2Masaa 18 - BII BILA

Esekia siŋnun masaa Yuda

¹ O vɔsi Osee po Ela-o suili vɔsilan layàá o masalen coo Israɛl-lo, mí Esekia po Ahas-o siŋnun masaa Yuda.

² Ndóò nɔ vɔsilan bidiin a laŋuɛɛnu mó siŋnun masaa. Mó tosa masalen vɔsilan bidiin a laŋɔmahiɔɔlu Yerusalɛm. Abi cua Sakari-o va kala ndɔ ni.

³ Mó tosa ɲɛ bɛnda Mɛlɛka o hɔl-lo mɛɛ David fuɲa ndɔ mama ndóò tosa yɛ.

⁴ Mó tɛɛmbuu tombon, mó pesipesi powta sálàlan, mó puusiaa yɔmii soolɛi, mó kilikili kɛw n'daɲa Moise ndóò toosiaa-o, kani háá a telen kon Israɛlla va vɔ cuɛima cun kɛndɛan lomɔɔ le kɛw kon, nuaa ndáà veelu kɛw kon ni aa Nehustan.

⁵ Mó kɛsi kɔl ndɔɔ Mɛlɛka Hala Israɛlla coo. O masaa Yuda tɛɛn kpow, a tosa masalen ndu tase-a a á koma tosa masalen ndu kɔɔli-a, masa-masa yɔŋnun maa ndu Esekia le.

⁶ Mó yiinun a Mɛlɛka. O feŋan ndu o ibuŋ te few. Mó bii silala Mɛlɛka ndóò sɛval Moise lan.

⁷ Lelan, mí Mɛlɛka va ndu Esekia ikɛi, mí kpekula ndɔlan kpow la va diondɔɔ. Mó simul masaa Asiri, mó kɛɛ le vaa ndu o ba bɛngu.

⁸ Mó nɔla Filistia, mó toaw nda háá o tàndá Kaasa-o nin, mó tɛɛmbuu lɛŋnde ndalen kandɔɔ a fondala cumulaalan, kɔlan tiiyaa háá a kobila co o kpakilan nin-ndan nin.

Vɔsi yaamɔɔa bii kobio Samari-o

⁹ O vɔsi hiɔɔlundɔɔ nin o masale Esekia le bɛngu, vɔsi kon va vɔsi ŋɔmmɛwndɔɔ o masale Osee po Ela-o len bɛngu Israɛlla coo ni, mí Salmanasar, masaa Asiri hinul kobio Samari a cɔwvo, mó tiila ndu.

¹⁰ Vɔsilan tan yáá o kon kɔɔli, má bii kobi kalaa. Vɔsi kon yɔŋnun vɔsi ŋɔmpumndɔɔ o masale Esekia len bɛngu ni, vɔsi kon koni yɔŋnun vɛlɛ vɔsi ŋɔmahiɔɔlundɔ o masale Osee len bɛngu Israɛlla coo ni. Vɔsi kon nda bii kobio Samari ni.

¹¹ Mí masaa Asiri kɔa a Israɛlla o biyɔɔ nin o lɛŋnde Asiri len nin. Mó yaa nda o tàndá nda veelu aa Halah-o nin, o peo Habɔr kɔngɔ o tàndá Kosan-ndo nin a o kobila Mɛdea nin.

¹² Kon tosan le tùú nda yeŋ Mɛlɛka Hala ndaa lani loo, le tùú nda tɛɛmbuu kpema ndɔɔ má kɛɛ le nilan yaŋɔɔ o sɔɛi ndɔɛi-yo a le tùú nda kɛɛ vɛlɛ le kelaa lecoo-o, sɔɛi ken pɛɛn, i Mɛlɛka ndóò dimul Moise vana ndɔ baalaa-e.

Sennakerib masaa Asiri ciŋilan masalen Yuda a cɔwvo

¹³ O vɔsi tɔ́ a o hiɔɔlundɔɔ nin o masale Esekia len bɛngu, mí Sennakerib masaa Asiri hinul kobila va o kpakilan nin o tàndá Yuda-o nin-ndan kpow a cɔwvo, mó bii lan.

¹⁴ Mí Esekia masaa Yuda viam kiilaa o masaa Asiri lo, nɛɛ o va o kobio Lakis nin-nda le ndu dimullo aa: «I nɔ dí le! Hinul-la le, muungun, bɔnɔ oo bɔnɔ n kilul-la pɛ, i yɔngu.» O kon mí masaa Asiri luei Esekia, masaa Yuda bɔnɔɔ volin latámán kilolan vàála ŋɔmahiɔɔlu a sianion kilolan kɛmɛ leŋɔmahiɔɔlu.

¹⁵ Mí Esekia yɔngu volin va o Cɛi-Mɛlɛka-o, a o cɛi bolofaa lemasa nin-ndon kpow.

¹⁶ O telen kon, mí Esekia buwviaa pɛngɛn n'sianin ndóò yikpia o koŋndan a o kèéden Cɛi-Mɛlɛka-o coo-on, mó yɔngu masaa Asiri mun kpow.

Sennakerib kɔngɔlan Esekia

¹⁷ Masaa Asiri lo Lakis, mó viam simlacinɔ tase vanaa ndɔa cɔwva, bolle vanaa bɛndua va ndu o ba bɛngu-a a bolle vanaa yɔngù masaa mɔiyan-nda o Esekia lo Yerusalɛm. Mí vanaa kan kɔa a vanaa cɔwva taw kɔɔli. Ndáà tiiyaa, má kɔ sim o soon mamɛn co a ba luaŋ-ndo-o, o nɛi kɔɛ a ba yondo vanaa tɔaa lavolɔɔa-o.

¹⁸ Má yeema le masaa cɔu, kɛ mí Eliakim po Hilkiya simlacinɔ cɛi lemasaa, Sɛbna vana sɛvaa a Yoa po Asaf vana mandaa lasɛbɔɔ a kɔa nɛɛ nda va-a.

¹⁹ Mí bolle vanaa yɔngù masaa Asiri mɔiyan-nda dimul nda aa: «La kɔ dimul Esekia aa diom masaa bɛndoo dimi-o co hoo ni, masaa Asiri pɛɛn aa: ‹Ɔ́ɔ̀ ɲɛ n tiindan-ndo?

²⁰ Kani a soo sɔɔn fondon, ma dimi aa: le cɔwvo tosaa, fɔ taasio a kpaayaa. Nɛ̀ɛ́-nɛ̀ n tiindan yɛ niko kpeekpei le ya simullo?

²¹ Kámáá Esipte le n tiindan te? Mɛɛ vana tiinda baa o kpɛ̀ndɛ̀le yomɛilen coo nuaa, mì le cuku vana baa, mì vana bolin yɛ Esipte co ni. Lende Faraɔnnɔɔ, o co masaa Esipte-o co le vanaa tiindan ndu-a kpow ni.

²² Bɔɔle mi la dimul-la aa: Mɛlɛka Hala naa naa n tiindan ni. Kɛ vɛ̀ɛ̀ o co sooluula ndɔlan a tombun ndɔn te Esekia tɛɛmbuu, mó dimul vannda Yuda a haa Yerusalɛm aa a va hunɔɔ o sooluulan Yerusalɛm te?›

²³ Lelan la tɔɔndian-ndɔ niaa vana ni bɛndoo, masaa Asiri pɛɛn. Taa nɔla pɛ vanaa ɲaanun o soa coo-a sɔlaa, i yɔngu nɔm soa vàálan tan tiɔn.

²⁴ Vɛ̀ɛ̀ n tiw yɛnin ba hali masa ibunga vana ni bɛndoo o pilɛ tovɔɔ, o hiow dɔɔnanndo o vanaa ndɔa baalaa tɛɛn-ndo pɛɛn? Le nɔm ɲɛla ɲaanannda soa nan-ndan a vanaa ɲaanun o soa coo-a yɔngoo le n co Esipte tiindanndo nuaa le?

²⁵ Vɛ̀ɛ̀ o co hɛnan Mɛlɛka-o le vem vana ni bɛndoo fondaa ho hinullo le ndu tɛɛmbuuo le? Mɛlɛka pila dimul ndu ni aa o hinul lɛŋnden nden a cɔwvo, mò tɛɛmbuu len.»

²⁶ O kon, mí Eliakim po Hilkiya-o, Sɛbna a Yoa a dimul bolle vanaa yɔngù masaa Asiri mɔiyan-nda aa: «Yandi, soo o naa buɛyaa nɔmnda lo o aramei nin, kani n tuɛi sɔɛi ken. Kɛ soaa o naa lo o sɔɛi mangalɛi Yuda nin te, yɔŋii vanaa co o kpakio coo-a sina sɔɛi naa n co-e.»

²⁷ Kɛ mí bolle vanaa yɔngù masaa Asiri mɔiyan-nda mulul nda aa: «A ca ko aa o vana nɔm bɛndoo lo a o nɔm pila lo daama vana ni bɛndoo vem ya sɔɔn mun dimio ni? O vanaa co kan icali o kpakio coo-a lo kpow o vem ya ni, kani niaa ndaa vanin poola niaala niaa pila lan dioo a tuilima niaama niaa pila-an kolɔɔ ni.»

²⁸ Mí bolle vanaa yɔngù masaa Asiri mɔiyan-nda sim, mó yonda o hebrei nin kpélén aa: «La yaŋ nilan o diom masa bɛndoo dimi-o, masaa Asiri pɛɛn!

²⁹ Diom masaa dimi-o co hoo ni aa: ‹La puulun Esekia le, kani o nɔlanin niaa baŋa ya o ba le.

³⁰ Esekia viam niaa kɔlan Mɛlɛka tiindanndo le. Bɔɔle mò dimul niaa dɔ́ɔ́ aa a toɲa Mɛlɛka baŋanin niaa, o kon kobi niaa ho delnin ya masaa Asiri o ba le.

³¹ La yaŋ ndu Esekia lani le dɛ! Kani ya masaa Asiri, i dimi aa la nuwviaa kɔlɲuloo ya o ba, la hun cal-la o labɛngunin, haliko mí vana-vana de rɛsɛŋun ndɔn a voosun ndɔn tɔnɔ, mò kol mɛmma soon ndɔ kólaa,

³² háá mi hin, mì hun kɔ a niaa o lɛŋnde velan a lɛŋnde niaalen-nden nin, lɛŋnde maalon, mɔiyan, buloo, rɛsɛnndon, oliveon macuɛiyon a lɛan ma co nin-nden, o kon la vanin yoomu, la vinin te. Lelan la yaŋ Esekia lani le few! Kani o dimi pɛ aa Mɛlɛka co niaa hunɔɔ baŋa, yeemɛi bii niaa le ndu delɔɔ kɔɔli.

³³ Vɛ̀ɛ̀ mí halaa vanaa-mangalaa-isɔɔa nɔla pá lɛŋii ndɛi yɛ́-yɛ́i baŋa ya masaa Asiri o ba?

³⁴ Ɔ́ɔ̀ halaa kobio Hamat-a? Halaa Arpad yɛ? Kuɛɛ halaa kobio Sefarvaim, halaa Hena a halaa Iva a co yɛ? Vɛ̀ɛ̀ mí ndáà tiw pá ba le kobio Samari baŋaa ya o ba?

³⁵ O halaa lɛŋii ken kpow tɛɛn, ɔ́ɔ̀ a tiwba má baŋa lɛŋii ndɛi ya o ba-a? Vɛ̀ɛ̀ kpeekpei Mɛlɛka ndu baŋa yɛnin Yerusalɛm ya o ba?›»

³⁶ Mí vannda mei kpili, vana-vana mulul ndu ɲɛ-ɲɛ le. Kani mí masaa Esekia ndóò dimul nda aa: «La mulul ndu le.»

³⁷ O kon mí Eliakim po Hilkiya-o, ó va simlacinɔ cɛi lemasaa-o, Sɛbna vana sɛvaa a Yoa po Asaf vana mandaa lasɛbɔɔ hun o masaa Esekia lo a volɔɔla sɛɛsiɛilan lekɔɔ, má downun ndu kona a sɔɔn bolle vanaa yɔngù masaa Asiri mɔiyan-nda ndóò dimi mún-ndon kpow o kɔɔ.