛɛn, má cua vɛlɛ vanaa cɔwva vàá pilɛ masaa Maaka o ba, má cua vɛlɛ vannda vaalan tɔ́ a latiɔn o vannda Tob tɛɛn.

⁷ David tueyɔɔ sɔɛi ken, mó viam Yoab a vanaa cɔwva, vanaa caa cɔwvo taw-va kpow le nda cɔlɔbaa.

⁸ Mí Amɔnnda fula, má sim polan o dio kobio sondoo kpɛɛlun le cɔwvo. Mí Aramiaa fula Soba-a, Aramiaa fula Bɛt-Rehɔb-a, vanaa cɔvaa fula Tob-a a á fula Maaka o ba-a a sim nɛɛ pum yondoo nin.

⁹ Mí Yoab ca maa vanaa cɔwva kundalan tan tiɔn la co nda hinullo ni, kunda tasoo va nda laci, o diinndɔɔ va nda a makɔɔ. Le hee, mó hɛli vanaa ndáà hiow cɔwvo caa o Israɛlla tɛɛn-nda, mó simi nda kpengii Aramiia va nda fulal-le.

¹⁰ Mó mɛi vanaa cɔvaa tɔ̀a Abisai pɔmbɔ ndɔ o ba bɛngu, mó simi nda a kpengii Amɔnnda va hunɔ̀ɔ̀ nda fulal-le.

¹¹ Mó dimul pɔmbɔ ndɔ aa: «Te Aramiia va pɛ le ya nɔlaa, a sɔɔnguu le ya malaa. Kɛ te o va pɛ maa nɔm Amɔnnda co le nɔlaa ni, mɛɛ ya kɔanin le nɔm malaa ni.

¹² Lelan, tosa vanapɔnɔyɛi, mì n tosa cɔwvo a yoomuan le lɛŋnde naalen a le kobila Hala naa. Màá Mɛlɛka tosa ɲɛ hɛnan ndu-o!»

¹³ Mí Yoab sɔɔnguu nda vanaa ndɔa cɔwva le kɔlan Aramiia delɔɔ coo, kɛ mí Aramiia ɲaanun nda.

¹⁴ Mɛɛ Amɔnnda ce Aramiia ɲaanɔnndo, mí nda bɛɛ ɲaanun Abisai, má muungun o kobi ndaa nin. O kon, Yoab cɔlɔba lɛ Amɔnnda le, mó muungu Yerusalɛm.

¹⁵ Aramiia cɔu maa Israɛlla nɔla nda, má cuungiaa vanaa ndaa cɔwva kpow.

¹⁶ Mí Hadadesɛr viam kiilaa le Aramiaa va o peo Efrate leeloo-a veeloo. Mí nda hun, má tiiya Helam. Sobak va simlacinɔ vanaa cɔvaa Hadadesɛr-a va nda bollen ni.

¹⁷ David tueyɔɔ sɔɛi ken, mó cuungiaa vanaa cɔvaa Israɛlla kpow. Mó taŋ a nda Yurdɛn leeloo, mó kɔa Helam. Mí Aramiia kɔ bɛɛndian, má simul David a cɔwvo.

¹⁸ Kɛ mí Israɛlla toaw nda. Mí David nda vanaa ndɔa cɔwva diw soa ɲaanun a ɲɛla ɲaananndan-nda kɛmɛ leŋɔmmɛw a vanaa ɲaanun o soa coo-a vaalan belehiɔɔlu. Má boli vɛlɛ Sobak va simlacinɔ vanaa cɔvaa Hadadesɛr-a-o, mó vu lon.

¹⁹ Mɛɛ masaa va Hadadesɛr o ba bɛngu kpow-va ce maa Israɛlla nɔla nda, má vow landon, má cii sɔngɔɔ nda Israɛlla. O kon, má cal nda o ba bɛngu. Lelan, Aramiia tɔɔndan ndɛ lɔ́ɔ́-lɔ́ɔ̀ le Amɔnnda malaa o cɔwvo le.