2Masaa 8 - BII BILA

Sɔɔn mɛɛlan a dɛnɛ cua Sunɛmnɔɔ o kɔɔ

¹ Mí Elise dimul cua ndóò mingi po ndɔɔ yoomu-o aa: «Cɔn mì la faŋan nanu niaa yungu nɔmndo, mì la kɔ cal nɛɛ niaa tiwnin ba-a. Kani Mɛlɛka co yima fofolan tuisi o lɛŋnden nden nin háá le vɔsilan tan ŋɔmmɛw.»

² Mí cuaa can dɔ́ɔ́ mɛɛ vana-tɛɛngaa-diom Hala-o dimul ndu yɛ, mó cua yungu ndɔɔ, má kɔ calnun o lɛŋnde Filistia nin le vɔsilan tan ŋɔmmɛw.

³ Vɔsila ŋɔmmɛwlan cuvɔɔ, mí cua kon faŋan o lɛŋnde Filistia nin, mó muungu. Mó kɔa o masaa lo le cɛi ndɔɔ a le yondo ndɔɔ ndu mingio o ba.

⁴ Tuma kon kpafii, masaa va suukanndo nda Kehasi, buɛi Elise-o. Ndóò ɲuna Kehasi le ndu dɛnnda kɔndɔfilta Elise tosa lan kpow dimullo.

⁵ Tuma Kehasi va masaa dimullo mɛɛ Elise mingi vana vílɛ́iyo yoomu yɛ-o kpafii, mí cua Elise ndóò mingi kon po ndɔɔ yoomu-o hun o masaa lo le sɔɛi cɛi ndɔɔ a yondo ndɔɔ. Mí Kehasi dimi aa: «Masaa sei, cua o mingul kon po ndɔɔ yoomu-o nda po ndɔ kon kpeekpei co haa hunɔɔ ni.»

⁶ Mí masaa ɲuna cuaa, mí ndu cuaa pila cɔm ndu mɛ̀ɛ́-mɛ̀ɛ́ i yɔŋnun kpow. O kon, mí masaa yɔngu ndu vana bɛndoo pum, mó dimul ndu aa: «Yaasiaa sɔɛi cuaa ho, ma mingul ndu ɲɛm ndɔn kpow. Mà yɔngu ndu tɔnɔ yondo ndɔɔ luei o vɔsilan ndan kpow bɛngu-o, kandɔɔ paale o faŋan nanu len háá hau.»

Hasaɛl siŋnun masaa Aram

⁷ Telen pum vɛlɛ, mí Elise kɔa Damas. Bɛn-Hadad va masaa Aram-ndo va a nàá. Má kɔ dimul ndu aa: «Vana-tɛɛngaa-diom Hala-o hin háá nanu.»

⁸ Mí masaa dimul Hasaɛl aa: «Cua ɲɛ pum ma kɔ fanda vana-tɛɛngaa-diom Hala-o. Má dimul ndu le Mɛlɛka ɲunaa, le sinaa te i siangunin a nàá ho.»

⁹ Mí Hasaɛl cua ɲɛm hiow naŋɔɔ o kobio Damas nin-ndon háá tùú ɲɔɔmɛɛa belehiɔɔlu a nɔla cuaa, mó kɔa a mun o Elise lo. Ndóò tiiyaa, mó cɔmnun ndu, mó dimul ndu aa: «Bɛn-Hadad po nɔm, masaa Aram pɛɛn, ndu vem ya o nɔm ndo nuaa ni, le nɔm ɲunaa aa vɛ̀ɛ̀ o siangunin pá a nàá ho?»

¹⁰ Mí Elise mulul ndu aa: «Kɔ dimul ndu aa o co siongɔɔ. Kɛ Mɛlɛka dimul-la maa o co vu.»

¹¹ Elise vana-tɛɛngaa-diom Hala kon lo tofaa, mí hɔlla mangalan ndu, mó pial caŋndo.

¹² Mí Hasaɛl ɲuna ndu aa: «Le yɛɛ n co yɛ caŋndo, vana ni bɛndoo?» Mí Elise muli aa: «Kani i sina dɛnɛ vɔɔn n tosalnin Israɛlla-o, a luminin kobila ndala co o kpakilan nin-ndan, ma diw langbaa felengia ndaa a mɔɛi cɔwve, ma ciimiaa cuaambɔa ndaa pɔmbɔa, ma tɛɛndiaa laandaa ndaa vanin a folilan-nda dembelan.»

¹³ Mí Hasaɛl dimi aa: «Yɛɛ ya co yɛ, ya buɛi nɔmndo, le sɔɔn bɛndun vaa lende tosaa? Ya tunndo ho!» Mí Elise mulul ndu aa: «Mɛlɛka cii ya cɔm maa a siŋnunnin masaa o lɛŋnde Aram-nden coo.»

¹⁴ Mí Hasaɛl faŋan Elise, mó muungu o vana ndɔ bɛndoo lo, mí kon ɲuna ndu aa: «Yɛɛ Elise dimul-lɛ nɔm?» Mó muli aa: «Nuaa o dimul-la ni aa nɔm vinin te!»

¹⁵ Diimandɔɔ, mí Hasaɛl cua kola kuumbanndo, mó yin ndu o mɛnndan nin, mó kuumbuu ndu masaa Bɛn-Hadad o hɔl, mí masaa vu. O kon mó koma sul masaa o fonda ndɔɔ.

Yoram siŋnun masaa Yuda

¹⁶ Yoram po Akab-o tosaa masalen vɔsilan laŋuɛɛnu o lɛŋnde Israɛl-ten coo, Yosafat va vɔ masaa Yuda, mí Yoram po Yosafat-o siŋnun masaa Yuda.

¹⁷ Ndóò nɔ vɔsilan beleyaa a latiɔn, mó siŋnun masaa. Mó tosa masalen vɔsilan tan ŋɔmaa Yerusalɛm.

¹⁸ Ndu bɛɛ maa masaa tɔ̀a va Israɛl-la koni o yɔŋnun ni, mó kela mɛɛ yungu Akab-o kela yɛ. Kani cua Akab-o ndóò yil o nɔ̀u nin ni. Mó tosa ɲɛ hɛnan Mɛlɛka loo.

¹⁹ Kɛ Mɛlɛka cɛl le masalen Yuda tɛɛmbuuo le, kani mí ndóò dimul vana ndɔ baalaa David maa poaa ndɔa tosanin masalen Yerusalɛm le lɔ́ɔ́-lɔ́ɔ̀.

²⁰ Tuma Yoram va kon masaa-o Edɔmnda simul masalen Yuda ni, mí nda pila hɛlulun masaa.

²¹ Mí Yoram kɔa Sair a ɲɛla ɲaanannda ndɔla soa nan-ndan kpow. Icɔllo, mí masaa can nda vanaa ndɔa ɲaanun ɲɛla ɲaanannda ndɔla soa nan-ndan-nda, má kɔ diw Edɔmaa áà balu nda-a. Kɛ mí vanaa cɔwva Yuda ɲaanun o cɛila-kolala-toandaala ndalan nin.

²² Cɔn a telen kon háá paalen nden, Edɔmnda cɛl le vaa o masale Yudaa bɛngu le. O telen pilɛ kon bɛngu koni kobio Libna bɛɛ ndu simul masalen Yuda ni.

²³ Sɔɔn tɔ̀un Yoram-ndon a ɲɛ-ɲɛ o tosa, kon co o sɛvaa o sɛbɛ Dɛnnda lemasalan Yuda nin.

²⁴ Mɛɛ Yoram vi, má kumbu ndu nda fuɲaa ndɔa mamaa nɛɛ pilɛ, o Kobi David-o nin. O kon, mí Ahasia po ndɔ koma sul masaa o fonda ndɔɔ.

Masale Ahasia len o tàndá Yuda-o coo

²⁵ Vɔsi Yoram, po Akab-o suili vɔsilan tɔ́ a latiɔn o masalen coo Israɛl-lo, mí Ahasia po Yoram va masaa Yuda-o siŋnun masaa Yuda.

²⁶ Ahasia ndóò nɔ vɔsilan bidiin a latiɔn, mó siŋnun masaa, mó tosa masalen vɔsio pilɛ Yerusalɛm. Diola kala ndɔlan la va Atali ni, cua Ɔmri yɔŋnun masaa Israɛl-lo o va ni.

²⁷ Mí Ahasia kela kela vɔɔndo maa yungu Akab-o, mó tosa ɲɛ hɛnan Mɛlɛka loo mɛɛ yungu Akab-o tosa yɛ. Kani lefei va ndu tɛɛn nda yungu kon.

²⁸ Mí Ahasia nda Yoram po Akab-o a yiinan, má kɔ del Hasaɛl, masaa Aram coo a cɔwvo o kobio Ramɔt co o tàndá Kalaad-o nin-ndo nin. O cɔw kon, mí Aramiia yɔŋulu Yoram.

²⁹ Mí masaa Yoram muungu Yisreɛl le boolɔnnda Aramiia ndáà booluu ndu Rama, o Hasaɛl masaa Aram cɔlɔbaa lan cɛwvo. Mí Ahasia, po Yoram va masaa Yuda-o kɔa Yoram po Akab-o yilɔɔ Yisreɛl, kani o va sangaa taw.