2Masaa 5 - BII BILA

Naaman va nàà siaŋaa-o sɔla siongɔɔ

¹ Naaman va bolle vanaa cɔvaa masaa Aram ni. Vana vana ndɔ bɛndoo ndóò ce ɲia taw-vo o va ni, kani a ndu Mɛlɛka kei le Aramiia kpaayaa yɔngoo le yaamɔaa ndaa nɔlaa ni. Kɛ a tɔ́ɔ́ bɛndu ndóò nɔ kon-ndo kpow, nàà siaŋaa va ndu.

² Nduyɛ telen pum, mí Aramiia can o nda lo, má hun del lɛŋnde Israɛl-ten coo, má bii cuaambɔle laandulen lepum, má kɔannun a len. Mí le kɔ va lanɔɔ Naaman o ba o cɛlen nin.

³ Paale pilɛ, mí cuaambɔɔ dimul cua o va kon o ba o cɛlen nin-ndo aa: «Àá! Te vana ni bɛndoo ndóò sɔɔnguu pɛ vana-tɛɛngaa-diom Hala-o Samari ikɛi, o va ndu singi a nàà siaŋaa ho.»

⁴ Mí Naaman kɔ dimul vana ndɔ bɛndoo sɔɛi cuaambɔ fula kon Israɛl-lo dimi-e.

⁵ O kon, mí masaa Aram dimi aa: «I co sɛbɔɔ sɛva, mì yɔngu nɔm, ma yoo masaa Israɛl.» Naaman vaa kɔlan Samari, mó cua volin latámán le kilolan kɛmɛ leyáá, sianion kilolan belaŋɔmpum a volɔɔla cuɛinannda kafolan tɔ́.

⁶ Mó yoo masaa Israɛl sɛbɔɔ. Sɔɔn masaa Aram ndóò sɛva lenin-ndon yɔŋnun mun ni: «I vem Naaman o nɔm ndo, simlacinɔ vanaa niaa cɔwva o co ni, ó co kɔlan a sɛbɔɔ ho-o pɛɛn, haliko ma singi ndu nàà siaŋa co ndu-o.»

⁷ Masaa Israɛl ciiyo dɔ́ɔ́ sɛbɔɔ tofaa, mó sɛɛsian volɔɔlan lekɔɔ, mó deŋi aa: «Mò va maa ya co Hala le vannda diyɔɔ a le nda mingio yoomu ni? Vɛ mó vim ya vanndo le ndu singio a nàà siaŋaa? Vannda la ce isɔɔ nɛ? Kela tandaa daama hoo cɛn ya kɔɔli nuaa ni!»

⁸ Elise, vana-tɛɛngaa-diom Hala-o tueyɔɔ maa masaa Israɛl sɛɛsian volɔɔlan lekɔɔ, mó viam kiilaa le ndu kɔlan ɲunaa aa: «Le kɔlɔ yɛɛ nɛ n sɛɛsian yɛ volɔɔlan lekɔɔ? Langbanɔ kon hún o ya lo. O sinanin maa vana-tɛɛngaa-diom Hala-o co o lɛŋnde Israɛl-ten nin.»

⁹ Mí Naaman kɔa a soa ndɔa a á ɲɛ ndɔ ɲaanan soa nan-ndo, mó kɔ sim o cɛi Elise-o sondoo.

¹⁰ Mí Elise viam kiilaa le Naaman dimullo aa: «Kɔ del bɛmbɛ leŋɔmmɛw Yurdɛn o peelo, mì dialun nɔmndon muungu n'kɛndɛ, ma sengu.»

¹¹ Mí Naaman tambu kɔl, mó va kɔnndan a dimio aa: «I va yiyanndo maa vana-tɛɛngaa-diom Hala-o ho ndóò fulanin mì naa n ciikan naa ndu, mì ndóò piɛi Mɛlɛka Hala ndɔɔ, mì ndóò piilian ya o fondala naa co ya lan, o kon mì nàà siaŋaa ho ndóò mal-la.

¹² Vɛ̀ɛ̀ peela co Damas lan, Abana a Parpar, la co fisa a mɛnndan Israɛl kpow le? Vɛ̀ɛ̀ yáà nɔla pulɔnndo lon mi yáà sengu le?» Mó mulin kɔnndan a kɔltuwvo.

¹³ Kɛ mí buɛyaa ndɔa sɔɔnguu ndu ikɛi, má dimul ndu aa: «Éé Pua! Te vanaa-tɛɛngaa-diom Hala-o ho ndóò dimul nɔm pɛ le dɛnɛ kàlà-kálàá pum tosaa, vɛ̀ɛ̀ nɔm óò tosanin te? Ɛ̀ɛ̀ le yɛɛ n co yɛ niko kɛɔ le ɲɛ o dimul nɔm-ndo tosaa? Aa nɔm del o peelo daama, mà sengu.»

¹⁴ O kon mí Naaman del bɛmbɛ leŋɔmmɛw Yurdɛn o peelo, maa mɛɛ vana-tɛɛngaa-diom Hala-o ndóò dimi yɛ. Mó siangu, mí yáw ndɔɔ muungu maa yáw poombɔ pɔmbɔ.

¹⁵ Mí Naaman muungu nda vanaa va ndu kɔɔli-a kpow o vana-tɛɛngaa-diom Hala-o lo. Ndóò tiiyaa, mó dimul ndu aa: «I sina o laan maa o lɛŋnden kpow coo, hala celen co o Hala Israɛlla kɔɔli le. Lelan cɛl ɲɛ ya buɛi nɔmndo cuu nɔm-ndo.»

¹⁶ Kɛ mí Elise muli aa: «Te Mɛlɛka ya co hoo simndan o hɔl le ndu baalaa tosallo-o co yoomu, i biinin ɲɛ-ɲɛ le.» Mí Naaman baŋnun ndu lafi-lafi le ɲɛm mun biyɔɔ, kɛ mó kɛɛ.

¹⁷ O kon mí Naaman dimi aa: «Mɛɛ n kɛɛ ɲɛm ya ke nɔm-ndon yɛ, cɛl ma ke ya puuloo tùú milɛaa ŋiɔn a cua kpafii. Kani i yeema lɛ mì soli sálà loamaa, te kon te sálà kɔlɲulu le halaa celen te, fɔ le Mɛlɛka.

¹⁸ Kɛ, màá Mɛlɛka mal ya buɛi nɔmndo haki le o ya kɔ vanin tosaa-o. Kani vana ni bɛndoo, masaa Aram luɛi pɛ o máán Rimɔn hala ndɔɔ nin le ndu sooloo, i bɛnda mì tundun háá lɛŋ naa ndu latulu. Bau o congú nuu coo o tiindàn ni. Lelan, màá Mɛlɛka mal-la haki le ɲɛ ya tosanin kon-ndo.»

¹⁹ Mí Elise dimul ndu aa: «Màá kɔ va kɛndɛ!» Mí Naaman kɔannun. Naaman kue bɛɛ levil te,

Nàà siaŋaa bii Kehasi le hɔlte bolofaale ndɔlen

²⁰ mí Kehasi, buɛi Elise vana-tɛɛngaa-diom Hala-o dimin o kɔl nin aa: «Vana ni bɛndoo cɛl le ɲɛm Naaman Aramiinɔ hin mùn-ndon biyɔɔ le. Kɛ nduyɛ, te Mɛlɛka co yoomu, mɛɛ mì dem ndu, mì kɔ sɔla ndu ɲɛ pum o ba!»

²¹ O kon mí Kehasi mal a kiltan le Naaman bendallo. Naaman cɔnnɔnndo ndu hunɔɔ kɔɔli a kiltan, mó keleŋa tolɔɔ o ɲɛ ɲaanan ndɔ soa nan-ndo coo, mó kɔa ndu bɔŋa, mó ɲuna ndu aa: «Yɛɛ yɔŋnun yɛ?»

²² Mí Kehasi muli aa: «N co kɛndɛ! Vana ni bɛndoo vem ya ni aa ya hun dimul nɔm aa langbaa nda ŋiɔn koma hun ndu o bɛngu coo fulaa o kunda vanaa-tɛɛngaa-diom Hala-a nin, o tàndá n'pembu Efraim-ndo nin. A yandi, aa nɔm yɔngu ndu volin latámán kilolan beleyaa a volɔɔla cuɛinanndan latiɔn.»

²³ Mí Naaman dimi aa: «Cɛl ma bii volin latámán kilolan belaŋɔmpum.» Mó baŋnun ndu kangalan, mó vow volin kalan o bɔlɔlan tan tiɔn nin, mó cua vɛlɛ volɔɔla cuɛinannda tiɔnndan, mó handu lecoo. Mó siiluu buɛyaa ndɔa nda ŋiɔn volɔɔla lan, má liila Kehasi a lan.

²⁴ Ndáà tiiyaa Ofɛl, mí Kehasi bii nda volɔɔla lan o ba, mó luei lan o ndu lo cɛinin, mó mingi vanaa liila ndu kan-nda, má kɔannun.

²⁵ O kon mí Kehasi kɔa nɛɛ Elise vana ndɔ bɛndoo va-a, mí Elise ɲuna ndu aa: «Kehasi sei, kuɛɛ nɛ n va yɛ?» Mó muli aa: «Buɛi nɔmndo ve nɛɛ-nɛɛ le.»

²⁶ Kɛ mí Elise dimul ndu aa: «Kɔl nuu va lon telen langbanɔɔ pum va tolɔɔ o ɲɛ ɲaanan ndɔ soa nan-ndo coo le nɔm bɔŋaa-o. Vɛ̀ɛ̀ telen biyaa lavolɔɔ a telen biyaa n'volio co hoo ni? Sisa a sɔla volion le nakɔla olivieelan a nakɔla n'rɛsɛnndan piondɔɔ a mun, le cɔlua pɔmbɔa a cɔlua bɛndua piondɔɔ a mun a le cɛa piaandua a cɛa laandua piondɔɔ a mun.

²⁷ Nàà siaŋa va Naaman-ndo co nɔm biyɔɔ a polale nɔmnden kpede, mò va niaa coo le fɛɛn a fɛɛn.» O kon, mí Kehasi faŋan Elise ikɛi, mí nàà siaŋaa fula ndu, mí kɔɔlen kpow le siŋnun ndu lehumbu fo-fo maa fengbɔ.