2Masaa 1 - BII BILA

Mɛlɛka tambu kɔl a Ahasia

¹ O piɔ́m Akab-o kɔɔli, mí Moabua piasa Israɛlla o ba.

² Paale pum, mí masaa Ahasia hialun o dio-pɔmbɔɔ nɛɛ o va coocoo o cɛi ndɔ lemasaa nin Samari-a, mó del lɛŋ, mó yɔŋulun taw. O kon, mó viam vannda le kɔlan yavaa vomɔɔ o Baal-Sebub lo, hala va o kobio Ekrɔn nin-ndo, le ndu ɲunaa te ndóò siangunin a yɔŋulɔn kon.

³ Kɛ mí mɛlɛkanɔ Hala-o hun dimul Elii fula Tisbe-o aa: «Cɔn ma kɔ bɔŋa kiilaa masaa Samari vem-nda, ma dimul nda aa: ‹Mò va maa Hala co o lɛŋnde Israɛl-ten nin te, le kɔlan Baal-Sebub, hala kobio Ekrɔn ɲunaa?›

⁴ Lelan diom Mɛlɛka dimi-o co hoo ni aa: ‹Kpele n hini hoo coo-o, a tul-lɛnin lecoo le few, vuo n co ni kangalan!›» Mí Elii kɔannun.

⁵ Mí kiilaa muungu o Ahasia lo. Mó ɲuna nda aa: «La vɛ muungoo ho?»

⁶ Má mulul ndu aa: «Langbanɔɔ pum naa n bɔŋan ni, mó dimul naa aa: ‹La kɔ, la muungu o masaa vem niaa-o lo, mì la kɔ dimul ndu aa: Diom Mɛlɛka dimi-o co hoo ni aa: Mò va maa Hala co o lɛŋnde Israɛl-ten nin te, le kɔlan Baal-Sebub, hala kobio Ekrɔn ɲunaa? Lelan kpele n hini hoo coo-o, a tul-lɛnin lecoo le few, vuo n co ni kangalan!›»

⁷ Mí Ahasia ɲuna nda aa: «Vɛɛ nɛ langbanɔ niaa bɔŋan kon, mó dimul niaa sɔɔn mun-ndo va yɛ?»

⁸ Má mulul ndu aa: «Doma yiiŋii visio va ndu lekɔɔ a yáwle yáw visio lekandannden o caŋ.» O kon mí Ahasia dimi aa: «Elii fula Tisbe-o ni.»

Ahasia co nɛilan nuwviaa le Elii biyɔɔ

⁹ Mí masaa Ahasia viam simlacinɔ kunda n'van beleŋuɛɛnu-o a n'van beleŋuɛɛnua ndɔa kan. Mí simlacinɔ kon kɔa o Elii lo nɛɛ o va o pembei bollen-nda, mó dimul ndu aa: «Nɔm vana-tɛɛngaa-diom Hala-o sei, masaa dimi aa nɔm tol!»

¹⁰ Mí Elii mulul simlacinɔ kunda n'van beleŋuɛɛnu kon aa: «Le tùú ya co vana-tɛɛngaa-diom Hala-o-o, màá yinnden le fula o halataala mì le tol, mì le lom nɔm a n'van beleŋuɛɛnua nɔmnda!» Mí yinnden le fula o halataala, mí le toal, mí le loam ndu nda n'van beleŋuɛɛnua ndɔa.

¹¹ Mí Ahasia viam vɛlɛ simlacinɔ kunda n'van beleŋuɛɛnu celen a n'van beleŋuɛɛnua ndɔa o Elii lo. Mí simlacinɔ kon soaa o Elii lo, mó dimul ndu aa: «Nɔm vana-tɛɛngaa-diom Hala-o sei, masaa dimi aa nɔm keleŋa tolɔɔ!»

¹² Mí Elii mulul ndu aa: «Le tùú ya co vana-tɛɛngaa-diom Hala-o-o, màá yinnden le fula o halataala mì le tol, mì le lom nɔm a n'van beleŋuɛɛnua nɔmnda!» O kon, mí yinnden le fula o halataala, mí le toal, mí le loam ndu nda n'van beleŋuɛɛnua ndɔa.

¹³ Mí masaa viam vɛlɛ simlacinɔ yàándɔɔ a kunda ndɔ n'van beleŋuɛɛnoo ndu kɔɔli. Mí simlacinɔ yàándɔ kunda n'van beleŋuɛɛnu kon hel pembei. Ndóò tiiyaa, mó baŋ vulan Elii o labɛngunin, mó tɛɛlun ndu aa: «Vana-tɛɛngaa-diom Hala-o, màá cɔ yoomu nuu a yoomu n'van beleŋuɛɛnua co haa buɛyaa nɔmnda-a ɲɛ sɔvɛ!

¹⁴ Tofa vɔ, yinnden le fula o halataala, mí le toal, mí le loam simlacia ŋiɔŋaa tasea kunda n'van beleŋuɛɛnu-beleŋuɛɛnua a vanaa kan latulu kpow. Kɛ sisa, màá yoomu nuu va ɲɛ sɔvɛɔ nɔm o hɔl!»

¹⁵ Mí mɛlɛkanɔ Hala-o dimul Elii aa: «La tol niaa ndu latulu, siòòŋii bii nɔm a ndu le.» O kon, mí Elii can, mó toal nda ndu o masaa lo.

¹⁶ Mí Elii dimul masaa aa: «Diom Mɛlɛka dimi-o co hoo ni aa: ‹Le tùú n vem vannda le kɔlan yavaa vomɔɔ o Baal-Sebub, hala co Ekrɔn-ndo lo-o, vana ca ko aa Hala co Israɛl le ndu isɔɔ ɲuna le, a tul-lɛnin o kpele n hini ho coo-o coo le few, vuo n co ni kangalan!›»

¹⁷ Mí masaa Ahasia vu lekɛ́ndɛi, mɛɛ diom Mɛlɛka-o ndóò dimin fulaa Elii o sondo yɛ. Le tùú ndóò nɔ hɔ́ɔ́ piaandu loo, mí Yoram koma sul masaa o fonda ndɔɔ, o vɔsi diinndɔɔ nin o masale Yoram po Yosafat len bɛngu, ó va masaa Yuda-o pɛɛn.

¹⁸ Sɔɔn tɔ̀un Ahasia-on a ɲɛ-ɲɛ o tosa kpow, kon co o sɛvaa o sɛbɛ Dɛnnda lemasalan Israɛl nin.