2Nsaŋ 1 - BII BILA

Yilɔɔlan

¹ Ya bɛndu kalaa, i co sɛbɔɔ ho sɛvaa le Vanalanɔ Hala hɛli-o nda cuavaa ndɔa ya kaola o toɲaa nin-nda, o co ko ya le kaola nda le, kɛ vanaa-vanaa sínà toɲaa.

² Toɲa kon pɛɛn, o co naa o lakɔl-lo, o vanin vɛlɛ naa o lakɔl le fɛɛn a fɛɛn-ndo.

³ Kɛndɛi, ɲííye tuinɔnndo a kɔlɲuloo vanin le naa fulaa Pua Hala a Yeesu Krista, Po Pua-o o ba o toɲaa nin a o kaolaa nin.

Toɲaa a kaolaa

⁴ Ɲɔɔ hɛnan ya taw lɔ́ɔ́ ya ce cuavaa nɔmnda pum kelaa o toɲaa coo-o, maa mɛɛ tɔŋ naa n sɔla Pua o ba-o co yɛ.

⁵ Sisa yɛ, o ya co nɔm dimul-lo co hoo ni, nɔm Vanalanɔ sɔvɛɔ: n kaolian vellaa-velle. O co tɔŋ sɛnɛi le ya co nɔm sɛval kon te, kɛ tɔŋ naa n sɔla kabi o tasendɔ-o.

⁶ Kaolaa co yɛ ɲɛ celen te, kelaa o tɔŋnda Hala lan coo. Tɔŋ niaa bɛnda le kelaa coo-o co kon ni, maa mɛɛ niaa tuei ndi kabi o tasendɔ yɛ.

⁷ Vanaa luei vannda o pɔwlan nin-nda kui o ceendo coo taw, a kɛɛ le sɔlɔlanndo maa o falon nin Yeesu Krista hin lekɛ́ndɛi ni. Nduyɛ vanaa vaa lende a co vannda malɔɔ o pɔwlan nin ni, yaamɔa-Krista-a nda co ni.

⁸ La pɔɛɛnun a niaa pila le, yɔŋii baala niaa yɔŋnun fúú, kɛ mì la sɔla vɔ̀ngɔ̀ niaa mɛɛ o bɛnda yɛ.

⁹ Vana-vana kɔɛnnun pɛ polon, mò lo o pɛɛkuu Krista-o nin te, mɛɛ ndu co latulu nda Hala le. Vana lo pɛ o pɛɛkuu kon coo, ndu nɔ Fuɲaa a Poo.

¹⁰ Te vanndo hin pɛ o niaa lo, mò hin a pɛɛkuu kon te, la yiya ndu o niaa lo cɛinin te, la yil ndu bɛɛ le.

¹¹ Kani vana yil pɛ ndu, mɛɛ ndu bɛɛ cɛl dɛnnda vɔɔnda vana kon.

Sɔɔn mɛɛlan

¹² I nɔ sɔɔn celen taw le niaa, kɛ i cɛl le mun sɛvaa o sɛbɛ coo a lekpɛki le, kani i yeema mì kɔɛ o niaa lo, mì i kɔ soo niaa o lani sanaa, haliko mi ɲaale naa peelun.

¹³ Cuavaa pɔmbɔ nɔm laandu Hala hɛli-o bɛɛ a yil nɔm.