2Samiɛl 1 - BII BILA

David tuei le piɔ́m Saul-lo

¹ Saul vuo, mí David muungu o kobio Siklak nin. O nɔla o nɔla Amalɛkea-o kɔɔli o muungu Siklak ni. Mó tosa palɛi ndii ŋiin ndon.

² O paale yàándɔlen, mí langbanɔɔ pum fula o dɔ́ɔ́ngɔ́ Saul-lo nin, mó hun. Volɔɔla sɛɛsiɛilan la va ndu lekɔɔ, loolio va ndu o suiyan o lebol kpow. Ndóò sɔɔnguuo David ikɛi, mó del lɛŋ, mó baŋ vulan.

³ Mí David ɲuna ndu aa: «Kuɛɛ nɛ n co yɛ fulaa?» Mó muli aa: «O dɔ́ɔ́ngɔ́ Israɛlla nin ya cɛn ni mí sɔndan.»

⁴ Mí David ɲuna ndu aa: «Yɛɛ nɛ yɔŋnun yɛ? Dimul-la yandi.» Mí langbanɔɔ mulul ndu aa: «Vannda ɲaanun cɔwvo, vanaa bɔɔ-bɔɔ deli má sɔla piɔ́mndo. Hali Saul nda Yonatan po ndɔ, a vi.»

⁵ Mí David ɲuna ndu aa: «Vɛɛ nɛ n sina yɛ maa Saul nda Yonatan po ndɔ a vi?»

⁶ Mí langbanɔɔ muli aa: «I va o pembei Kilboa coo, kpafii mí ca Saul tundɔnndo o bál ndɔɔ coo, mí vanaa ɲaanun ɲɛla ɲaanannda soa nan-ndan-nda a vanaa ɲaanun o soa coo-a hun tiila ndu.

⁷ Ndóò mulinndo, mó ca ya, o kon mó veelu ya. Mí cɛl aa: ‹Yoo masaa!›

⁸ Mó ɲuna ya aa: ‹Vana súú yɛɛ nɛ n co yɛ?› Mí mulul ndu aa: ‹Amalɛkenɔɔ ya co ni.›

⁹ Mó dimul-la aa: ‹Mɛɛ sɔɔnguu nanu mà dii ya, kani hali yoomoo co bɛɛ ya o milin nuaa, kɛ hɔlla co ya bɔɔ hiŋndo.›

¹⁰ Yáà cɔu maa ndóò nɔla lɛ lou yoomu le, mí sɔɔnguu ndu ikɛi, mí siow ndu tɛ̀i. O kon mí cua mɔsil lemasa va ndu o lebol-lo a kelɛi va ndu o ba-e. Nua vɔ í cuu nɔm ɲɛla kalalan.»

¹¹ Mí David sɛɛsian volɔɔlan lekɔɔ, mí vanaa va ndu ikɛi-ya bɛɛ sɛɛsian volɔɔlan lekɔɔ.

¹² Má caŋ, má somisomin, má bii sumndo háá icɔllo le piɔ́m Saul nda Yonatan-ndo a le vanaa Mɛlɛka-a vi o mɔɔn cɔwvon bɛngu-a kpow, Israɛlla pɛɛn.

¹³ O kon kɔɔli, mí David ɲuna langbanɔ downun ndu kon kona-o aa: «Kuɛɛ nɛ n fula yɛ?» Mó muli aa: «Amalɛkenɔɔ pum va icali o lɛŋnden nden nin, ndu velu ya ni.»

¹⁴ Mí David ɲuna ndu aa: «Vɛ̀ɛ̀ siòòŋii bii nɔm le masa Mɛlɛka pɔla-o diyɔɔ le?»

¹⁵ Mí David veelu buɛi ndɔ felengoo pum, mó dimul ndu aa: «Dii langbanɔɔ ho!» Mí buɛi kon dii Amalɛkenɔ kon.

¹⁶ Mí David dimi aa: «Nɔm pila cii yaalan, kani a dimi maa nɔm dii masa Mɛlɛka pɔla-o ni. Lelan nɔm pila nuwviaa piɔ́m nɔmndo ni.»

Condii biisii David soli le Saul nda Yonatan caŋndo-e

¹⁷ Mí David soli condii biisiei he Saul nda Yonatan po ndɔ coo.

¹⁸ Mó dimi le poaa fula o polale Yuda len nin-nda ndi pɛɛkoo. «Condii kpaasiai ni.» Má sɛva ndi o sɛbɛ vana sandaa nin:

¹⁹ «Òó Israɛl! Yɛɛ yɔŋnun yɛ mí kuubaa cɔvaa nɔmnda sɔla piɔ́mndo? A co ihini o pembon coo lɛ́ɛ́siɛn.

²⁰ La yóndà sɔɛi he o kobio Kat nin te, la sɛ́ŋì ndi o nɛila bɛndulan Askelɔn coo le, yɔŋii cuavaa laandaa Filistia dɔwnun ɲaale, mì cuavaa laandua vanaa dii kan tooma le-a viow kponyoo.

²¹ Pembon Kilboa, màá mɔ́mndo a piɔɔ toal-lɛ niaa coo le! Màá vana ca lɛ ciɛɔn kɛndɔn niaa coo le! Kani niaa coo siɛmbulan la tol kɔ̀ɔ̀la cɔwla kuubaa cɔwva ni! Kɔ̀ɔ̀ cɔw Saul-lo suínùn ndɛnin macuɛi lɔ́ɔ́-lɔ́ɔ̀ le.

²² Mɛ̀ɛ́-mɛ̀ɛ́ vanaa vɔɔnda ndáà va sɛ́lɛ́, mɛ̀ɛ́-mɛ̀ɛ́ yaamɔɔa ndáà nɔ yoomuan, kpaasiaa Yonatan-ndo ndóò sángà a nda diwvo le, mɔɛi cɔvii Saul-le ndíì múúngù ivesɛi le.

²³ O ceen ndaa kpow nin, kaolianndo pila Saul nda Yonatan ndáà kaolian ni. Hali o piɔ́m ndaa nin, a cɛl le sɛyanndo le. Ndáà hiow kovɛa keleŋaa, ndáà hiow yàlàá yoomuan.

²⁴ Niaa vanlaandua Israɛl, la caŋ Saul! Kani ndu va niaa cuɛyɔɔ a volɔɔla sɔvɛlan ni, ndu va sianion lɛnduuo o domala niaala bɛndulan ni.

²⁵ Vɛ̀ɛ̀ kuubaa cɔwva ha looku yɛ piɔ́mndo sɔla o cɔwvo? Vɛ̀ɛ̀ Yonatan looku yɛ delɔɔ o pembon coo?

²⁶ Mɔnɛi luɛi ya o kɔl di, le nɔm Yonatan caan ni. Yáà kaola nɔm bɔɔ! Kaola nɔmndo yáà hiow yeela tueyɔɔ a kaola vanlaandua.

²⁷ Kpòkóó! Kuubaa cɔvaa bɛndu kɔɛ fɔ́! Volɔɔla cɔwla bɛndu la tambu dɛ!»