2Piɛr 3 - BII BILA

Hunɔɔ Maalii-o

¹ Caaŋaa nia hɛnan ya-a, sɛbɛ ni diinndɔɔ ya co niaa sɛvallo ho ni. O sɛbɛla tiɔnndan ndan nin kpow, i co niaa yiyalanndo haliko mi la nɔ kɔltan o sɔɔn ya co niaa dimullo-on coo.

² La loonun-ndɔ sɔɔn vanaa-tɛɛngaa-diom Hala-a diandaa dimi sindɛ-on a tɔŋ kiilaa niaa, tɔŋ Mɛlɛka-o a tɔŋ Vana Ciindiaa.

³ Ɲɛ tasoo, la sínà maa o palɛi mɛɛlɛi, vanaa mam vannda-a kuinin taw, mà mam niaa. A vanin kelaa o yeemɛi ndɛi nda pila-e coo,

⁴ a dimulnin niaa aa: «Vɛ̀ɛ̀ ndu le dimi aa o co hunɔɔ le? Mɛɛ ɔ́ɔ̀ niko ndu? Fuɲaa naa vi lɔ́ɔ́ kon, kɛ mɛɛ dɛnndan la co kabi o ceendo cɔwnɔnndo yɛ, lende koni la co vɔ ni.»

⁵ Má tosa maa lapɔɛɛnɔn, maa o co nin lɔ́ɔ́ levil, mí Hala cɔaw halataalaa a lɛŋnden a sɔɛi ndɔɛi. Mí lɛŋnden le fula o mɛnndan nin, mí le sɛyan a man, mí le tosan o sɔɛi Hala-e ken nin.

⁶ O mɛmma bɛnduma man nin ceen tasoo tambu ni.

⁷ Halataalaa a lɛŋnden nden sisa, sɔɛi Hala-e pilɛi ken co lan mandaa le lan hunɔɔ tɛɛmbuuo o yin, le paale kialaa iyamalen a le tambii vanaa vo Hala le-a.

⁸ Kɛ dɛnɛ pilɛ co, o niaa bɛnda le pɔɛɛnɔn too, caaŋaa nia: Mɛlɛka o hɔl, paalen ten pilɛ le co macoaa maa vɔsilan vàá pilɛ, mì vɔsilan vàá pilɛ la va maa paalen ten pilɛ.

⁹ Mɛlɛka tamala le sɔɛi o dimi-e peeloo maa mɛɛ vanaa pum a yiyan yɛ le. Biuvɔnndo o biwnun niaa ni, o yeema mì vana pilɛ bɛɛ lo le, kɛ o yeema mì vannda kpow a mangalan.

¹⁰ Paale Maalii hunnin-nden le komalnin naa maa vui. Paale len, halataalaa hiawnin a diom bɛndoo, mì ɲɛm co o halataala-on tambu a yinnden, o kon mì lɛŋnden a ɲɛm co lecoo-on ŋɔɛ.

¹¹ Le mɛɛ dɛnnda lan kpow la hun tosannin lende yɛ, mɛɛ la sina niko mɛɛ niaa bɛnda le tosaa yɛ! Mɛɛ mì kela niaa va o diandaa, mì la yiinun a Hala.

¹² La va o cumndo nin, mì la tosa mì paale Hala le len le keleŋa tiiya, paale halataalaa tambunin o yinnden nin, mì ɲɛm co lon-ndon tenga o yinnde biyaalen nin-nden.

¹³ Kɛ maa mɛɛ Hala dimul naa yɛ, n co halataala sɛnɛiyo a lɛŋnde sɛnɛilen cumndo, nɛɛ dɛnɛ sandaa vanin-nda.

¹⁴ Lelan caaŋaa nia, o cum kon nin, la kindikindin mo komal niaa o bɛndaa nin a ndu, o va a sɔŋ te, o va a isɔw le.

¹⁵ La sìna maa biuvɔn bɛndu Mɛlɛka-o tosa ni mí la sɔla cindaa. Sɔɛi pilɛi ken koni Pol puapilɛ naa bɛɛ sɛval niaa maa mɛɛ kɔlkalu kennun ndu-o yɔŋnun yɛ ni.

¹⁶ Lende o soo o sɛbɛla o sɛva le sɔɛi he cɔmndo nin-ndan kpow ni. Sɔɔn celen kendu bila biyɔɔ taw-von co lenin, n vanaa sina, mí laalan ndaa simul te-a co kɔlɔlan tundɔɔ, maa mɛɛ nda co tosaa a fondala celen o Sɛbɛ Hala-o nin yɛ. Nda pila co tɛɛmbɔnndo lende ni.

¹⁷ Kɛ niaa vanaa hɛnan ya-a, la sina nin sɔɔn mun, la va o lapɔɛɛnɔn nin te, yɔŋii niaa del vanaa sina Hala le-a kɔɔli, mì la sungun o foofo kɛndɛ niaa sim-ndo.

¹⁸ Kɛ la hiow laci o kɛndɛi Hala-e nin a o Maalii naa a Vana naa ciindiaa Yeesu Krista sinaa nin. Le ndu biiloo co kandɔɔ sunsun háá le fɛɛn a fɛɛn ni! Amiina.