2Masaa 15 - BII BILA

Asaria siŋnun masaa Yuda

¹ Vɔsi Yeroboam suili vɔsilan bidiin a laŋɔmmɛw o masalen coo Israɛl-lo, mí Asaria po Amasia-o siŋnun masaa Yuda.

² Ndóò nɔ vɔ vɔsilan tɔ́ a laŋɔmpum, mó siŋnun masaa. O kon mó tosa masalen vɔsilan beleŋuɛɛnu a latiɔn Yerusalɛm. Kala ndɔ diolan Yekolia, fulaa Yerusalɛm.

³ Mó tosa ɲɛ bɛnda Mɛlɛka o hɔl-lo, maa mɛɛ Amasia fuɲa ndɔ ndóò tosa yɛ.

⁴ Kɛ nduyɛ, tombon feŋan o lɛŋnden nin te, vannda va kɔlan sálàla n'cɔlulan solio a ansan lomɔɔ tuŋ o tombon.

⁵ Mí Mɛlɛka tuisi masaa Asaria nàà siaŋaa coo, má yàà ndu lándán o cɛiyo pum nin ndu pilɛ kpé. Lon o lo a nàà kon ni háá mó vu. Yotam po ndɔ va simlacinɔɔ o cɛi lemasaa nin ni, ndu va vɛlɛ simlacilen tosaa vannda coo o lɛŋnde len nin kpow ni.

⁶ Dɛnnda tɔ̀la Asaria lan kpow, ɲɛ-ɲɛ o tosa, kon co o sɛvaa o sɛbɛ Dɛnnda lemasalan Yuda nin.

⁷ Mí Asaria diam fuɲaa ndɔa ciee-piɔ́m, má kumbu ndu o sɛi fuɲaa ndɔa nin, o Kobi David-o nin. O kon, mí Yotam po ndɔ koma sul masaa o fonda ndɔɔ.

Masale Sakari len Israɛlla coo

⁸ Vɔsi Asaria suili vɔsilan beleyaa a laŋɔmaa o masalen coo Yuda-o, mí Sakari sul masa le paangon mún ŋɔmpum o lɛŋnde Israɛl-ten coo, Samari o va icali ni.

⁹ Mó tosa ɲɛ hɛnan Mɛlɛka loo mɛɛ fuɲaa ndɔa tosa yɛ. O soli balan o hakila Yeroboam po Nebat-o ndóò luei Israɛlla balan nin-ndan nin te.

¹⁰ Mí Salum po Yabɛs-o yii ndu dúmbú, mó dii ndu vannda o hɔl. Lende o dii ndu ni, mí ndu koma sul masaa o fonda ndɔɔ.

¹¹ Dɛnnda tɔ̀la Sakari lan la co lasɛvaa o sɛbɛ Dɛnnda lemasalan Israɛl nin.

¹² Mɛɛ Mɛlɛka ndóò dimul Yehu yɛ kpafii ɲɔɔ tosan ni, mí ndóò dimul ndu aa: «Poaa nɔmnda tosanin masalen o fonda nɔmndo o lɛŋnde Israɛl-ten coo háá o lambi hiɔɔlundɔɔ.» Nduyɛ lende ɲɔɔ tosan ni.

Salum siŋnun masaa Israɛl

¹³ Mí Salum po Yabɛs-o siŋnun masaa Israɛl o vɔsi Osias suili vɔsilan beleyaa a laŋɔmahiɔɔlu o masalen coo Yuda-o nin. Mó tosa masalen Samari paangei ndii pilɛ.

¹⁴ Mí Menahɛm po Kadi-o can Tirsa, mó heelu Samari, mó kɔ dii Salum po Yabɛs-o Samari lon. O kon, mó koma sul masaa o fonda ndɔɔ.

¹⁵ Dɛnnda tɔ̀la Salum-ndan kpow, a dúmbú o yii-o, sɔɔn mun co n'sɛvaa o sɛbɛ Dɛnnda lemasalan Israɛl nin.

¹⁶ Tuma kon mí Menahɛm del kobio Tifsa coo a cɔwvo, mó diw vanaa va lenin-nda kpow, mó tɛɛmbuu ɲɛ-ɲɛ va o tàndá kon nin, kandɔɔ o kobio Tirsa kɔlan háá Tifsa. Le tùú ndáà kɛɛ le ndu diola luɛyaala kobi kon kumbillo-o o diw vanaa va o kobi kon nin-nda ni, mó tɛɛndiaa vanaa lafolia kpow dembelan.

Masale Menahɛm-nden Israɛlla coo

¹⁷ Vɔsi Asaria suili vɔsilan beleyaa a laŋɔmahiɔɔlu o masalen coo Yuda-o, Menahɛm po Kadi-o siŋnun masaa Israɛl ni. Mó tosa masalen vɔsilan tɔ́, o kobio Samari nin o va icali ni.

¹⁸ Mó tosa ɲɛ hɛnan Mɛlɛka loo, o ceen ndɔɔ kpow nin, o soli balan o hakila Yeroboam po Nebat-o luei Israɛlla balan nin-ndan nin te.

¹⁹ Mɛɛ Pul, masaa Asiri luɛi o lɛŋnde Israɛl-ten nin, mí Menahɛm ke ndu volion kilolan vaalan beleyaa, haliko mi ndu Pul ndóò mala ndu, mì masalen léè sim yili ndu o ba.

²⁰ Vanaa bolofaa va o lɛŋnden nin-nda o ba Menahɛm bii volin mun ni le masaa Asiri mun yɔngoo. Vana-vana volin latámán beleŋuɛɛnu. O kon, mí masaa Asiri muungun o ndu lo, o lo o lɛŋnde Israɛl-ten nin te.

²¹ Dɛnnda tɔ̀la Menahɛm-ndan a ɲɛ-ɲɛ o tosa kpow, sɔɔn mun co n'sɛvaa o sɛbɛ Dɛnnda lemasalan Israɛl nin.

²² Mí Menahɛm diam fuɲaa ndɔa ciee-piɔ́m. Mí Pekahia po ndɔ koma sul masaa o fonda ndɔɔ.

Masale Pekahia len Israɛlla coo

²³ Vɔsi Asaria suili vɔsilann beleŋuɛɛnu o masalen coo Yuda-o Pekahia po Menahɛm-ndo siŋnun masaa Israɛl ni. Samari o va icali ni. Mó tosa masalen vɔsilan latiɔn.

²⁴ Mó tosa ɲɛ hɛnan Mɛlɛka loo, o soli balan o hakila Yeroboam po Nebat-o ndóò luei Israɛlla balan nin-ndan nin te.

²⁵ Mí simlacinɔ vanaa ndɔa cɔwva pilɛ, Peka po Remalia-o yii ndu dúmbú, langbaa fula o tàndá Kalaad-o nin-nda n'van beleŋuɛɛnu a va ndu kɔɔli ni. Mó kɔ dii ndu o cɛi pɔmbɔɔ pum nin o cɛi lemasaa nin Samari, mó dii vɛlɛ Arkɔb nda Ariee. Mɛɛ o cii ndu diyɔɔ, mó koma sul masaa o fonda ndɔɔ.

²⁶ Dɛnnda tɔ̀la Pekahia lan, ɲɛ-ɲɛ o tosa, sɔɔn mun co n'sɛvaa o sɛbɛ Dɛnnda lemasalan Israɛl nin.

Masale Peka len Israɛlla coo

²⁷ O vɔsi Asaria suili vɔsilan beleŋuɛɛnu a latiɔn o masalen coo Yuda-o, mí Peka po Remalia-o siŋnun masaa Israɛl ni. Samari o va icali ni. Mó tosa masalen vɔsilan bidiin.

²⁸ Mó tosa ɲɛ hɛnan Mɛlɛka loo, o soli balan o hakila Yeroboam po Nebat-o ndóò luei Israɛlla balan nin-ndan nin te.

²⁹ Telen Peka va o masalen coo Israɛl-lo, mí Tiklat-Pilesɛr, masaa Asiri hun bii Iyon, Abɛl-Bɛt-Maaka, Yanoa, Kedɛs a Hatsɔr. Mó bii tàndá Kalaad-o a tàndàá Kalile kpow, kɔ bii niko a tàndá Nɛftali-o kpow, mó bii vanaa va o kobila lan a o tàndàla lan nin-nda kpow, mó kɔa a nda o biyɔɔ nin o lɛŋnde Asiri len nin.

³⁰ Mí Osee po Ela-o yii Peka po Remalia-o dúmbú, mó dii ndu. Mó koma sul masaa o fonda ndɔɔ vɔsi Yotam po Osias-o suili vɔsilan bidiin o masalen-ndo.

³¹ Dɛnnda tɔ̀la Peka lan, ɲɛ-ɲɛ o tosa, sɔɔn mun co n'sɛvaa o sɛbɛ Dɛnnda lemasalan Israɛl nin.

Yotam siŋnun masaa Yuda

³² O vɔsi diinndɔɔ nin o masale Peka po Remalia-o len bɛngu o lɛŋnde Israɛl-ten coo, mí Yotam po Osias-o siŋnun masaa Yuda.

³³ Ndóò nɔ vɔsilan bidiin a laŋuɛɛnu, mó siŋnun masaa. Yerusalɛm o va icali ni. Vɔsilan tɔ́ a laŋɔmpum o tosa masalen ni. Yerusia kala ndɔ ndóò nɔ diolan ni, cua Sadɔk-o o va ni.

³⁴ Mó tosa ɲɛ bɛnda Mɛlɛka o hɔl-lo, mó kela mɛɛ Osias fuɲa ndɔ ndóò kela yɛ kpafii.

³⁵ Kɛ nduyɛ, tombon mún feŋan o lɛŋnden nin te, vannda va kɔlan sálàla n'cɔlulan solio a ansan lomɔɔ tuŋ o tombon. Yotam cɔw dio bɛndu luɛyaa Cɛi-Mɛlɛka-o ni.

³⁶ Dɛnnda tɔ̀la Yotam-ndan, ɲɛ-ɲɛ o tosa, kon co o sɛvaa o sɛbɛ Dɛnnda lemasalan Yuda nin.

³⁷ Telen Yotam va kon o masalen-ndo Mɛlɛka kandu Resin masaa Aram, nda Peka po Remalia-o vomɔɔ le tàndá Yuda-o delɔɔ coo ni.

³⁸ Mí Yotam diam fuɲaa ndɔa ciee-piɔ́m, má kumbu ndu o sɛi fuɲaa ndɔa nin, o Kobi David fuɲa ndɔ mama-o nin. Mí Ahas po ndɔ koma sul masaa o fonda ndɔɔ.