2Masaa 19 - BII BILA

Esekia ɲuna Esai vana-tɛɛngaa-diom Hala-o

¹ Masaa Esekia tueyɔɔ dɔ́ɔ́ kona kon, mó sɛɛsian volɔɔlan lekɔɔ, mó vownun volɔɔla biisilan, mó kɔa o Cɛi-Mɛlɛka-o nin.

² Mó viam Eliakim, simlacinɔ cɛi lemasaa, Sɛbna vana sɛvaa a kaasoŋaa kɔlkalua o vanaa-solia-lasálàá tɛɛn o Esai vana-tɛɛngaa-diom Hala-o lo, po Amɔt-o pɛɛn. Vanaa kan bɛɛ volɔɔla biisilan la va nda lekɔɔ.

³ Má kɔ tɛɛngul ndu diom Esekia dimi-o aa: «Paalen nden paale dɛnɛ palaalen, paale imɔnɔlen a paale sangaalen le co ni. Kani hɔ́ɔ́ co nin hunɔɔ le violɔnndo, kɛ yoomuma vialaama co kala ndɔ le.

⁴ Bɔɔle Mɛlɛka Hala nɔmndo tuɛinin sɔɔn bolle vanaa yɔngù masaa Asiri mɔiyan-nda dimi-on kpow, o ndu masaa Asiri vem hoo le hunɔɔ Hala yoomaa yeowlan-ndo pɛɛn. Bɔɔle mi Mɛlɛka Hala nɔmndo tuisi ndu dɛnɛ palaa coo le yeowla o tuei lan. Lelan piɛi Mɛlɛka le vanaa tɔ̀a lo yoomu-a.»

⁵ O kon mí vanaa baalaa masaa Esekia-a kɔa o Esai lo.

⁶ Mí Esai dimul nda aa: «La kɔ dimul vana niaa bɛndoo aa diom Mɛlɛka dimi-o co hoo ni aa: Siòòŋii bii ndu le sɔɔn o tuei mun-ndon te, sɔɔn vanaa baalaa masaa Asiri soo mun má tɛɛmbuu ya labɛɛ lenin kpede-on pɛɛn.

⁷ I co ndu yiyanndo pum malɔɔ o kɔl, te o tuei dɔ́ɔ́ pɛ yoongoo pum, o cannin mò muungu o lɛŋnde ndɔlen nin. O lɛŋnde ndɔle len nin ya tuisinin ndu mɔɛi cɔwve coo ni.»

Sennakerib kɔngɔlan vɛlɛ Yerusalɛm

⁸ Mí bolle vanaa yɔngù masaa Asiri mɔiyan-nda tuɛi maa vana ndɔ bɛndoo, masaa Asiri cɛn Lakis mó kɔ del kobio Libna coo a cɔwvo. Mó muungu, mó kɔ komal ndu lon.

⁹ Kani nuaa masaa Asiri ndóò tuei yoongoo ni aa Tirhaka masaa Etiopii co ndu hinullo a cɔwvo. O kon, mí masaa Asiri vim Esekia kiilaa, má kɔ dimul ndu aa:

¹⁰ «La kɔ dimul Esekia masaa Yuda aa Hala ndɔ o tiindan kon-ndo hiŋ ndu hɔlla le pá! Màá o dimul ndu aa kobio Yerusalɛm delnin ya masaa Asiri o ba le le dɛ!

¹¹ Nɔm pila tuei mɔnɛ masaa yɛ́-yɛ́a Asiri a soli paandu a lɛŋnde kpow-vo, má tɛɛmbuu ndi few-few. A laalan maa nɔm co hiɔlɔn?

¹² Vɛ̀ɛ̀ mí halaa vanaa-mangalaa-isɔaa fuɲaa nia mamaa diw-va tiw pá ba nda baŋaa? Vannda Kosan, vannda Haram, vannda Rɛsɛf a poaa Edɛŋaa co Telasar-a pɛɛn.

¹³ Kuɛɛ masaa Hamat, masaa Arpad, masa kobio Sefarvaim, hoo Hena a masaa Iva co yɛ?»

Piɛile Esekia len

¹⁴ Mí Esekia bii sɛbɔɔ kiilaa o ba, mó tofa ndu. O kon kɔɔli, mó hel a ndu o Cɛi-Mɛlɛka-o nin, mó kɔ cɔm Mɛlɛka ndu.

¹⁵ Mó piɛi Mɛlɛka aa: «Mɛlɛka, Hala Israɛlla, nɔm co icali mɛlɛkaa kanda ɲɛm Hala-on-nda tɛɛn-ndo, nɔm pilɛ kpé co Hala le masɛi kpow o lɛŋnden coo ni, nɔm soli halataala a lɛŋnden ni.

¹⁶ Mɛlɛka, yaŋ ya nilan ma tuei ya diom. Kumbi hɔltan ma ce. Kámáá a tuei sɔɔn Sennakerib-on, ó vem vana ndɔ baalaa le nɔm Hala yoomaa yeowlan-ndo?

¹⁷ Mɛlɛka, i co toɲa maa mí masaa Asiri diw vanaa-mangalaa-isɔɔa, má tɛɛmbuu lɛŋii ndɛi,

¹⁸ ma loam halaa ndaa, kani a ve halaa kpeekpei le, vanndacieea cɔw nda ni, a yɔmnde a á powtan nda sɛl nda ni.

¹⁹ Kɛ nɔm Mɛlɛka, Hala naa, baŋa naa Sennakerib o ba, haliko mi masɛi o lɛŋnden coo kpow i sina maa nɔm Mɛlɛka, nɔm pilɛ kpé co Hala ni.»

Esai tɛɛnguu muli Mɛlɛka-o

²⁰ Mí Esai po Amɔt-o viam vanndo o Esekia lo a diomndo ho aa: «Diom Mɛlɛka Hala Israɛlla dimi-o co hoo ni aa: ‹I tuei piɛile n piɛi ya le masaa Asiri len, Sennakerib pɛɛn.

²¹ Sɔɔn ya Mɛlɛka dimi a ndu o kɔɔ-on co mun ni: Kobio Siɔn pɛɛsa nɔm, o co nɔm mamɔɔ. Yerusalɛm co nɔm tɛɛndanndo, a bollen hiiloo nɔm kɔɔli.

²² Ɔ́ɔ̀ vana n va yeowlan-ndo? Nɛ̀ɛ́ n va yɛ tɛɛndanndo? A nɛ̀ɛ́-nɛ̀ n va yɛ sɔɛi coocoo nuaa? A heelu hɔlla le O-Diandaa Israɛl ciŋilanndo dɛ!

²³ Nɔm, ma viam kiilaa le hunɔɔ Mɛlɛka yeowlan. Ma dimi aa: Ya Sennakerib, mí hel o pembon Liban tullo a ɲɛla ɲaanannda nila sɛ́lɛ́ bɛndula soa nan-ndan, le kɔlan yɔmii sɛɛdrii ndɔɛi hiow naŋɔɔ-e a siprɛsii ndɔɛi hiow bandei-ye kiolɔɔ. Mí tiiya o cieo kɔllo déŋ, mí kialu yɔmii tɔalɛi hiow bandei-ye.

²⁴ Mí toaw soonnda mamɛnndan, mí muungu mɛmma celenndan kolɔɔ, i pila dɔ́ɔ́ pɛ pelei Esipte, peelan Esipte kpow la co vela.›

²⁵ Nɔm Sennakerib, a sina vɔ le? A tui maa paandu nin pá le ya Mɛlɛka bɛɛndiaa dɛnɔɔ ho le? Paandu nin pa ya toosiaa mun ni, nihau ya co dɛnɛ kon peeloo ni. Baala nɔmndo co le kobila co o kpakilan nin-ndan mingio bémbélan ni.

²⁶ Vanaa co o kobila lan nin-nda nɔ kpaaya le, siòònde a siɛmbulan la bii nda, maa billo yondoo nin nda co ni, bil puiyaa tɛsu-tɛsoo, maa bil pɔmbɔ vul o cɛilan coo-o nda co ni, maa malun nàà latɔlɔɔ bii lɔ́ɔ́ pá mi n sul-lon nda co ni.

²⁷ Kɛ ya Mɛlɛka, i sina dɛnnda nɔmndan, i sina telen n cal-lo, i sina telen n fula-o a telen n luɛi-yo, telen n tosa yolɛi a ya-o bɛɛ i sina.

²⁸ Le tùú n tosa yolɛi a ya, mí yonga nɔmndo tiiya ya o lani-o, i co nɔm kelɛi baa o milin, mí vow nɔm kalafoo o sondo, mí mingi nɔm o nɛi n kei ma hun-ndo coo.»

Tɔɔmasele yɔngun Esekia-o

²⁹ «Le nɔm Esekia yɛ, tɔɔmaseloo co hoo ni: nanndee, malun vulnin a ba ndɔ-on vannda vanin dioo ni, ɲinasiaŋ bɛɛ, malun vulnin a ba ndɔ-on vannda vanin dioo ni, kɛ o vɔsi yàándɔɔ nin ndu, niaa pila bɛnda mì la saŋ mì la kow, mì la tɔl rɛsɛnndon, mì la de kɔmnde ndɔlen.

³⁰ Vanaa lonin yoomu o yungu Yuda-o tɛɛn-nda, a vanin vɛlɛ maa yɔm tuisi puundun ndɔn o lɛŋnden bɛngu, mí lɛvun ndɔn va kullon komɔɔ lecoo-o.

³¹ Kani vannda lonin yoomu Yerusalɛm, vannda hialunnin-nda vanin icali o pembei Siɔn coo. Ɲɛ Mɛlɛka-Nɔ-Kpaayaa-Kpow-vo tosanin a dialun fulan le kaola ndɔɔ cɔmndo-o co kon ni.»

Mɛɛlula Sennakerib lan

³² «Lelan diom Mɛlɛka dimi a masaa Asiri o kɔɔ-o co hoo ni aa: ‹O lueinin o kobio ho nin te, o vuunin kɔɛi o kobio ho nin te, o cɔlɔbanin ndu a kɔ̀ɔ̀la cɔw o ba le, o tuwnin soon cɔw le kobio ho delɔɔ coo a cɔw le.

³³ Nɛi o kei coo mó hun-ndo, ndu o keinin coo le muungoo ni, o lueinin o kobio ho nin te few. Mɛlɛka dimi lende ni.

³⁴ Ndu Mɛlɛka kandanin kobio ho le ndu ciindiaa, le ndu pila a le David vana baala ndɔ.›»

Piɔ́m Sennakerib-o

³⁵ Icɔl kon, mí mɛlɛkanɔ Hala-o toal o dɔ́ɔ́ngɔ́ Asiriia nin, mó diw vannda vaalan kɛmɛ belaŋɔmaa a à ŋuɛɛnu. Vannda cɔnɔnndo idiiyo, má ca vanvílɛ́iya a tiuvaa sɔ́.

³⁶ O kon, mí Sennakerib, masaa Asiri puusiaa dɔ́ɔ́ngɔ́ɔ̀, mó muungun Ninive, mó kɔ cal lon.

³⁷ Paale pilɛ niko, o va o máán ndɔɔ nin, o va Nisrɔk hala ndɔɔ sooloo, mí poaa ndɔa ŋiɔnda, Adramelɛk nda Sarɛsɛr a kɔ dii ndu a mɔɛi cɔwve, má sɔndan, má kɔannun o lɛŋnde Ararat len nin. Mí Esar-Hadɔn po ndɔ koma sul masaa o fonda ndɔɔ.